31
Ikiavɨra Itir God uan gavgavim akazɨ, kantrin gavgaviba daghire
1 Aisaia 30:2; Esekiel 17:15; Daniel 9:13; Hosea 7:7Ia abuir gumaziba, ia kantri Isipɨn ghuava uarir akurvaghasa, men azangsɨsi, iavzika!
Ia bar ikuvigham.
Ia Isipian hoziaba ko men karisɨn avɨriba ko karisɨn suizir gumazir bar gavgaviba, ia nɨghnɨzir gavgavim dar iti.
Ia ti ghaze, Isipia ian akuragham.
Egha ia Israelian Godɨn Bar Zuezim, nɨghnɨzir gavgavim an itir puvatɨ.
Egha ia uarir akurvaghasa Ikiavɨra Itir Godɨn azangsɨzir puvatɨ.
Kamaghɨn amizɨ, ia bar ikuvigham.
Iavzika!
2 Ikiavɨra Itir God, fofozir aghuim iti.
A dughiar kuram gumazamizir kurabar anɨngsɨ, me danɨngam.
Egha a zurara uan akabar gɨn zui.
A dɨkavigh gumazir kuraba ko,
gumazir arazir kurabagh amibar akurvazir gumaziba ko mɨsogham.
3 Isipia, me aseba puvatɨ, me pura gumazir kɨniba.
Men hoziaba uaghan en hoziabar mɨn gari, da aseba puvatɨ.
Eghtɨ Ikiavɨra Itir God uan gavgavim akagh ivezir kuram me danɨngamin dughiam,
kantrin gavgavir kam irɨghtɨ kantrin an akurazim uaghan irɨgham.
Egh aning uaghara bar ikuvigham.
4 Guizbangɨra, Ikiavɨra Itir God kamaghɨn na mɨgɨa ghaze,
“Ia fo, laionɨn tam, sipsipɨn a mɨsoghezim amɨsɨ dazer ikɨ,
egh sipsipɨn kam ategh arɨmangɨghan kogham.
Eghtɨ sipsipbar gari gumazir avɨrim izɨ a dagarvaghtɨ,
a men atiatigh arɨ mangɨghan kogham.
Kamaghɨra, kɨ Ikiavɨra Itir Godɨn Gavgaviba Bar Itim,
kɨ dɨkavigh Saionɨn Mɨghsɨamɨn apanibav soghsɨ izighiram,
eghtɨ bizitam nan tuavim apɨrighan kogham.
5 E fo, kuaraziba pɨn mɨgha, egha deraghvɨra uan mɨkonibar itir nguzibagh eghufi.
Kamaghɨra, kɨ Ikiavɨra Itir Godɨn Gavgaviba Bar Itim,
kɨ deragh Jerusalem geghuv deragh an ganam.
Kɨ zurarama an boroghɨn ikɨ mangɨn izegh damu
a getiva deragh an ganɨva an akurvagham.”* God uan nguibar ekiam Jerusalem geghufi, mati ves 5 mɨkemezɨ mokɨn. Eghtɨ gumazamiziba akɨrim a gasaraghtɨma, (nɨ ves 1-3ɨn gan) a uaghan izighirɨ Jerusalem mɨsogham, mati ves 4 mɨkeme.
6 Ia Israelia, ia Ikiavɨra Itir God, deragha a barazir puvatɨgha an akaba batosi.
Egh ia uan navibagh iragh uamategh a bagh izɨ.
7 Ikiavɨra Itir God izamin dughiamɨn,
ia asebar marvir guaba makunigham.
Kar nedazir ia uari uan dafaribar silva ko gol isa dar ingariziba.
Ia kamaghɨn amigha arazir kuram gami.
8 Ikiavɨra Itir God kamaghɨn mɨgɨa ghaze,
“Mɨdorozir sabar tam Asirian kantri mɨsogh egh bar me agɨvagham.
Mɨdorozir sabar kam, a gumazibar sabam puvatɨ, kɨ uabɨ anemadaghtɨ a mangam.
Asiriaba mɨdorozir sabar kam gitavɨraghsɨ aregham,
eghtɨ men mɨdorozir gumazir igiaba kalabusɨn mangɨ
pura ingangarir gumazir kɨnibar mɨn otivigham.
9 Atiatir bar ekiam, Asiriaba batoghtɨ,
men nguibar ekiar gavgavim irɨgham.
Men mɨdorozir gumazibar dapaniba, bar atiatigh uan mɨdorozir inir avɨzir asaraghav itim ategh
onganigh puvɨram aregham.”
Kar Ikiavɨra Itir Godɨn Akar Gavgavim.
A Saionɨn Mɨghsɨamɨn ikia, avimɨn mɨn iti.
A Jerusalemɨn nguibar ekiamɨn ikia,
danganir ekiar avir pamtemɨn isimɨn mɨn iti.