Onger Akaba.
126.
Godɨn Dɨpenimɨn ghuavanaga an ziam fer ighiam. Ikiavɨra Itir God uam e inigha Saionɨn nguibamɨn ize, ezɨ dughiar kam e ghaze, e mati irebamɨn gari. 
Kamaghɨn, e akava ighiabagh amuavɨra iti. Ezɨ Kantrin Igharazibar Gumazamiziba e mɨgɨa ghaze, “Ikiavɨra Itir God, Israelian akurvaghasa maburan ingangarimram ami.” 
Bar guizbangɨra, Ikiavɨra Itir God en akurvaghasa bar ingangarir ekiam gami, kamaghɨn e datɨrɨghɨn naviba deragha bar akonge. 
O Ikiavɨra Itir God, nɨ ua deraghvɨra e damuam. E mati dɨpaba puvatɨzir danganimɨn itir faneba dɨpaba dake, nɨ amozim damightɨ a ua izɨtɨ da izevegham. Kamaghɨra, nɨ e damutɨ e izɨvagham. 
Gumazir aravɨra dagheba opariba, me dar dagheba iniva bar akuegh dɨmɨva arangam. 
Guizbangɨra, gumazir aravɨra dagher ovɨziba atera ghua da opariba, me dar dagheba inigh uamategh ighiabar amu da ater izam.