10
1 Atyewe Jesus-kenhe areyaye! Ayenge kwenhe ahentye anthurre aneme atyenge-artweye Jew areyeke Jesus arratye itelaretyeke, alakenhe ikwerenge anteme the Ngkarte apayuthnerle-aneme Re itnenhe itetheke mpwaretyenhenge. 2 Ayenge kwenhe itneke-akerte arratye angkerle-aneme; The kwenhe itelareme itne-arle Ngkarteke ahentye-aneme. Kenhe itne akenhe itelaretyakenhe nhenge nthakenhe Renhe arratye apentetyeke. 3 Ngkarte kwenhe angkeke, “Tyerrtyele apeke Christ renhe arratye itelareke-arle-iperrenge ware rarle arratye tneme Atyengenge ularre.” Itne akenhe itirreme Ngkartele akwele itnenhe arratye akemeke-athene itnarle angkentye Moses-kenhe aywerrkele awekenge. 4 Nhenge Christ arratemele, angkentye Moses-kenhe uyerrekenge. Nhenge tyerrtye areyele Christ arratye itelareke-iperrenge ware itne anteme arratye anerrirretyenhenge Ngkartenge ularre.
Ngkartele tyerrtye ingkirreke itetheke mpwaretyeke ahentye aneme
5 Arrule anthurrele Moses-ele alakenhe intelhe-ileke, “Tyerrtye angwenhele apeke aywerrkele aweme angkentye Moses-kenhe mpwaremele, kele rarle itethe akwete-ante anetyenhenge.” Leviticus 18:5.
6 Angkentye arrpenhe athewe pweke-nge aneme re anteme angkeme nhenge tyerrtye areyele ware apeke Ngkarte arratye itelaremele itne arratye tnetyenhenge Ikwerenge ularre. Arratye itelareke-arle-iperre itne alakenhe angkemele, “Alkere akertne-werne antyetyale Christ ahelhe nhenhe-werne akngetye-alpetyeke. Arrangkwe, Christ kwenhe ahelhe nhenhe kwene-werne kele apetyeke-arle.” 7 Itne alakenhe-arlke angketyakenhe, “Angwenhe-ame nhenge apmere ahelhe nhenhe kwene-werne irrpenhemele Christ akngetye-alpetyenhe apmere ilweke-arle-iperrenge?” Arrangkwe-arle, Christ ilweke-arle iperre kele akeme-irreke. 8 Bible-nge Christ-akerte alakenhe angkeme, “Angkentye Ngkarte-kenhe kwenhe arratye arrekantherrele-arlenge aneme, arrantherre kwenhe ikwere-akerte angketyeke, ikwere-akerte itirretyeke-anteye.” Deuteronomy 30:12-14.
Angkentye yanhe-anteye, nhenge Christ arratye itelarentye-akerte-arle, ayeye nhenge rante-rante ayenge-arle akwetethe angkerle-aneme. 9 Ayenge kwenhe alakenhe angkeme, “Unte apeke arratye ilelheme Jesus-arle alartetye aneme, arratye itelaremele Ngkartele-arle renhe akemelhe-ileke ilweke-arle iperrenge, kele Ngkartele ngenhe itetheke mpwaretyenhenge.”
10 Nhenge anwerne arratye itelaremele kele Ngkarte anteme angkeme anwerne-arle arratye aneme Ikwerenge ularre. Nhenge anwerne arratye ilelhemele Jesus-arle Alartetye aneme, kele Ngkartele anteme anwernenhe itetheke mpwaretyenhenge. 11 Arrule anthurre Isaiah-ele pwekeke alakenhe intelhe-ileke,
“Angwenhele apeke Renhe arratye itelareme apure-irretyakenhe anetyenhe,
Ngkartele-arle renhe arratye itetheke mpwaretyenhenge.” Isaiah 28:16.
12 Kele angkentye nhenhe tyerrtye ingkirrekeke, Jew areyeke, Jew anetyakenhe areyeke. Kenhe Ngkarte kwenhe ingkirrekeke alartetye aneme, nhenge anwerne Renhe apayuthnemele Re anwernenhe mwantyele arntarnte-aretyenhenge. 13 Nhenhe kwenhe Joel-ele arrule-arle pwekeke intelhe-ileke,
“Tyerrtye ingkirrekele Ngkarte apayuthneme-arle itnenhe itetheke mpwaretyeke, Re kwenhe itnenhene itetheke mpwaretyenhenge.” Joel 2:32.
