119
ܐ
1 ܛܘܼܒ݂ܵܐ ܠܬܲܡܝܼܡܹ̈ܐ ܒܐܘܼܪܚܵܝܗܝ،
ܕܟܹܐ ܚܵܕܪܝܼ ܒܢܵܡܘܿܣܵܐ ܕܡܵܪܝܵܐ.
2 ܛܘܼܒ݂ܵܐ ܠܢܵܛܪ̈ܵܢܹܐ ܕܣܵܗܕܘܵܬܘܼ̈ܗܝ،
ܕܒܟܠܹܗ ܠܸܒܵܐ ܟܹܐ ܛܵܥܝܼ ܐܸܠܹܗ.
3 ܐܘܼܦ ܠܹܐ ܦܵܠܚܝܼ ܥܵܘܠܵܐ،
ܒܐܘܼܪ̈ܚܵܬܘܼܗܝ ܟܹܐ ܚܵܕܪܝܼ.
4 ܐܲܢ݇ܬ ܦܘܼܩܸܕ ܠܘܼܟ݂ ܦܘܼܩܵܕܘܼ̈ܟ݂،
ܕܦܵܝܫܝܼ ܢܛܝܼܪܹܐ ܚܦܝܼܛܵܐܝܼܬ.
5 ܛܘܼܒ݂ܵܐ ܕܗܵܘܝܼ ܡܩܵܘܝܵܢܹ̈ܐ ܐܘܼܪ̈ܚܵܬܝܼ،
ܠܸܢܛܵܪܵܐ ܩܵܢܘܿܢܘܼ̈ܟ݂.
6 ܗ̇ܝܓܵܗ ܠܹܐ ܢܵܟ݂ܦܹܢ،
ܟܲܕ ܚܵܝܪܹܢ ܠܟܠܵܝܗܝ ܦܘܼܩܕܵܢܘܼ̈ܟ݂.
7 ܒܸܬ ܫܲܟܪܸܢܘܼܟ݂ ܒܬܪܘܼܨܘܼܬܵܐ ܕܠܸܒܵܐ،
ܟܲܕ ܝܵܠܦܹܢ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.
8 ܩܵܢܘܿܢܘܼ̈ܟ݂ ܒܸܬ ܢܵܛܪܹܢ،
ܫܒ݂ܵܩܵܐ ܠܵܐ ܫܵܒ݂ܩܹܬ ܠܝܼ.
ܒ
9 ܒܡܘܼܕܝܼ ܡܵܨܹܐ ܕܲܟܹܐ ܠܵܗ̇ ܥܠܲܝܡܵܐ ܐܘܼܪܚܹܗ؟
ܒܢܛܵܪܬܘܼܗ̇ ܐܲܝܟ݂ ܚܲܒܪܘܼܟ݂.
10 ܒܟܠܹܗ ܠܸܒܝܼ ܛܥܹܐ ܠܝܼ ܐܸܠܘܼܟ݂،
ܠܵܐ ܫܵܒ݂ܩܹܬ ܚܵܠܛܹܢ ܡ̣ܢ ܦܘܼܩܕܵܢܘܼ̈ܟ݂.
11 ܓܵܘ ܠܸܒܝܼ ܛܘܼܫܝܵܐ ܠܝܼ ܗܹܡܸܙܡܵܢܘܼܟ݂،
ܩܵܐ ܕܠܵܐ ܚܵܛܹܝܢ ܥܲܠܘܼܟ݂.
12 ܒܪܝܼܟ݂ܵܐ ܝܘܸܬ، ܝܵܐ ܡܵܪܝܵܐ،
ܡܲܠܸܦ ܠܝܼ ܩܵܢܘܿܢܘܼ̈ܟ݂.
13 ܒܣܸܦܘܵܬܝܼ̈ ܗܘܼܩܹܐ ܠܝܼ
ܟܠܵܝܗܝ ܕܝܼܘܵܢܹ̈ܐ ܕܦܘܼܡܘܼܟ݂.
14 ܒܐܘܼܪܚܵܐ ܕܣܵܗܕܘܵܬܘܼ̈ܟ݂ ܦܨܝܼܚ ܠܝܼ،
ܗܲܪ ܐܲܝܟ݂ ܕܒܟܠܹܗ ܥܘܼܬܪܵܐ.
