Onger Akaba.
20.
Devit onger akar kam osiri. A gumazir onger akabar faragha zuim gɨnɨghnɨgha an osiri. Nɨ osɨmtɨzim ikiamin dughiamɨn, Ikiavɨra Itir God nɨn dɨmdiam ikaragh nɨn akurvagham. A en ovavim Jekopɨn God, a nɨ geghuv nɨn ganam. 
A Saionɨn Mɨghsɨamɨn ikia uan Dɨpenimɨn iti, egh a uan akurvazim nɨ bagh anemadagh gavgavim nɨ danɨngam. 
Ofan nɨ a bagha amiba, a bar dagh nɨghnɨgh, egh nɨn ofan bar isia mɨghɨribagh ifuegham. 
Nɨ bizir tizim gifuegha navim a bagha nɨ dɨkafi, God a isɨ nɨ danɨngam. Bizir nɨ damuasa nɨghnɨziba, a dar amightɨ da bar otivigham. 
Nɨ uan apanibav sogh me abɨraghtɨ, e bizir kam bagh bar akuegham. E bizir kam gɨnɨghnɨgh uan Godɨn ziam fam. E ghaze, nɨ Ikiavɨra Itir Godɨn azangsɨzir biziba, an ada ikaragh da isɨ nɨ danɨngam. 
Kɨ datɨrɨghɨn fo, Ikiavɨra Itir God, uabɨ uan atrivir a ua baghavɨra mɨsevezir kam, an an akurvasi. A uan Nguibar aghuimɨn ikia, an azangsɨziba barasi. Egha uan gavgavimɨn an akurvazima, a mɨdorozimɨn uan apaniba abɨri. 
Gumazir maba nɨghnɨzir gavgavim uan mɨdorozir karisbar ikia ghaze, da men akurvagham. Ezɨ marazi nɨghnɨzir gavgavim uan hoziabar ikia ghaze, da men akurvagham. Ezɨ eia, e nɨghnɨzir gavgavim uan Ikiavɨra Itir Godɨn ziamɨn ikia kamaghɨn fo, a en akurvagham. 
Gumazamizir kamaghɨn amiba, me asaghpora ira bar puvarɨsi. E puvatɨ. E dɨkavigh tuivigh gavgavigham. 
O Ikiavɨra Itir God, nɨ atrivimɨn akuraghtɨ a uan apaniba abɨnigh. E nɨn deir dughiabar, nɨ en dɨmdiam ikaragh en akuragh.