14 Kenhe nthakenhe-arle-ame itne Renhe apayuthnetyenhe itnenhe itetheke mpwaretyeke itne apeke renhe arratye itelaretyakenhele? Kele nthakenhe-arle-ame itne Renhe arratye itelaretyeke itne apeke angkentye Jesus-akerte awetyakenhele anerrirrekenge? Kele nthakenhe-arle-ame itne angkentye yanhe awetyenhe anwerne apeke itneke iletyakenhenge? 15 Kele nthakenhe-arle-ame anwerne angkentye yanhe iletyenhe Ngkartele-arle apeke anwernenhe yernetye-kwenye? Arrule anthurre arrpenhele pwekeke alakenhe intelhe-ileke,
“Nhenge itne apeke tyerrtye ipenye apetyerlenge aremele itneke Angkentye Mwerre iletyeke, kele itne akangkemele anthurre-arle anemele.” Isaiah 52:7.
16 Kenhe Jew arrpenhemele Angkentye Mwerre aweke-arle-iperrele renhe irlpe artepele-arle awemele renhe arratye itelaretyakenhele. Arrule anthurre Isaiah-ele alakenhe intelhe-ileke, “Alartetye-aye, angwenhele-ame angkentye arratye itelareke anwerne-arle itneke ileke? Arrangkwe-arle, itne renhe arratye itelaretyakenhe.” Isaiah 53:1.
17 Arratye kwenhe, tyerrtye areyele Jesus arratye itelaretyenhe nhenge itne angkentye ikwere-akerte awemele iperre-ante. Itne angkentye aweme-ante arrpenhele itneke ileke-iperre.
18 Arrantherre apeke itirreme Jew areye akwele ayeye renhe awetyakenhe anekeke-athene. Arrangkwe-arle, itne kwenhe aweke-arle. The itelareme itne-arle aweke-arle arrpenhele-arle arrule anthurre pwekeke alakenhe intelhe-ilekenge,
“Apmere arrpe-anenhe ahelhe nhenhele tyerrtye ingkirrekele kwenhe Angkentye Mwerre nhenhe awerrirreke,
arrpenhe areyele-arle kwenhe itneke ilerlenge apmere arrpe-anenhenge.” Psalm 19:4.
19 Arrantherre apeke itirreme Israel-arenyeke-artweye akwele angkentye nhenge uyarne itelareke. Arrangkwe-arle, itne kwenhe akethe anthurre itelareke imerte itne ikwere ayene-ilelhemele. Arrule anthurre Moses-ele Bible-ke intelhe-ileke Ngkarte Jew areye-akerte angkeke-arle,
“Arrantherre itirreme tyerrtye apmere arrpenhe-arenye areye akwele akutne aneme apeke.
Lyete anteme arrantherre itnenhe areme ingkerte-ingkerte-irremele Tharle kwenhe itnenhe akngaketyenhenge atyene atyinhe areye anetyeke.
Arrantherre itnenhe aretyenhe ahele-anteme-irremele arrantherre-arle akwele atyene atyinhe-ante ware ahentye anerlenge tharle atnyeneme.” Deuteronomy 32:21.
20 Urreke anteme Isaiah-ele nhenge atnerre anthurrele Israel-arenye areyeke ileke Ngkarte-arle angkeke,
“Jew anetyakenhe areye kwenhe atyenge unthetyakenhe, itne kwenhe atyenge alkngwe anetyarte,
kenhe ayenge anteme akenhe itneke-werne apetyeke.
Ye, tyerrtye yanhe areyele kwenhe atyenge apayuthnetyakenhe-arle,
Kele imerte Ayenge anteme itneke imernelheke.” Isaiah 65:1.
21 Ngkarte alakenhe angkeke Israel-arenyeke akwerrke-ipenhe areye-akerte,
“Arrule anthurre-ngentyele kwenhe The uyarne ikngwetyarte atyene atyinhe areye atyenge-werne apetyetyeke.
Itne kwenhe Atyenge ikerlte anthurre akwete anerlte-aneme,
itne aywerrkele awetyakenhe angkentye atyinhe areyeke.” Isaiah 65:2.