15 ܠܦܘܼܩܵܕܘܼ̈ܟ݂ ܒܸܬ ܗܲܓܹܝܢ،
ܘܠܐܘܼܪ̈ܚܵܬܘܼܟ݂ ܒܸܬ ܚܵܝܪܹܢ.
16 ܒܩܵܢܘܿܢܘܼ̈ܟ݂ ܒܸܬ ܡܲܒܣܸܡܸܢܵܗ̇ ܓܵܢܝܼ،
ܠܹܐ ܢܵܫܹܝܢ ܠܚܲܒܪܘܼܟ݂.
ܓ
17 ܥܒ݂ܘܿܕ ܛܵܒ݂ܬܵܐ ܠܪܹܓܘܼܟ݂ ܕܚܵܝܹܝܢ،
ܘܢܵܛܪܹܢܗܘܿܢ ܗܹܡܸܙܡܵܢܘܼ̈ܟ݂.
18 ܓܲܠܝܼ ܠܗܘܿܢ ܥܲܝܢܝܼ̈ ܕܚܵܙܹܝܢ
ܕܘܼܡܵܪܹ̈ܐ ܡ̣ܢ ܢܵܡܘܿܣܘܼܟ݂.
19 ܡܵܫܵܚܲܛ ܝܼܘܸܢ ܐܵܢܵܐ ܒܐܲܪܥܵܐ،
ܠܵܐ ܛܲܫܹܝܬ ܡܸܢܝܼ ܦܘܼܩܕܵܢܘܼ̈ܟ݂.
20 ܓܪܝܼܣܬܵܐ ܝܠܵܗ̇ ܓܵܢܝܼ ܒܪܲܚܪܲܚܬܵܐ
ܠܕܝܼܘܵܢܘܼ̈ܟ݂ ܒܟܠܔ ܙܲܒ݂ܢܵܐ.
21 ܢܓ̰ܝܼܘ ܠܘܼܟ݂ ܒܚܵܬܪ̈ܵܢܹܐ، ܒܠܝܼܛܹ̈ܐ،
ܐܲܝܢܝܼ ܕܚܵܠܛܝܼ ܡ̣ܢ ܦܘܼܩܕܵܢܘܼ̈ܟ݂.
22 ܡܲܥܒܸܪ ܡܥܲܠܝܼ ܠܵܘܡܵܐ ܘܡܲܣܠܲܝܬܵܐ،
ܒܗ̇ܝ ܕܢܛܝܼܪܵܐ ܝܘܸܢ ܠܣܵܗܕܘܵܬܘܼ̈ܟ݂.
23 ܐܘܼܦ ܝܬܝܼܒ݂ ܠܗܘܿܢ ܓܘܼܪ̈ܵܢܹܐ ܘܗܘܼܡܙܸܡ ܠܗܘܿܢ ܕܲܠܩܘܼܒ݂ܠܝܼ،
ܐܝܼܢܵܐ ܪܹܓܘܼܟ݂ ܗܘܼܓܹܐ ܠܹܗ ܩܵܢܘܿܢܘܼ̈ܟ݂.
24 ܐܘܼܦ ܣܵܗܕܘܵܬܘܼ̈ܟ݂ ܒܲܣܝܼܡܘܼܬܝܼ ܝܢܵܐ،
ܡܵܠܘܿܟܹ̈ܐ ܝܢܵܐ ܐܸܠܝܼ.
ܕ
25 ܬܒܝܼܥ ܠܵܗ̇ ܠܥܲܦܪܵܐ ܓܵܢܝܼ،
ܡܲܚܝܼ ܠܝܼ ܐܲܝܟ݂ ܚܲܒܪܘܼܟ݂.
26 ܗܘܼܩܹܐ ܠܝܼ ܐܸܠܘܼܟ݂ ܐܘܼܪ̈ܚܵܬܝܼ ܘܩܵܡ ܓ̰ܲܘܸܒܸܬ ܠܝܼ،
ܡܲܠܸܦ ܠܝܼ ܩܵܢܘܿܢܘܼ̈ܟ݂.
27 ܐܘܼܪܚܵܐ ܕܦܘܼܩܵܕܘܼ̈ܟ݂ ܡܲܦܪܸܡ ܠܝܼ،
ܘܒܸܬ ܗܲܓܹܝܢ ܠܕܘܼܡܵܪ̈ܘܼܟ݂.
