8
Asiriaba mɨsoghsɨ izɨ Damaskus ko Samarian bizir aghuiba okemegham
1 Ezɨ Ikiavɨra Itir God kamaghɨn na mɨgei, “Nɨ osɨrsɨ bizir ekiatam inigh, egh a gisɨn en akamɨn letan kɨnir kabar, ziar kam osirigh, ‘Me Zuamɨram Okemegh Zuamɨram a Inigh Mangɨ.’ Nɨ bar deravɨram an osirigh, eghtɨ gumazamiziba deravɨram an ganɨva a dɨponam.* Hibrun akam bizitamɨn mɨngarim deragha bigha mɨkemezir puvatɨ. 2 Egh akar nɨ osiramin kam gavgavim a danɨngɨsɨ, nɨ gumazir aghuir kamning inigh, ofa gamir gumazim Uria ko Jeberekian otarim Sekaraia, aning gantɨ, nɨ an osir.”
3 Ezɨ kɨ gɨn ghua uan amuim, a Godɨn akam inigha izir amizir mam, a koma akui. Ezɨ a navim asegha otarim bate. Ezɨ Ikiavɨra Itir God kamaghɨn na mɨgɨa ghaze, “Nɨ ziar kam a datɨgh, ‘Me Zuamɨram Okemegh Zuamɨram A Inigh Mangɨ.’† Gumazir maba ghaze, akam inigha izir gumazim Asaia, an amuim uaghan akam inigha izir amizir mam. 4 Borir kam tɨghar kamaghɨn fogh suam, kar nan amebam ko nan Afeziam, ezɨ dughiar kamra, Asirian kantrin mɨdorozir gumaziba izɨ Damaskusɨn nguibar ekiam ko Samarian nguibar ekiamɨn bizir aghuiba okemegh, mangɨ uan atrivim danɨngam. Ezɨ borir kamɨn ziamɨn mɨngarim kamakɨn, Zuamɨram Okemegh Zuamɨram A Inigh Mangɨ.”
Asirian atrivim Judaba dɨkabɨnasava ami, ezɨ God me ko iti
5 Ezɨ Ikiavɨra Itir God ua kamaghɨn na mɨgei:
6 “Kɨ Ekiam, kɨ Jerusalemɨn boroghɨn itir dɨpam Siloan mɨn iti,
egha zurara aghumra ivemari.
Ezɨ Judan gumazamiziba kamaghɨn nɨghnɨsi, Kɨ ti gavgaviba puvatɨ.
Egha me Atrivim Resinɨn gavgavim ko Israelɨn atrivir kamɨn gavgavim gɨnɨghnɨgha,
atiatir bar ekiam men itima, agorogem me mɨsozima aghariba men amɨra.
7-8 Kamaghɨn amizɨ, kɨ Ekiam, kɨ Yufretisɨn Fanem damightɨ,
an aperiam bar ekevegh danganiba bar da avaragham.
Dɨpam nguibaba bar da avaragh, Yufretisɨn Fanemɨn mɨriamɨn ikegh izɨ
kantri Judan otogham,
egh dɨpam bar buigh izɨv anang gumazimɨn fɨragharimɨn tugham.
Yufretisɨn Fanem, an Asirian kantrin atrivir gavgavim uan mɨdorozir gumaziba ko men nedazim.
Ezɨ e fo, God e ko iti!
Egha deravɨra e geghuvam,
mati kuarazir avɨzir bar ekiamning itim, an aning onegha mɨgha ghua
en nguazim bar, deravɨra an gari.”‡ Hibrun akamɨn ziam Emanuel kamaghɨn ghu, “God e ko iti.” Aisaia 7:14ɨn aven, Aisaia ghaze, boritam otoghtɨ me ziam Emanuel a darɨgham. Aisaia ti borir kam gɨnɨghnɨgha ghaze, “Emanuel.”
9 Ia deravɨram oragh, ia kantrin roghɨra itiba ko saghon itibar gumazamiziba.
Ia uari akuvagh mɨsoghsɨ gan ikɨ.
Eghtɨ ian gavgavim bighirɨghtɨ,
ia dɨgavir kuram damigh puram onganim damuam.
10 God e ko iti.
Kamaghɨn amizɨ, bizir ia damuasa nɨghnɨzim,
ia a damutɨ, ian tuavim pɨrightɨ, bizir kam otoghan kogham.
