Onger Akaba.
130.
Godɨn Dɨpenimɨn ghuavanaga an ziam fer ighiam. O, Ikiavɨra Itir God, nan navir averiam bar osemezɨ kɨ nɨn dei, nɨ nan akuragh. 
O Ekiam, nɨ na barakigh. Kɨ nɨ mɨgeir mɨgɨrɨgɨaba ko nan arareba nɨ da baregh nan akuragh. 
O, Ikiavɨra Itir God, nɨ en arazir kuraba mengegh dar suiragh ikɨtɨ, Ekiam, en tinara nɨn damazimɨn tugh gavgavigham? 
Nɨrara arazir kuraba gɨn amadi, kamaghɨn amizɨ, e nɨrarama atiating nɨn apengan ikiam. 
Kɨ uabɨn akurvaghasa ifongegha, Ikiavɨra Itir God, a mɨzua iti. Egha nɨghnɨzir gavgavim an akamɨn iti. 
Kɨ uan navir averiamɨn aven, Ekiamɨn akurvazim bagha a mɨzua ti. Ezɨ nan arazir kam a gumazir dɨmagarimɨn bizibar gara itima amɨnim men itirazir arazim, a bar a gafira. 
E Israelia, Ikiavɨra Itir God zurara bar en apangkufi, egha e ikuvighan koghasa an en akurvasi. Kamaghɨn amizɨ, ia nɨghnɨzir gavgavim an ikɨ. 
A uan gumazamiziba Israelia men akuragha ua me ini, egh men arazir kuraba gɨn amangam.