28 ܡܘܼܥܝܸܩܬܵܐ ܝܠܵܗ̇ ܓܵܢܝܼ ܡ̣ܢ ܚܲܫܵܐ،
ܣܢܘܿܕ ܠܝܼ ܐܲܝܟ݂ ܚܲܒܪܘܼܟ݂.
29 ܐܘܼܪܚܵܐ ܕܕܘܼܓܠܵܐ ܡܲܥܒܸܪ ܡܸܢܝܼ،
ܘܒܚܢܵܢܵܐ ܡܲܠܸܦ ܠܝܼ ܢܵܡܘܿܣܘܼܟ݂.
30 ܐܘܼܪܚܵܐ ܕܫܪܵܪܵܐ ܓܘܼܒܹܐ ܠܝܼ،
ܕܝܼܘܵܢܘܼ̈ܟ݂ ܡܘܼܬܸܒ݂ ܠܝܼ ܒܲܠܩܘܼܒ݂ܠܝܼ.
31 ܬܒܝܼܥ ܠܝܼ ܠܣܵܗܕܘܵܬܘܼ̈ܟ݂،
ܝܵܐ ܡܵܪܝܵܐ، ܠܵܐ ܡܲܢܟܸܦܸܬ ܠܝܼ.
32 ܒܐܘܼܪܚܵܐ ܕܦܘܼܩܕܵܢܘܼ̈ܟ݂ ܒܸܬ ܪܵܚܛܹܢ،
ܒܗ̇ܝ ܕܒܸܬ ܡܲܪܘܸܚܸܬ ܠܸܒܝܼ.
ܗ
33 ܡܲܠܸܦ ܠܝܼ، ܝܵܐ ܡܵܪܝܵܐ، ܐܘܼܪܚܵܐ ܕܩܵܢܘܿܢܘܼ̈ܟ݂،
ܘܒܸܬ ܢܵܛܪܹܢܵܗ̇ ܗܲܠܔ ܚܲܪܬܵܐ.
34 ܡܲܦܪܸܡ ܠܝܼ ܕܢܵܛܪܹܢ ܢܵܡܘܿܣܘܼܟ݂،
ܘܒܸܬ ܢܵܛܪܹܢܹܗ ܒܟܠܹܗ ܠܸܒܝܼ.
35 ܡܲܚܕܸܪܝܼ ܒܫܒ݂ܝܼܠܵܐ ܕܦܘܼܩܕܵܢܘܼ̈ܟ݂،
ܒܗ̇ܝ ܕܒܝܼܹܗ ܒܣܝܼܡ ܠܵܗ̇ ܓܵܢܝܼ.
36 ܡܲܦܬܸܠܔ ܠܸܒܝܼ ܠܣܵܗܕܘܵܬܘܼ̈ܟ݂،
ܘܠܵܐ ܠܩܢܵܝܬܵܐ ܛܲܢܦܬܵܐ.
37 ܡܲܥܒܸܪ ܥܲܝܢܝܼ̈ ܡ̣ܢ ܠܸܚܙܵܝܵܐ ܣܪܝܼܩܘܼܬܵܐ،
ܒܐܘܼܪܚܘܼܟ݂ ܡܲܚܝܼ ܠܝܼ.
38 ܡܲܩܘܝܼ ܗܹܡܸܙܡܵܢܘܼܟ݂ ܠܪܹܓܘܼܟ݂،
ܗ̇ܝ ܕܝܼܠܵܗ̇ ܕܙܵܕܹܥ ܡܸܢܘܼܟ݂.
39 ܡܲܥܒܸܪ ܡܸܢܝܼ ܠܵܘܡܝܼ ܕܟܹܐ ܙܵܕܥܹܢ ܡܸܢܹܗ،
ܒܗ̇ܝ ܕܕܝܼܘܵܢܘܼ̈ܟ݂ ܛܵܒܹ̈ܐ ܝܢܵܐ.
40 ܗܵܐ، ܪܘܼܚܪܸܚ ܠܝܼ ܠܦܘܼܩܵܕܘܼ̈ܟ݂،
ܒܙܲܕܝܼܩܘܼܬܘܼܟ݂ ܡܲܚܝܼ ܠܝܼ.