Ia bizir avɨribav mɨkɨmam,
eghtɨ dar dagheba puvatɨgham.§ Hibrun akar kam Emanuel a kamakɨn, “God e ko iti,” a ziar kam ko magh ghu Emanuel. Nɨ Aisaia 7:13-15 ko 8:7-8ɨn gan.
Aisaia uan adarazi ko me Godram atiating
11 Kɨ Ikiavɨra Itir Godɨn gavgavim barazima, a nan anadima, a kamaghɨn na mɨgei, “Nɨ gumazamizir kabar nɨghnɨziba ko arazibar gɨn mangan markɨ. 12 1 Pita 3:14-15Gumazamiziba kamaghɨn mɨkɨm suam, gumazir maba kantri Juda gasɨghasɨghasa akam akɨri, eghtɨ nɨ uan adarazi ko kamaghɨn nɨghnɨghan markɨ, akar kam a guizbangɨra. Bar puvatɨ. Egh gumazamiziba puvɨram atiating nɨghamin dughiamɨn, ia men mɨn puvɨrama atiatingan markɨ. 13 Ia kamaghɨn fogh suam, Ikiavɨra Itir Godɨn Gavgavim Bar Itim, a Godɨn Bar Zuezim, egha arazir aghuibara ami. Ia anarɨram atiatingɨva an apengan ikɨ. 14-15 1 Pita 2:8A gumazamizibar mogomer danganir bar gavgavimɨn mɨn iti. Egha a dagɨamɨn mɨn Israelia ko Judan gumazamiziba aruir tuavimɨn iti. Eghtɨ men avɨriba uan dagariba asɨ daghirɨ ikuvigham. Ezɨ Jerusalemɨn gumazamiziba, an azuazimɨn mɨn men suighasa iti. Eghtɨ men avɨriba azuazir kamɨn guam. Jerusalemɨn gumazamiziba, kɨ guizbangɨra azuazimɨn mɨn men suighasa iti.”
Ekiam damuasa mɨkemezir biziba, Aisaia dar mɨzua iti
16 Nan suren gumazibar damazimɨn, Ikiavɨra Itir God na ganɨngizir akar kaba,
kɨ da osirigh, da righɨva da ikegh kandelɨn grisɨn anemɨghɨrɨgh,
uan ababanim isɨ kandelɨn gris datɨghtɨ, da deraghvɨra ikiam.** Aisaia akam osirigha ghaze, Gumazamiziba Godɨn akabar gɨn mangan koghtɨ, God ghaze a bizir kabar amutɨ da otivam. Egha Aisaia akar kabar akɨnafarim righa, a savsuigha, kandelɨn gris isa tongɨram a gatɨ, egha a uan ababanim isa kandelɨn gris gisɨn atɨ, eghtɨ gumazitam an akaba angaran kogham. Kamaghɨn amizɨ, bizir kaba gɨn otivightɨ, gumazamiziba an akɨnafarir akar irɨghizir kam kuigh akar an osiriziba dɨpon kamaghɨn guizɨn fogh suam, Aisaian akaba, da guizbangɨra.
17 Hibru 2:13Egh kɨ datɨrɨghɨn, Ikiavɨra Itir God damuasa mɨkemezir biziba,
kɨ puram a mɨzuam da bagh gan ikiam.
Kɨ fo, an akɨrim ragha Israelian gumazamizibagh asagha gɨfa,
egh a ua ragh men ganan kogham.
Eghtɨ kɨ nɨghnɨzir gavgavim an ikɨvɨra ikiam.
18 Hibru 2:13Ia gan. Ikiavɨra Itir Godɨn Gavgaviba Bar Itim, Saionɨn Mɨghsɨamɨn ikiava, borir kaba na ganɨngi. Ezɨ kɨ uan boriba ko an e atɨzɨ e Israelian gumazamiziba bagha, ababanimɨn mɨn iti. Eghtɨ me en ganɨva, Godɨn Arazibagh nɨghnɨgham.†† Aisaia Godɨn akam akunigha gɨfa. A datɨrɨghɨn aghumra ikɨ gantɨ, God damuasa ifongezir bizibar amuam. Eghtɨ gumazamiziba Aisaian ganɨva egh an boribar ziabar mɨngaribagh nɨghnighɨva, a me mɨkemezir akabagh nɨghnɨgham. Nɨ Aisaian boribar izibar mɨngaribagh fofoghsɨ, nɨ Aisaia 7:3 ko 8:3-4ɨn gan. Ves 17-18ɨn akar kam, “Israelɨn gumazamiziba,” a kantri Israel ko kantri Judan gumazamizibav gei.
