Onger Akaba.
142.
Devit dagɨar torimɨn aven ikia, ighiar kam osiri. Me onger akar kam kamagh a dɨbori, Maskil. Kɨ uabɨn akurvaghasa Ikiavɨra Itir Godɨn dei. Kɨ an apangkuvim bagha pamten a gaghorava a mɨgei. 
Na bativir araziba ko osɨmtɨziba kɨ bar dar gun a mɨgei. 
Tuavir kɨ mangamim, nan apaniba nan suighasa azuazir mam gura, ezɨ nan navim osemezɨ, kɨ ghaze, kɨ ikuvigham. Nɨrara, kɨ mangamin tuavim nɨ a gɨfo. 
Kɨ uabɨn boroghɨn gari, gumazir nan akurvaghamiba puvatɨ. Ezɨ gumazir nan gan na geghuvamiba puvatɨ. Kɨ mongamin danganiba puvatɨ. 
O Ikiavɨra Itir God, nɨ nan akurvaghasa kɨ nɨn dei. Nɨrara nɨ nan eghuvir gumazim. Kɨ kamaghɨn ifonge, kɨ angamɨra ikiavɨra itir dughiam, nɨrara na ko ikiam. 
Gumaziba arazir kurabar na gamua egha bar gavgafi, ezɨ kɨ me abɨnasava amuava avenge. Nan navim bar oseme. Kamaghɨn, kɨ uabɨn akurvaghasa nɨn dei, nɨ na barakigh. 
Nɨ osɨmtɨzir kamɨn aven uam na inightɨ, kɨ an fɨrighɨrɨgh egh deravɨra ikiam. Nɨ bar deravɨra na gami. Kamaghɨn, gumazamiziba uari akuvagh ikɨtɨ, kɨ men tongɨn nɨn ziam fam.