ܘ
41 ܘܐܵܬܝܵܐ ܥܲܠܝܼ ܛܲܝܒܘܼܬܘܼܟ݂، ܝܵܐ ܡܵܪܝܵܐ،
ܘܦܘܼܪܩܵܢܘܼܟ݂، ܐܲܝܟ݂ ܩܵܘܠܘܼܟ݂،
42 ܗܵܕܟ݂ܵܐ ܕܝܵܗܒܹܢ ܓ̰ܘܼܘܵܒ ܠܠܵܝܡܵܢܝܼ،
ܒܗ̇ܝ ܕܣܒܝܼܪܝܼ ܒܚܲܒܪܘܼܟ݂.
43 ܘܠܵܐ ܫܵܩܠܹܬ ܡ̣ܢ ܦܘܼܡܝܼ ܗܹܡܸܙܡܵܢ ܕܫܪܵܪܵܐ،
ܣܵܒܵܒ ܠܕܝܼܘܵܢܘܼ̈ܟ݂ ܣܦܝܼܪܝܼ،
44 ܘܒܸܬ ܢܵܛܪܹܢ ܢܵܡܘܿܣܘܼܟ݂ ܐܲܡܝܼܢܵܐܝܼܬ،
ܠܥܵܠܲܡ ܥܵܠܡܝܼܢ،
45 ܘܒܸܬ ܚܵܕܪܹܢ ܒܪܘܵܚܵܢܝܼ،
ܒܗ̇ܝ ܕܠܦܘܼܩܵܕܘܼ̈ܟ݂ ܛܥܹܐ ܠܝܼ،
46 ܘܒܸܬ ܗܲܡܙܸܡܸܢ ܒܘܼܬ ܣܵܗܕܘܵܬܘܼ̈ܟ݂ ܩܲܕܡ ܡܲܠܟܹ̈ܐ،
ܘܠܹܐ ܢܵܟ݂ܦܹܢ.
47 ܘܒܸܬ ܩܲܒܠܸܢ ܒܘܼܣܵܡܵܐ ܒܦܘܼܩܕܵܢܘܼ̈ܟ݂
ܕܡܘܼܚܸܒܵܝ ܠܝܼ،
48 ܘܒܸܬ ܡܲܪܡܸܢ ܐܝܼܕܵܬܝܼ̈ ܠܦܘܼܩܕܵܢܘܼ̈ܟ݂ ܕܡܘܼܚܸܒܵܝ ܠܝܼ،
ܘܒܸܬ ܗܲܓܹܝܢ ܩܵܢܘܿܢܘܼ̈ܟ݂.
ܙ
49 ܕܟ݂ܘܿܪܹܗ ܚܲܒܪܘܼܟ݂ ܠܪܹܓܘܼܟ݂،
ܗ̇ܘ ܕܒܝܼܹܗ ܩܵܡ ܥܵܒ݂ܕܹܬ ܕܣܵܒܪܹܢ.
50 ܐܵܗܵܐ ܝܠܵܗ̇ ܝܵܗܒ݂ܵܠܬܵܐ ܕܠܸܒܵܐ ܐܸܠܝܼ ܓܵܘ ܐܘܼܠܨܵܢܝܼ،
ܣܵܒܵܒ ܗܹܡܸܙܡܵܢܘܼܟ݂ ܩܵܡ ܡܲܚܝܼܵܐ ܠܝܼ.
51 ܚܵܬܪ̈ܵܢܹܐ ܡܘܼܣܚܸܪܗܘܿܢ ܟ̰ܸܡ ܪܵܒܵܐ ܒܝܼܝܼ،
ܘܡ̣ܢ ܢܵܡܘܿܣܘܼܟ݂ ܠܵܐ ܩܠܝܼܒ ܠܝܼ.
52 ܕܟ݂ܝܼܪܝܼ ܕܝܼܘܵܢܘܼ̈ܟ݂ ܡ̣ܢ ܥܵܠܲܡ، ܝܵܐ ܡܵܪܝܵܐ،
ܘܦܝܼܫ ܠܝܼ ܝܘܼܗܒ݂ܵܐ ܠܸܒܵܐ.
53 ܚܸܡܬܵܐ ܩܵܡ ܕܵܒ݂ܩܵܐ ܠܝܼ
ܡ̣ܢ ܥܸܠܬܵܐ ܕܪ̈ܲܫܝܼܥܹܐ ܫܵܒ݂ܩܵܢܹ̈ܐ ܕܢܵܡܘܿܣܘܼܟ݂.
