Onger Akaba.
46.
Kar Koran adarazir onger akam. Gumazir onger akar kamɨn faragha zuim gumazamizibav kemezɨ, me ighiar ziam “Amizir Igiaba,” an tiarimɨn a bange. God en danganir mogomemɨn mɨn ikia, e akumakua deragha en gara, gavgavim zurarama e ganɨdi. Dughiar e osɨmtɨzir ekiabar aven itibar, a en akurvaghasa gara iti. 
Mɨkɨmkɨziba otivtɨ, mɨghsɨaba dɨpɨrighɨrɨ ongarir torimɨn magɨrɨtɨ, e atiatingan kogham. 
Ongarim dɨkav pamten dɨpɨrighɨrɨ mangɨ mɨghsɨabav soghtɨ, da nuighnuigham, eghtɨ e akongan kogham. 
Godɨn Nguibam, a Godɨn Bar Pɨn Itim ua bagh a ginaba, egha an aven iti. Ezɨ faner bar ekiar mam an torimɨn ivemarima, gumazamiziba dɨpar kam bagha bar akonge. 
God Nguibar kamɨn aven iti, ezɨ Nguibar kam ikuvighan kogham. Amɨnim tɨghar tisɨ damutɨ, God an akuragham. 
Kantrin avɨribar gumazamiziba dɨgavir kuram damigh uarira uariv sogham. Eghtɨ atriviba uan gumazamiziba ko bar iregham. Eghtɨ Godɨn tiarim ararimɨn mɨn dagaraghtɨ, nguazim puram ameregh magɨram. 
Ikiavɨra Itir Godɨn Gavgaviba Bar Itim, an e ko iti. A Jekopɨn God, a en danganir mogomem. 
Aria! Ia izɨ Ikiavɨra Itir God amizir bizibar ganigh. A nguazimɨn amizir biziba, ia dar gan dɨgavir kurabar amuam. 
A nguazimɨn oteviba bar dar mɨdoroziba agefi. Egha barir piba ko afuzibar suigha da apɨragharigha, oraba aviba dagh arɨzi da isi. 
A kamaghɨn mɨgɨa ghaze, “Ia uarir asugh nɨmɨra ikɨ. Egh deragh na gɨfogh, kɨ guizbangɨra God. Kantriba bar nan ziam fɨ. Nguazir kamɨn itir gumazamiziba bar kamaghɨn mɨkɨm suam, Kɨrara kɨ ekevegha bar pɨn iti.” 
Ikiavɨra Itir Godɨn Gavgaviba Bar Itim, an e ko iti. A Jekopɨn God, a en danganir mogomem.