27
Tairɨn nguibar ekiam ikuvizɨ, Esekiel a bagha azi
1 Ikiavɨra Itir God kamagh na mɨgei. 2 “O nguazir kamɨn gumazim, Tairɨn nguibar ekiam ikuvigham, kamaghɨn amizɨ, nɨ a bagh azirakar ighiam bangɨ. 3 Nguibar ekiar kam, ongarir dadarimɨn boroghɨn ikiava, gumazamizir ongarir mɨriabar itiba ko dagɨaba bagha bizibagh iveza da amadir ingangaribagh ami. Nɨ a mɨkɨm suam, Ikiavɨra Itir Godɨn Ekiam kamaghɨn mɨgei:
“O Tair, nɨ uabɨ uan ganganir bar dirim mɨgɨa a pɨrafi.
4 Nɨn ingarizir gumaziba, kurir dirimɨn mɨn nɨn ingari,
ezɨ ongarir torim, a nɨn nguibar mɨtaghniamɨn mɨn iti.
5 Me Hermonɨn Mɨghsɨamɨn ghua painɨn temer aghuiba inigha kurir kamɨn ingari.
Me Lebanonɨn ruarimɨn ghua
sidan temer aghuim inigha, kurimɨn tughav itir guarir akɨnim asara.
6 Egha me Basanɨn nguazimɨn ghua temer okɨn aghuiba inigha an pulbar ingari.
Egha Saiprusɨn Arighatɨzimɨn ghua temer aghuiba inigha, kurimɨn ghuriamɨn ingari.
Egha elefanɨn atariba inigha an ghuriam asɨngi.
7 Egha me Isipɨn kantrin ghua inir bar aghuir mam inigha kurimɨn duir inimɨn ingari.
Inir kam me dɨgɨrir bar aghuiba tretɨn da isami.
Eghtɨ kurim saghon mar izɨtɨ, gumazamiziba bar deragh an ganam.
Egha me Saiprusɨn Arighatɨzimɨn ghua
bluplan nir aghuiba ko, inir pɨghaghevir maba inigha kurimɨn da gui.
Eghtɨ kurimɨn ingangarir gumaziba dar apengan dapiv ikiam.
8 Me Saidonɨn nguibar ekiam ko Arvatɨn nguibar ekiamɨn ghua,
pul damuamin gumaziba ini.
O Tair, nɨn ingangarir gumazir fofoziba itiba,
me nɨn kurimɨn suizir gumaziba.
9 Gebalɨn nguibamɨn gumazir aruaba, me kurimɨn ingarir fofozir gumaziba,
me nɨ ko arua, kurimɨn toriba apɨrir ingangarim gami.
Tairɨn nguibar ekiam, kurir kam a nɨn ababanim gami,
ezɨ nɨn fofoziba itir gumaziba, kurimɨn suizir gumazibar mɨn ami.
Kantrin igharazibar kuriba bar nɨ bagha ize, egha dar ingarir gumaziba,
nɨn nguibar ekiamɨn aven ghua
nɨn biziba amadir dɨpenibar, dagɨaba bagha ingangarir bizibagh ami.
10 Persian kantri ko Lidia ko Libia, men marasi, nɨn mɨdorozir gumaziba.
Me uan oraba ko dapanir asuaba nɨn dɨvazibar da gui.
Gumazir kaba nɨn akuragha mɨsoghezɨ, nɨ ziar ekiam ini.
11 Arvatɨn nguibamɨn mɨdorozir gumaziba nɨn dɨvazir gavgavir mɨtɨabagh isɨn, tuivav ikia apaniba bagha gari.
Ezɨ Gamatɨn mɨdorozir gumaziba nɨn tauan ruaribagh isɨn ikia,
apaniba bagha gara iti.
Gumazir kaba uan oraba nɨn dɨvazibar da guigha nɨ gamima,
nɨn ganganim bar dera.
12 “Nɨ kantri Spen ko bizibagh iveza da amadir dagɨar ingangarim gami.
Ezɨ me nɨ da bizir bar avɨriba iniasa,
silva ko ain ko bizir igharazir maba sara isa ivezimɨn mɨn nɨ ganɨdi.
13 Nɨ kantri Grik ko, kantri Tubal ko, kantri Mesek ko bizibagh iveza da amadir dagɨar ingangarim gamua,
dar ikarvazim bagh ingangarir gumazir kɨniba ko bizir avɨrir me brasɨn ingariba isi.
14 Nɨ Togarman nguibar ekiamɨn gumazamiziba ko dagɨaba bagha ingangaribagh ami.
Egha uan biziba uari ikarvagha uari ganɨga,
me dama ingangarim damuamin hoziaba, ko hoziar mangɨ mɨsoghamiba ko donkiba isi.
15 Dedanɨn gumazamiziba nɨ ko ikarvazir arazim gami,
ezɨ ongarimɨn mɨriabar itir gumazamiziba, nɨ ko ikarvazir arazim gamua,
elefanɨn atariba ko ebonin temer pɨziba nɨ ganɨga nɨ da bizibagh ivesi.
16 Sirian gumazamiziba, nɨ ko biziba uari ikarvasi.
Me dagɨar bluplan ivezim bar pɨn koziba ko, inir pɨghaghevir aghuiba ko, inir me tretɨn diribar isamiziba ko,
ongarimɨn dagɨar bar aghuir pɨn koziba, nɨ ganɨga,
nɨn bizir me ifongezibagh ivesi.
17 Juda ko Israelia nɨ ko biziba uari ikarvasi.
Me Minitɨn nguazimɨn itir azenibar aghuir wit ko, hani ko, olivɨn borem ko, marasin ko, bizir igharaziba nɨ ganɨga,
nɨn bizir me ifongezibagh ivesi.* Hibrun akam deragha mɨgɨrɨgɨar kamɨn mɨngarim abɨghizir puvatɨ.