54 ܩܵܢܘܿܢܘܼ̈ܟ݂ ܗܘܹܐ ܠܗܘܿܢ ܙܡܝܼܪ̈ܵܬܹܐ ܐܸܠܝܼ،
ܓܵܘ ܒܲܝܬܵܐ ܕܬܵܘܬܵܒ݂ܘܼܬܝܼ.
55 ܕܟ݂ܝܼܪܝܼ ܒܠܲܝܠܹܐ ܫܸܡܘܼܟ݂، ܝܵܐ ܡܵܪܝܵܐ،
ܘܢܛܝܼܪܝܼ ܢܵܡܘܿܣܘܼܟ݂.
56 ܐܵܗܵܐ ܗܘܹܐ ܠܵܗ̇ ܥܝܵܕܵܐ ܐܸܠܝܼ،
ܒܗ̇ܝ ܕܢܛܝܼܪܝܼ ܦܘܼܩܵܕܘܼ̈ܟ݂.
ܚ
57 ܡܵܪܝܵܐ ܝܼܠܹܗ ܣܵܗܡܵܐ ܐܸܠܝܼ،
ܐܡܝܼܪܝܼ ܕܒܸܬ ܢܵܛܪܹܢ ܗܹܡܸܙܡܵܢܘܼ̈ܟ݂.
58 ܦܘܼܪܦܸܠܔ ܠܝܼ ܒܝܼܘܼܟ݂ ܒܟܠܹܗ ܠܸܒܝܼ،
ܗܘܝܼ ܚܲܢܵܢܵܐ ܐܸܠܝܼ ܐܲܝܟ݂ ܩܵܘܠܘܼܟ݂.
59 ܬܘܼܚܡܸܢܝܼ ܒܘܼܬ ܐܘܼܪ̈ܚܵܬܝܼ،
ܘܡܘܼܕܸܪܵܝ ܠܝܼ ܐܲܩܠܝܼ̈ ܠܣܵܗܕܘܵܬܘܼ̈ܟ݂.
60 ܡܘܼܠܝܸܙ ܠܝܼ ܘܠܵܐ ܥܘܼܪܩܸܠܔ ܠܝܼ،
ܠܸܢܛܵܪܵܐ ܦܘܼܩܕܵܢܘܼ̈ܟ݂.
61 ܚܲܒ݂ܠܹ̈ܐ ܕܪ̈ܲܫܝܼܥܹܐ ܩܵܡ ܚܲܪܕܝܼ ܠܝܼ،
ܐܝܼܢܵܐ ܢܵܡܘܿܣܘܼܟ݂ ܠܵܐ ܡܘܼܢܫܹܐ ܠܝܼ.
62 ܒܦܲܠܓܵܐ ܕܠܲܝܠܹܐ ܒܸܬ ܩܵܝܡܹܢ ܠܫܲܟܘܼܪܘܼܟ݂
ܒܘܼܬ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.
63 ܚܲܒ݂ܪܵܐ ܝܘܸܢ ܐܵܢܵܐ ܠܟܠܵܝܗܝ ܙܕܝܼܥܘܼ̈ܟ݂،
ܘܠܢܵܛܪ̈ܵܢܹܐ ܕܦܘܼܩܵܕܘܼ̈ܟ݂.
64 ܛܲܝܒܘܼܬܘܼܟ݂، ܝܵܐ ܡܵܪܝܵܐ، ܡܠܹܐ ܠܵܗ̇ ܠܐܲܪܥܵܐ،
ܡܲܠܸܦ ܠܝܼ ܩܵܢܘܿܢܘܼ̈ܟ݂.
ܛ
65 ܛܵܒ݂ܬܵܐ ܥܒ݂ܝܼܕܵܐ ܝܘܸܬ ܥܲܡ ܪܹܓܘܼܟ݂،
ܝܵܐ ܡܵܪܝܵܐ، ܐܲܝܟ݂ ܚܲܒܪܘܼܟ݂.
66 ܦܲܪܡܲܝܬܵܐ ܨܦܵܝܝܼ ܘܝܕܵܥܬܵܐ ܡܲܠܸܦ ܠܝܼ،
ܒܗ̇ܝ ܕܒܦܘܼܩܕܵܢܘܼ̈ܟ݂ ܗܘܼܡܸܢܝܼ.
