25
Ikiavɨra Itir Godɨn ziam fer ighiam
1 Dɨboboniba 23:19; Onger Akaba 98:1; 118:28O Ikiavɨra Itir God, nɨ nan God, ezɨ kɨ nɨn ziam fasa.
Nɨ nan akurvaghasa bizir aghuir igharagha garibagh ami.
Nɨ fomɨra damuasa mɨkemezir biziba,
nɨ guizbangɨra dagh amigha gɨfa.
Kamaghɨn amizɨ, kɨ ziar ekiam nɨ ganɨdi.
2 Aisaia 21:9; 23:13; Jeremaia 51:37Nɨ nguibar ekiabagh amizɨ, da mɨnezir pozibar otifi.
Nguibar ekiar dɨvazir gavgaviba itiba, bar ikufi.
Ezɨ apanibar nguibar ekiar kabar gavgaviba bar gɨfa,
ezɨ me ua dɨkavan ibura.
3 Kantrin gavgavibar gumazamiziba, ziar ekiam nɨ danɨngam.
Eghtɨ kantrin kurabar nguibar ekiaba, me nɨn atiatingam.
4-5 Gumazamizir biziba puvatɨziba,
nɨ deravɨra me geghuva men gari.
Gumazamizir onganarazibagh amiba, osɨmtɨzibar dughiamɨn itima,
nɨ men mogomer danganir bar gavgavimɨn mɨn iti.
Atrivir kurabar adariba ko anɨngaghariba,
mati amɨnir gavgavim iza dɨpenir bɨrim ginifi.
Ezɨ nɨ mati averpenim me avarazɨ,
amɨnir gavgavim izɨva me gɨnobaghan kogham.
Ezɨ gumazir kurabar adariba,
mati aruemɨn fefem dɨpaba puvatɨzir danganimɨn ikegha pamtem me gisira.
Ezɨ nɨ mati, me tememɨn dughuazimɨn apengan ikia,
aruemɨn fefemɨn uari apasi.
Ezɨ amɨnim ko amozimɨn dughiamɨn,
nɨ biziba puvatɨzir gumazamiziba avarazɨ
me deravɨra iti,
ezɨ aruer gavgavim me gapongezir puvatɨ,
mati overiamɨn ghuariaba aruemɨn fefeim avarazɨ, nguibam bar orangi.
Nɨ ifaghatir apanibar akaba dukumizɨ,
atrivir kurabar dɨmdiaba pura gefi.
God Saionɨn Mɨghsɨamɨn isar ekiam damuam
6 Egh Saionɨn Mɨghsɨam, Ikiavɨra Itir Godɨn Gavgaviba Bar Itim,
isar bar ekiam kantribar gumazamiziba bar me bagh a damuam.
Eghtɨ isar kam bar deragham, egh asɨzir bar aghuir oviba itiba ko,
damamin wainɨn dɨpar bar aghuiba an ikiam.
7 Datɨrɨghɨn gumazamizir naviba osemegha itiba,
me mati gumazim aremezɨ,
me a bagha osemegha korotiar pɨziba aghui.
Eghtɨ Ikiavɨra Itir God,
Saionɨn Mɨghsɨamɨn ikɨ, gumazamiziba bar men ovever osɨmtɨziba agɨvam,
mati me gumazir kuam avarazir niravɨzir kam, a me dama anedegham.
8 1 Korin 15:54; Akar Mogomem 7:17; 21:4Egh God ovevem dɨkabɨragh,
a gasɨghasɨgh, bar a gafiragham.
Ikiavɨra Itir God, en Ekiam, men ararem agɨvagham,
egh bar gumazamizibar damazibar teriba bar da adizam.
Egh a uan gumazamizir aghumsɨgha itiba,
a men aghumsɨziba bar da gɨvagham.
Kar, Ikiavɨra Itir God kamaghɨn damuasa mɨkemezir akam.
9 Jenesis 49:18; Onger Akaba 20:5; Taitus 2:13Ezɨ bizir kaba otivamin dughiamɨn, gumazamiziba kamaghɨn mɨkɨmam,
“Ikiavɨra Itir God, en God.
E nɨghnɨzir gavgavim an ikɨ, a mɨzuam ikɨtɨ,
anarɨra izɨ en akuragh uam e iniam.
A uabɨra Ikiavɨra Itir God, egha an en akura.
Kamaghɨn amizɨ, a uam e inizir bizir kam bagh,
e bar akuegham.”
God kantri Moab gasɨghasɨgham
10 Aisaia 15:1--16:14; Jeremaia 48:1-47; Esekiel 25:8-11; Amos 2:1-3; Sefanaia 2:8-11Eghtɨ Ikiavɨra Itir God bar deravɨra Saionɨn Mɨghsɨamɨn gantɨ, a deraghvɨra ikiam.
Egh a Moapian gumazamiziba fofozim me danɨng.
Egh apanibar amamangatɨghtɨ,
me izɨ me gasɨghasɨgh me abɨnigham,
mati bulmakauba uari uan buariba dɨkabɨri, da dadabar aven zui.* Matmena a Moapɨn kantrin nguibar ekiar mam. Ezɨ Hibrun akam Matmena, an ziamɨn mɨngarim kamaghɨn mɨn ghu, “Davir danganim.” A mati Godɨn akam inigha izir gumazim dɨbovir akabar Moapɨn nguibar ekiar kamɨn ziam gami.
11 Egh Moapia, mati gumazim ongarir torir ekiamɨn ikiava,
ovengan atiatia ongarir dadarimɨn mangasa nɨghnɨgha,
uan dafarimningɨn pamtemɨn ongarim mɨsogha
afozofogha zui moghɨn,
me osɨmtɨzir kam gitavɨraghsɨ arazir bar igharazibar amuam.
Eghtɨ Ikiavɨra Itir God uan dafarimɨn me abɨraghtɨ,
me fogh suam, bizir me uari fasa amir kaba,
da men akuraghan kogham.† Hibrun akam vezɨn kam deragha bigha mɨkemezir puvatɨ.
12 Eghtɨ God Moapian nguibar ekiabar dɨvazir gavgaviba akararigham.
Dɨvazir kaba datɨrɨghɨn pɨn mar iti.
Ezɨ an adar amutɨ, da bar daghirɨ nguazim giregham.
Da bar iregh nguazir mɨnemniabar tongɨn irɨghɨv ikiam.
25:1: Dɨboboniba 23:19; Onger Akaba 98:1; 118:28
25:2: Aisaia 21:9; 23:13; Jeremaia 51:37
25:8: 1 Korin 15:54; Akar Mogomem 7:17; 21:4
25:9: Jenesis 49:18; Onger Akaba 20:5; Taitus 2:13
25:10: Aisaia 15:1--16:14; Jeremaia 48:1-47; Esekiel 25:8-11; Amos 2:1-3; Sefanaia 2:8-11
*25:10: Matmena a Moapɨn kantrin nguibar ekiar mam. Ezɨ Hibrun akam Matmena, an ziamɨn mɨngarim kamaghɨn mɨn ghu, “Davir danganim.” A mati Godɨn akam inigha izir gumazim dɨbovir akabar Moapɨn nguibar ekiar kamɨn ziam gami.
†25:11: Hibrun akam vezɨn kam deragha bigha mɨkemezir puvatɨ.