Godra uan gumazamiziba bizir aghuiba me ganɨdi
19 Eghtɨ gumazamiziba ia mɨkɨmtɨ, ia mangɨ gumazamizir oveaghuezibar duaba ko mɨkɨm, me da nɨghnɨziba iniam. Egha me kuarazibar mɨn imoba, sighsirir akabar mɨgei. Ezɨ gumazamizir oveaghueziba, me nɨghnɨziba gumazamizir angamɨra itibar anɨngan iburagham. Kamaghɨn amizɨ, e tizim bagh aseba ko gumazamizir oveaghueziba da nɨghnɨziba iniasa ivemara me bagha zui? Puvatɨ. Arazir kam ikufi. Me uan God bagh mangɨ. 20 Me Godɨn Araziba ko an Akar Gavgaviba ko, an nɨghnɨzim gɨfogh. Egh me kamaghɨn damighan kogh, me mɨtarmemɨn averara ikɨtɨ, amɨnim me bagh tiraghan kogham, eghtɨ me dughiar aghuitamɨn ganighan kogham.‡‡ Ves 19 ko 20ɨn, Hibrun akam deragha mɨgɨrɨgɨar kamɨn mɨngarim abɨghizir puvatɨ. 21 Puvatɨ. Me bar dughiar kuram iniam. Me navir osɨmtɨzir dafaba ikɨtɨ, mɨtiriaba men aghɨtɨ, me pura tintinibar kantrin aven daruam. Mɨtiriam me damutɨ me atar, akar kurabar uan aseba ko atrivim mɨkɨmam. Me kogh overiamɨn ganɨva, 22 vɨn nguazimɨn gan, egh me bar bizir aghuitamɨn ganighan kogham. Bar puvatɨ. Me osɨmtɨziba ko dughiar kuramra danganiba bar da gan ikiam, mati amɨnirbɨrim bar me avara. Egh me osɨmtɨzim gitavɨragh arɨmangamin tuaviba puvatɨgham.
*8:1: Hibrun akam bizitamɨn mɨngarim deragha bigha mɨkemezir puvatɨ.
†8:3: Gumazir maba ghaze, akam inigha izir gumazim Asaia, an amuim uaghan akam inigha izir amizir mam.
‡8:7-8: Hibrun akamɨn ziam Emanuel kamaghɨn ghu, “God e ko iti.” Aisaia 7:14ɨn aven, Aisaia ghaze, boritam otoghtɨ me ziam Emanuel a darɨgham. Aisaia ti borir kam gɨnɨghnɨgha ghaze, “Emanuel.”
§8:10: Hibrun akar kam Emanuel a kamakɨn, “God e ko iti,” a ziar kam ko magh ghu Emanuel. Nɨ Aisaia 7:13-15 ko 8:7-8ɨn gan.
8:12: 1 Pita 3:14-15
8:14-15: 1 Pita 2:8
**8:16: Aisaia akam osirigha ghaze, Gumazamiziba Godɨn akabar gɨn mangan koghtɨ, God ghaze a bizir kabar amutɨ da otivam. Egha Aisaia akar kabar akɨnafarim righa, a savsuigha, kandelɨn gris isa tongɨram a gatɨ, egha a uan ababanim isa kandelɨn gris gisɨn atɨ, eghtɨ gumazitam an akaba angaran kogham. Kamaghɨn amizɨ, bizir kaba gɨn otivightɨ, gumazamiziba an akɨnafarir akar irɨghizir kam kuigh akar an osiriziba dɨpon kamaghɨn guizɨn fogh suam, Aisaian akaba, da guizbangɨra.
8:17: Hibru 2:13
8:18: Hibru 2:13
††8:18: Aisaia Godɨn akam akunigha gɨfa. A datɨrɨghɨn aghumra ikɨ gantɨ, God damuasa ifongezir bizibar amuam. Eghtɨ gumazamiziba Aisaian ganɨva egh an boribar ziabar mɨngaribagh nɨghnighɨva, a me mɨkemezir akabagh nɨghnɨgham. Nɨ Aisaian boribar izibar mɨngaribagh fofoghsɨ, nɨ Aisaia 7:3 ko 8:3-4ɨn gan. Ves 17-18ɨn akar kam, “Israelɨn gumazamiziba,” a kantri Israel ko kantri Judan gumazamizibav gei.
‡‡8:20: Ves 19 ko 20ɨn, Hibrun akam deragha mɨgɨrɨgɨar kamɨn mɨngarim abɨghizir puvatɨ.