67 ܡ̣ܢ ܩܲܕܡ ܕܦܵܝܫܹܢ ܗܘܵܐ ܡܘܼܠܝܸܨܵܐ ܒܸܚܠܵܛܵܐ ܝܘܸܢ ܗܘܵܐ،
ܐܝܼܢܵܐ ܐܵܕܝܼܵܐ ܗܹܡܸܙܡܵܢܘܼ̈ܟ݂ ܒܸܢܛܵܪܵܝ ܝܘܸܢ.
68 ܛܵܒ݂ܵܐ ܝܘܸܬ ܐܲܢ݇ܬ ܘܥܵܒ݂ܕܵܢܵܐ ܕܛܵܒ݂ܬܵܐ،
ܡܲܠܸܦ ܠܝܼ ܩܵܢܘܿܢܘܼ̈ܟ݂.
69 ܗܘܼܡܙܸܡ ܠܗܘܿܢ ܒܘܼܚܬܵܢ ܥܲܠܝܼ ܚܵܬܪ̈ܵܢܹܐ،
ܐܝܼܢܵܐ ܐܵܢܵܐ ܒܟܠܹܗ ܠܸܒܝܼ ܒܸܬ ܢܵܛܪܹܢ ܦܘܼܩܵܕܘܼ̈ܟ݂.
70 ܛܪܝܼܨ ܠܹܗ ܐܲܝܟ݂ ܬܲܪܒܵܐ ܠܸܒܵܝܗܝ،
ܐܝܼܢܵܐ ܐܵܢܵܐ ܒܢܵܡܘܿܣܘܼܟ݂ ܒܣܝܼܡ ܠܵܗ̇ ܠܝܼ.
71 ܨܦܵܝܝܼ ܝܠܵܗ̇ ܩܵܬܝܼ ܕܦܝܼܫ ܠܝܼ ܡܘܼܠܝܸܨܵܐ،
ܩܵܐ ܕܝܵܠܦܹܢ ܩܵܢܘܿܢܘܼ̈ܟ݂.
72 ܒܘܼܫ ܨܦܵܝܝܼ ܝܠܹܗ ܩܵܬܝܼ ܢܵܡܘܿܣܵܐ ܕܦܘܼܡܘܼܟ݂،
ܡ̣ܢ ܐܲܠܦܹ̈ܐ ܕܕܲܗܒ݂ܵܐ ܘܕܣܹܐܡܵܐ.
ܝ
73 ܐܝܼܕܵܬܘܼ̈ܟ݂ ܥܒ݂ܝܼܕ ܠܗܘܿܢ ܘܬܘܼܪܸܨ ܠܗܘܿܢ ܐܸܠܝܼ،
ܡܲܦܪܸܡ ܠܝܼ ܘܒܸܬ ܝܵܠܦܹܢ ܦܘܼܩܕܵܢܘܼ̈ܟ݂.
74 ܙܕܝܼܥܘܼ̈ܟ݂ ܒܸܬ ܚܵܙܝܼ ܠܝܼ ܘܒܸܬ ܚܵܕܝܼ،
ܒܗ̇ܝ ܕܒܚܲܒܪܘܼܟ݂ ܣܒܝܼܪܝܼ.
75 ܟܹܐ ܝܵܕܥܹܢ، ܝܵܐ ܡܵܪܝܵܐ، ܕܙܲܕܝܼܩܘܼܬܵܐ ܝܢܵܐ ܕܝܼܘܵܢܘܼ̈ܟ݂،
ܘܒܡܗܘܼܡܢܘܼܬܘܼܟ݂ ܩܵܡ ܡܲܡܟܸܟܸܬ ܠܝܼ.
76 ܦܲܪܦܘܼܠܹܐ ܝܘܸܢ، ܗܵܘܝܵܐ ܛܲܝܒܘܼܬܘܼܟ݂ ܠܝܼܵܗܒ݂ܝܼ ܠܸܒܵܐ،
ܐܲܝܟ݂ ܗܹܡܸܙܡܵܢܘܼܟ݂ ܠܪܹܓܘܼܟ݂.
77 ܐܵܬܝܼ ܥܲܠܝܼ ܪ̈ܲܚܡܘܼܟ݂ ܕܚܵܝܹܝܢ،
ܒܗ̇ܝ ܕܢܵܡܘܿܣܘܼܟ݂ ܒܲܣܝܼܡܘܼܬܵܐ ܝܠܹܗ ܐܸܠܝܼ.
