MAMPAANTSI.
89.
Rojankinee-takiro romampaa-wentee-tawo ikashiya-kaakiriri Tajorentsi pinkathari David Ashi nowaero nomampaeyaa, nomampaa-wenteero ineshironka-teena Tajorentsi. Nomampaa-wenteeyaari, nokanteeri ikaate icharini-teeyaari: “Tee rookawentanta Tajorentsi.” 
Nokantee eejatzi: “Ashi poyiro petakotanta. Tee pipaashini-tanitzi, poshiyakawo inkite ashi oyiro jempe okanta roori.” 
Ikantzi Tajorentsi: “Eenitatsi nokashiya-kaeriri ikaatzi niyoshii-teeri naaka. Nokanta-pero-teeri nomperatanewo David, nokantziri: 
‘Eero nookawentaari ikaate picharini-teeyaari, Naaka kantakae-yaawoni rashi rowaero ipinkathari-wentantee.’” (Pishowi-teeyini, pipiyompi-teeyini eepichokiini.) 
Tajorentsi! Osheki ikimo-shire-wentakiro inkite-jatzi okaatzi pitajonka-wentantziri. Osheki ikenkitha-takotakimi kiteshireriite ashi poyiro eeroka tee pookawentanta. 
¿Eenitatsima inkite-jatzi monkaat-yaarini Tajorentsi? ¿Eenitatsima oshiyaarini Tajorentsi? Tema rawijiri riiperori jenoki-jatzi.’ 
Tema ipiyoteeyani kiteshireri-paeni ipinkatha-tziri Tajorentsi. Maperori iriiperotzi rirori rawijanakiri ikaatzi piyowentariri. 
Tajorentsi Ñaaperori! ¿Eenitatsima oshiyimini eeroka? Eeroka shintsi-perori. Ashi poyiro pikyaaryoo-wentantzi. 
Otzimimo-tzimi eeroka pishintsinka pomaeryaan-tawori otamakaatzi inkaari. Pimatzitawo eejatzi oshinkiryaa-takaani tampyaa. 
Potsinampaakiri Ajahaariweni, poshiya-kaantakari kaminkari. Tema eeroka shintsi-shempari, pomishiyakiri pikoshekani. 
Tema eeroka ashitawo maawoeni inkite eejatzi kepatsi. Eeroka wetsikakiro kepatsi, eejatzi maawoeni tzimatsiri. 
Eeroka wetsikakiro okaatzi tzimatsiri katonkonta eejatzi kirinkanta. Oshiyawaetaka omampaa-tyeeyaami ochempi Piyopathee-toni eejatzi Pinkaetoni, opaeriiro piwaero. 
Tema eeroka shintsi-shempari, eejatzi okimitaka pako. Tema osheki otsinampaantaki pakoperori. 
Eeroka kameetha-shireri pipinkathari-wentantzi, eejatzi eeroka tampatsika-shireri. Osheki petakotanta, oshiyakawo roomi jewata-piinteemini pikyaaryooperotani. 
Tajorentsi! Tema osheki ikimoshiretzi atziri thaamenta-chari romampaa-wentzimi, Oshiyakawo ranashi-tatyeemi jempe pikoñeetyaakotziri eeroka. 
Ashi rowaero ikimo-shiretzi ipaeriiro piwaero. Ari rajahaawenteemi, tema eeroka tampatzika-shireri. 
Mapero, jempe pikanta eeroka, ari okanta pishintsinka, eejatzi powaneenkawo. Tema apatziro pikanta-kaawo eeroka, aririka pikoyi, pimatziro pishintsi-takaana. 
Ikimitawo Tajorentsi riimi otzikaako-mentotsi. Riitaki Itajorentsite Israel, Awinkatharite. 
Paerani pikenkitha-waeta-kaakiri piiteshirerite, ikemakimi ishireki. Pikantziri: “Noneshironka-takiri ñaaperori. Nopinkathari-takaakiri ikaatzi niyoyaakiri nashitari naaka.” 
Noñaakiri nomperatanewo David. Nojee-patzii-totan-takari notajorenchaate. 
Ashi noyiro notapi-wako-tantee-yaari nako. Ari oshintsi-shempa-takahaeri noshempa. 
Eero rotsinampaeri ikaatzi koshekariri. Ari ikimitee-yaari kaari-perori, eero rotsinampaeri. 
Naaka thonkirini ikaate owayirityaarini. Nothonkaeri ikaate kijaneenterini. 
Tema kijokiro nokanteeri noneshironka-teeri, Okantakaawo ipaeryaa-piinteero nowaero otzimimo-tantee-yaariri ishintsinka. 
Ari nokanta-kaakyaawo ipinkathari-wentantee ijeeki inkaariki. Imatero eejatzi ipinkatharite ijeeki nijaaki-paeni. 
Ari ikantee-teena: “Tajorentsi! Eeroka ashitanari, Eeroka Notajorentsite, poshiyawo mapi nomana-mento omatantari nawijakotee.” 
Nokimita-kaanteeri naaka nantarite notyomi. Riitaki awijirini ikaate pinkatha-wenteeroni kepatsi. 
Rashi royiro noneshironka-teeri rirori. Eero aminaashita okaatzi nokashiya-kaakiriri. 
Tema rashi rowaero ipinkathari-yitee ikaate icharini-teeyaari. Ari ikantee-tatyeero eeniro iñeetziri ooryaa jenokinta. 
Aririka ipakaakiro itomi noñaani, Eerorika riyaata-kaero ithotyahero okaatzi niyotaa-kiriri, 
Aririka ipiyatha-takyaawo nowinka-kaantani, Eerorika ikemijantziro nokanta-kaantani, 
Ari nowajankitaakiri ipiyatha-takina, Nopajawenteeri ikaariperotakira. 
Eero nopakaemaetawo netakotee-yaari. Noejokiro-peroteeyaari, ashi noyiro notsipa-tyaari. 
Eero nomaejantziro okaatzi nokashiya-kaakiriri. Eero nomaeritzi nokanteri okaatzi nokaman-takiriri. 
Tema Naaka Tajorentsi kashiya-kaakiriri, Eero namatawi-tziri David, okaatzi nokantakiriri: 
“Ashi royiro picharini ipinkatharitee pinampiki, Ari ikantee-tatyeero ipinkatharitee eenirowa iñeetziri ooryaa eejatzi kashiri. 
Ari ikantee-taatyeeya ijeeki, roshiyaari kashiri, Ashi rowaero ijeekae inkiteki. (Pishowi-teeyini, pipiyompi-teeyini eepichokiini.)