47
Ikiavɨra Itir God ghaze, Babilon ikuvigham
1 Aisaia 13:1--14:23; Jeremaia 50:1--51:64Ikiavɨra Itir God kamaghɨn Babilonian nguibar ekiam mɨgei,
“O Babilon, nɨ fomɨra mati atrivir amizim uan atrivir dabirabim gaperaghav iti moghɨn,
ziar ekiam iti.
Nɨ nguibar bar aghuimɨn mɨn itima, kantrin igharazitamɨn mɨdorozir gumaziba nɨ dɨkabɨrazir puvatɨ,
kamaghɨn amizɨ, nɨ mati amizir bar igiar patamɨn itir puvatɨzim mɨn, bar deravɨra iti.
Ezɨ datɨrɨghɨn puvatɨ.
Nɨn gavgavim gɨvaghtɨ,
nɨ uan atrivir dabirabim ategh nguazir kɨnim dapiam.
Nɨn mɨkarzim fomɨra deragha iti moghɨn, ua ikian kogham.
Egh gumaziba ua nɨn gantɨ, nɨ deragh kurkegh daruan kogham.
Bar puvatɨ.
2 Nɨ ingangarir amizir kɨnimɨn mɨn ingaram.
Nɨ uan dapanim avarazir nir avɨzim adegh, uan korotiar dirir otɨghɨn aruzim sueghtɨ,
nɨn dagariba azenara ikɨtɨ, nɨ wit mɨrmɨrir dagɨaba poghpogham.
Egh uan inim fegh
mavanabogh faneba abɨgh mangam!
3 Gumaziba nɨn korotiaba sueghtɨ,
nɨ bibiamra ikɨ bar aghumsigham.
Kɨ nɨn arazir kuram ikarvaghsɨ ivezir bar kuram isɨ nɨ danɨngtɨ,
gumazitam nan anogoreghan kogham.”
4 Israelian Godɨn Bar Zuezim, a en Akurvazir Gumazim.
An ziam, Ikiavɨra Itir Godɨn Gavgaviba Bar Itim.
5 Ikiavɨra Itir God kamaghɨn Babilonia mɨgei,
“Babilon, Kantrin Igharazibar Gumazamiziba ua kamaghɨn nɨ dɨponan kogh suam,
‘Kantriba bar men atrivir amizim.’
Kamaghɨn amizɨ, nɨ uan akam dukuagh mangɨ
mɨtarmemɨn daperagh nɨmɨra ikɨ.
6 Kɨ bar puvɨra uan gumazamizibar atari,
egha kɨ ua uan gumazamizibar mɨn me gɨnɨghnɨzir puvatɨ.
Egha kɨ nɨ ataghizɨ, nɨ iza paza me gamua,
egha nɨ tong men apangkuvizir pu.
Bar puvatɨ.
Nɨ bar pazavɨra me gamua osɨmtɨzir bar dafam me ganɨngi.
Egha nɨ uaghan gumazamizir ghuribagh amima me osɨmtɨzir dafam ateri.
7 Nɨ ghaze, nɨ atrivir amizimɨn ikɨ mamaghɨra ikiam,
kamaghɨn amizɨ, bizir kaba ko bizir gɨn nɨ bativamiba,
nɨ deragha dagh nɨghnɨzir puvatɨ.
8 Akar Mogomem 18:7-8“Nɨ dughiar aghuim baghavɨra nɨghnɨzir amizim,
nɨ akar kam baragh!
Nɨ ti ghaze, nɨ deravɨra ikɨtɨ, bizir kuratam nɨ batoghan kogham.
Egha nɨ kamaghɨn uabɨ mɨgɨa ghaze,
‘Kɨ uabɨra kɨ gavgaviba bar iti, ezɨ tav nan mɨn itir puvatɨ.
Kɨ amizir pam ko boriba ariaghirezimɨn mɨn otoghan kogham.’
9 Ezɨ noka, arazir kamning zuamɨra nɨ bativam.
Dughiar kamra nɨn pam aremegham,
eghtɨ nɨn boriba uaghan bar moghɨram arɨghiregham.
Nɨ ti kamaghɨn nɨghnɨsi, nɨ imeziba ko akavsiar gavgavir avɨriba iti,
ezɨ bizir kaba nɨn akuraghan kogham.
Bar puvatɨgham.
Nɨ bar dughiar kuram batogham.
10 “Nɨ ti kamaghɨn nɨghnɨsi,
Nɨn arazir kuraba nɨ damutɨ, nɨ mɨtɨgh gavgavigham.
Egha nɨ kamaghɨn nɨghnɨsi,
Nɨ amir bizir kaba, gumazitam dar garir puvatɨ.
Nɨn fofozir bizir guar avɨribar ingariba, nɨn nɨghnɨzim adavizɨma,
nɨ kamaghɨn uabɨn mɨgɨa ghaze,
‘Kɨ uabɨra, kɨ gavgavim iti, ezɨ tav nan mɨn itir puvatɨ.’
11 Dughiar bar kuram nɨ batogham,
eghtɨ nɨ akavsiamɨn gavgavimɨn a gitavɨraghan kogham.
Osɨmtɨzir dafam zuamɨra nɨ batogham,
eghtɨ nɨ an tuavim apɨramin bizitam damuan kogham.
Bizir bar kurar nɨ nɨghnɨzi da nɨ bativan koghamiba,
da nɨ batogh bar nɨ gasɨghasigham.
12 “Kamaghɨn ti dera, nɨ igiamra ikia imeziba ko akavsiar gavgavibar fofoziba inigha dagh amua fozɨ moghɨn,
nɨ pamtem dar amu ganigh.
Da ti nɨn akuragham.
Da ti nɨn apanibar amutɨ,
me atiatigh aregham.
13 Fofozir gumazir avɨriba nɨghnɨzim nɨ ganɨdima,
nɨn nɨghnɨzim deravɨra ingarir puvatɨ.
Egha nɨ mɨkovezibar garir akavsiabagh amir gumaziba bagh akam amada.
Gumazir kaba, me overiam ko mɨkovezibar gara zurara iakɨnibar nɨ bagha iza,
bizir nɨ bativamibar gun nɨ mɨgei.
Ezɨ me ti nɨn akuragham.
14 “Ezɨ puvatɨ, me mati ogheba mɨsigha iti, ezɨ avir mam gumazir kabar isi me gasɨghasɨgham.
Eghtɨ me uarira uarir akurvaghan kogham.
Bar guizbangɨra, me kamaghɨn mɨkɨman markɨ,
‘Kɨ mangɨ avir mɨriamɨn daperagh uan mɨkarzim fefem a danɨngam.’
Puvatɨ. Avir kam bar men isigham.
15 Bar guizbangɨra, nɨ igiamra itima
gumazir nɨghnɨzim nɨ ganɨga nɨn akurvaziba,
me bar onganigh,
men tav nɨn akuraghan kogham.”