78 ܢܵܟ݂ܦܝܼ ܚܵܬܪ̈ܵܢܹܐ ܣܵܒܵܒ ܒܒܘܼܚܬܵܢ ܩܵܡ ܙܵܠܡܝܼ ܐܸܠܝܼ،
ܐܵܢܵܐ ܒܸܬ ܗܲܓܹܝܢ ܦܘܼܩܵܕܘܼ̈ܟ݂.
79 ܦܵܬܠܝܼ ܠܟܸܣܠܝܼ ܙܕܝܼܥܘܼ̈ܟ݂،
ܘܝܵܕܥܵܢܹ̈ܐ ܕܣܵܗܕܘܵܬܘܼ̈ܟ݂.
80 ܗܵܘܹܐ ܠܸܒܝܼ ܬܲܡܝܼܡܵܐ ܒܩܵܢܘܿܢܘܼ̈ܟ݂،
ܩܵܐ ܕܠܵܐ ܢܵܟ݂ܦܹܢ.
ܟ
81 ܢܘܝܼܠܔ ܠܵܗ̇ ܓܵܢܝܼ ܩܵܐ ܦܘܼܪܩܵܢܘܼܟ݂،
ܠܚܲܒܪܘܼܟ݂ ܣܦܝܼܪܝܼ.
82 ܚܒܹܐ ܠܗܘܿܢ ܥܲܝܢܝܼ̈ ܒܸܣܦܵܪܵܐ ܠܗܹܡܸܙܡܵܢܘܼܟ݂،
ܟܲܕ ܒܹܐܡܵܪܵܐ ܝܘܸܢ: ”ܐܝܼܡܲܢ ܒܸܬ ܝܵܗܒܹܬ ܠܝܼ ܠܸܒܵܐ؟“
83 ܣܵܒܵܒ ܗܘܹܐ ܠܝܼ ܐܲܝܟ݂ ܡܙܝܼܕܵܐ ܓܵܘ ܬܸܢܵܐ،
ܐܝܼܢܵܐ ܩܵܢܘܿܢܘܼ̈ܟ݂ ܠܵܐ ܡܘܼܢܫܹܐ ܠܝܼ.
84 ܟܡܵܐ ܝܼܢܵܐ ܝܵܘܡܵܢܹ̈ܐ ܕܪܹܓܘܼܟ݂؟
ܐܝܼܡܲܢ ܒܸܬ ܥܵܒ݂ܕܹܬ ܕܝܼܘܵܢ ܥܲܠܔ ܢܵܦܠܵܢܹ̈ܐ ܒܵܬܪܝܼ؟
85 ܚܦܝܼܪܗܘܿܢ ܚܵܬܪ̈ܵܢܹܐ ܓܘܼܒܹ̈ܐ ܩܵܬܝܼ،
ܕܠܹܐ ܝܠܵܗ̇ ܡ̣ܢ ܢܵܡܘܿܣܘܼܟ݂.
86 ܟܠܵܝܗܝ ܦܘܼܩܕܵܢܘܼ̈ܟ݂ ܡܗܘܼܡܢܹ̈ܐ ܝܢܵܐ،
ܒܠܵܐ ܥܸܠܬܵܐ ܢܦܝܼܠܔ ܠܗܘܿܢ ܒܵܬܪܝܼ؛ ܗܲܝܸܪܝܼ!
87 ܚܲܕܟ̰ܵܐ ܦܝܼܫ ܠܵܗ̇ ܕܬܵܝܡܝܼ ܗܘܵܘ ܠܝܼ ܒܐܲܪܥܵܐ،
ܐܝܼܢܵܐ ܐܵܢܵܐ ܠܵܐ ܫܒ݂ܝܼܩ ܠܝܼ ܦܘܼܩܵܕܘܼ̈ܟ݂.
88 ܐܲܝܟ݂ ܛܲܝܒܘܼܬܘܼܟ݂ ܡܲܚܝܼ ܠܝܼ،
ܕܢܵܛܪܹܢ ܣܵܗܕܘܵܬܹ̈ܐ ܕܦܘܼܡܘܼܟ݂.
ܠ
89 ܠܥܵܠܲܡ، ܝܵܐ ܡܵܪܝܵܐ،
ܚܲܒܪܘܼܟ݂ ܡܩܵܘܝܵܢܵܐ ܝܠܹܗ ܒܫܡܲܝܵܐ.
90 ܠܕܵܪܵܐ ