Onger Akaba.
137.
E Babilonɨn Faner mɨriabar apiaghav ikiava, Saionɨn nguibam gɨnɨghnɨgha a bagha azia iti. 
E uan gitabav sozir puvatɨ, e purama da isa en boroghɨn itir temer aguabar da gui. 
Gumazir e isa kalabus garɨghiziba ghaze, “Ia ighiabar amu en navibar amutɨ da deraghtɨ e bar akuegham. Ia Saionɨn nguibamɨn ziam dɨghor e bagh ighiabar amu.” 
E manmagh suvɨra kantrin igharazimɨn ikɨ, egh Ikiavɨra Itir Godɨn onger akabar amuam? Kar en kantri puvatɨ, e kamaghɨn damuan kogham. 
O Jerusalemɨn Nguibam, kɨ nɨ gɨn amadagh, gita inigh uan agharir guvimɨn uam a mɨsoghan kogham. 
O Jerusalem, kɨ nɨ isa faraghavɨra uan dɨghorim gamigha nɨ bagha bar akonge. Kɨ ua nɨ bakɨnɨghnɨgh nɨ isɨ uan nɨghnɨzim datɨghan koghtɨ, nan tiarim ikuvightɨ kɨ ighiabar amuan kogham. 
O Ikiavɨra Itir God, nɨ dughiar gumaziba Jerusalem gasɨghasɨzi, Idomia e gamizir arazim gɨnɨghnɨgh. Me ivɨvɨgha ghaze, Jerusalemɨn dɨpeniba bar dɨpɨrighiregh nguazim giregh. 
O Babilonia, ia orakigh. Ia bar ikuvigham! Ian arazir kurar ia e gamizir kam, gumazir uam a ikarvaghamim, a bar akongegh. 
Gumazir kam nɨn borir iririviba inigh, dagɨabav kɨnightɨ me bar ikuvigham. Kamaghɨn, gumazir kam bar akuegham.