Onger Akaba.
12.
Devit onger akar kam osiri. Gumazir onger akar kamɨn faragha zuim, stringɨn 8pla itir gita gikararang ongasa me mɨkeme. O Ikiavɨra Itir God, nɨ en akuragh. Gumazamizir aghuiba bar puvatɨ? Nɨ ua gumazamizir zurara nɨghnɨzir gavgavir nɨn ikiavɨra itibar ganan kogham. 
Gumazamiziba bar, gumazamizir igharaziba ko ifavaribagh ami. Me asuir akaba uariv gɨa egha uarira uarigh ifari. 
Ikiavɨra Itir God, nɨ gumazamizir igharaz darazi apezeperiba ko gumazamizir uari fa mɨgeiba, nɨ bar men akabar kumigh. 
Me kamaghɨn mɨgɨa ghaze, “E mɨkɨmsɨ ifongegh e mɨkɨmam. Gumazitam en anogoroghan kogham. Tinara e gativagh en ganam?” 
Ezɨ Ikiavɨra Itir God ghaze, “Gumazamizir onganarazibagh amiba, gumazamizir igharaziba paza me gamizɨ me mɨzaziba isa ara iti. Me nan akurvazim iniasa bar ifonge. Kɨ datɨrɨghɨn dɨkavigh izɨ men akurvagham.” 
Godɨn akam bar guizbangɨra. An akam mati me avimɨn silva tuazɨma, a 7plan dughiabar isigha bar zue. 
O Ikiavɨra Itir God, gumazamizir kuraba, me danganiba bar dar iti. Guizbangɨra, nguazimɨn itir gumazamizibar nɨghnɨzim, arazir kuram a bizir bar aghuim. Kamaghɨn amizɨ, nɨ bar deravɨra e geghuv en gan. Eghtɨ gumazamizir kurar kaba e gasɨghasɨghan kogham.