18 Ezɨ Damaskusɨn gumazamiziba nɨ ko dagɨaba bagha ingangarim gamua,
egha wainɨn dɨpar me Helbonɨn nguibar ekiamɨn iniziba ko,
sipsipbar arɨzir me Saharɨn danganimɨn iniziba, isa nɨ ganɨdi.
19 Wedanɨn adarazi ko Grikba ko Usalian adarazi† Hibrun akam deragha mɨgɨrɨgɨar kamɨn mɨngarim abɨghizir puvatɨ. dagɨaba bagha ingangarim nɨ koma a gami.
Egha me ain ko, borer me temer igharagha garir mamɨn ingarizim ko, ighurunir mughuriar aghuim zuiba, me da isa,
bizir avɨrir me nɨ da iniamibagh ivezasa bizir kaba inigha ize.
20 Ezɨ Dedanɨn gumazamiziba hoziabar satelɨn apengan arɨzir nir mɨtiaba isa,
nɨn biziba bagha, nɨ ko ikarvazir arazim gami.
21 Ezɨ Arebian gumazamiziba ko kantri Kedarɨn gumazir dapaniba, nɨ ko dagɨaba bagha ingara,
uan sipsipɨn nguziba ko sipsipɨn apuriba ko memeba,
nɨn biziba bagha, da isa nɨ ko ikarvazir arazim gami.
22 Ezɨ kantri Seba ko Raman nguibar ekiamɨn dagɨaba bagh ingangaribagh amir gumaziba, nɨ ko ikarvazir arazim gami.
Me uan gol ko pauran mughuriar aghuim zuiba ko, ivezim bar pɨn kozɨ dagɨaba isa,
nɨ ganigha, nɨ da bizibagh ivezasa.
23 Ezɨ Haranɨn nguibar ekiam ko, Kane ko Idenɨn gumaziba, ko kantri Seba ko, Asur ko Kilmatɨn kantri, men gumazir dagɨaba bagha ingangaribagh amiba,
nɨ ko ikarvazir arazim gami.
24 Me ikarvazir arazim gamua, korotiar bar aghuiba ko, korotiar pɨghagheviba ko, korotiar me tretɨn diribar isamiziba ko,
blanketɨn mɨtiar me ghuriabar ghuaribar, nedazir aghuariba itiba,
me da righa benibar da ikegha nɨ bagha da inigha ize.
Me bizir kaba nɨ danɨngigh, bizir nɨ da iniamibagh, ivezam.
25 Akar Mogomem 18:11-19Ezɨ kurir bar ekiaba, nɨn bizir avɨrir kaba, kantrin igharaziba bagha da ateragharui.
Nɨ uabɨ, mati kurir bar ekiar mam, ongarir torimɨn bizir bar avɨrim ateri.
26 “Ezɨ nɨn pul gamir gumaziba nɨ inigha ongarir torimɨn zuima,
aruem anadi naghɨn amɨnim iza nɨ givarazɨ,
nɨ bar saghon mar ghua uabɨ gasɨghasɨki.
27 Ezɨ nɨn dagɨaba ko, dagɨaba bagha amadir bizir aghuiba ko, kurkazir biziba ko, kurimɨn suirazir gumaziba ko, nɨn ingangarir gumaziba ko, nɨn kurimɨn ingarir gumaziba ko, nɨn biziba amadir gumaziba ko, nɨn mɨdorozir gumaziba ko, kurimɨn aruir gumaziba,
me bar kurimɨn itima, kurim ikuvizɨma, me bar ongarir torimɨn ovenge.
28 Ezɨ kurimɨn suizir gumaziba, pamtem tuavara deima men tuater ararem otozɨ,
gumazamizir ongarir dadarimɨn itiba a baragha nɨghava agoi.
29 “Ezɨ kurir igharaziba, ongarim ategha dadarimɨn ghue.
Ezɨ kuribar suizir gumaziba, ko gumazir pul gamiba,
kuribar faghafiagha nguazimɨn tuifi.
30 Egha me bar puvɨra nɨ bagh aziava arai.
Egha me uan osɨmtɨzim akakagha,
nguazir mɨneziba isa uan dapanibav kɨra averenim gɨpoghposi.
31 Me nɨ bagha uan dapanir arɨzibar suigha da asiagharɨgha,
azirakar korotiar bɨbɨziba aghui.
Me nɨ bagha arava men navir averiaba bar ikufi.
32 Me nɨ bagha azirakar ighiam gamua ghaze,
‘O Tair, nguibar ekiar igharazitam nɨ ikuvizɨ moghɨn garir puvatɨ.
Tair datɨrɨghɨn ongarir torimɨn aven nɨmɨra iti.’
33 Nɨ dagɨaba bagha ongarir torimɨn azenan amadir biziba, da kantriba bar dar ifongiaba agɨfa.
Atriviba, nɨn bizir nɨ amadiba bangɨn, biziba bar izɨfa.
34 Datɨrɨghɨn nɨ ikuvigha ongarir torir konimɨn aven iraghu.
Nɨn biziba ko gumazir nɨn ingariba, me bar nɨ ko ongarim giraghuegha gɨvagha puvatɨ.
35 Ongarir dadarimɨn itir gumazamiziba bar, nɨn biarim baregha dɨgavir kuram gami.
Men atriviba uaghan agoava atiati,
ezɨ atiatim me gami men guaba igharagha gari.
36 Nɨ bar ikuvigha gɨfa, egh ua ikian kogham.
Ezɨ nguazir kamɨn dagɨaba bagha ingarir gumazamiziba bar, akongɨva atiating ghuariaba su suam,
nguibar kam batozir bizim, uaghan ti e batogham.”