IKAATEEYINI.
23.
Ari ikantanaki Balaam: “Powetsikina jaka 7 taapokimentotsi. Powamayina 7 ewonkiri waaka eejatzi 7 itsipa ipireetari.” 
Imatakiro Balac okaatzi ikantakiriri Balaam. Ari itsipatakari Balac irika Balaam itaakiri apaani ewonkiri waaka, eejatzi apaani ipireetari okaatakira 7 taapokimentotsi. 
Ikantzi Balaam: “¡Pinkatharí! Ari pijeeka-wentawakiri pitaani. Niyaatawakiita naaka, okanta-shimaetya itonkiyo-tena Tajorentsi. Aritaki nokaman-takimi eeroka okaatzi ikantinari.” Jatanaki Balaam ikinakiro okaanki-chempi-takira tonkaari. 
Ikanta itonkiyo-takari Tajorentsi irika Balaam, ari ikantzi Balaam: “Nokantaki rowetsikaeti 7 taapokimentotsi, notaaki apaani waaka eejatzi apaani ipireetari okaatakira 7 taapokimentotsi.” 
Ari ikantakaakawo Tajorentsi riyotiro Balaam iñaawaeteri, ikantakiri: “Pipiyi ijeekakira Balac, pikamantiri okaatzi nokanta-kimiri naaka.” 
Ari ipiyaari Balaam iñaapaeri Balac ijeekawen-tziri itaani, itsipayi-takari inampina-paeni Athataa-weni-jatzi. 
Ari iñaawae-tanakiro Balaam riyotahae-takiriri ñaantsi, ikantanaki: Nopoñaakawo Tonkaeroniki ramakina Balac, Nokinapaakiro ochempi-mashiki jempe ishitowa-piintzi ooryaa, ikaemakaan-takina Iwinkatharite Athataa-weni-jatzi, ikantakina: “¡Pipoki, pitakijiri Israel-paeni! ¡Pipoki, piyakateri icharini-paeni Jacob!” 
¿Iitaka notakijan-tyaariri naaka kaari ikoyi Tajorentsi itakijeeteri? ¿Iitaka niyakatan-tyaariri naaka kaarira riyakatzi rirori Tajorentsi? 
Tema irika Tajorentsi, tee roshiyari atziri-paeni itheeyan-tyaari, Tee rinashitawo okaatzi ikenkishire-takari. Aririka ikanti: “Iroka nantiri.” Aritaki rantakiro. Imonkaa-tziro maawoeni ikashiya-kaantziri. 
Ikantee-takina naaka notajonka-wentanti. Tema imatakiro Tajorentsi itajonka-wentantaki rirori, eero nomateero naaka noepiya-ñaani-teeri. 
Tee iñeeteero iyaari-peronka icharini-paeni Jacob, Tee riñeeteero eejatzi ikowaenka-takowaetzi isheninka Israel-paeni. Tema ashi royiro itsipata-piintakari Itajorentsite. Riitaki rajahaa-piintakari iwinkathari-tetaari. 
Tema irika Tajorentsi, amaeriri ijeekawitaka paerani Apitantoniki, Otzimimo-tziri ishintsinka oshiyaawomi ishintsinka katsi-mari-paeni piratsi. 
Tekatsi oetzimotyaari icharini-paeni Jacob takijaantsi, Tekatsi oetzimotyaari Israel-paeni yakataantsi. Nimaeka akantiri Israel-paeni: ¡Osheki rantzimota-kimiri Tajorentsi kaari iñaapiin-teetzi! 
Roshiyakari kashekari irikapaeni, Ikatziya rajaryaanta. Eero romorenka roojatzi ratsikan-takyaariri ratsikanewo. Riranakiro riraa rowamaani-paeni. 
Ari ikantanaki Balac: “¡Balaam! Teera pinintatyee piyakateri, eero pitajonka-wenteeri eejatzi.” 
Ikantzi Balaam: “¡Balac! Tema nokantzi-takimi ketziroeni: ‘Okaatzi ikantinari Tajorentsi, rootaki nantiri.’”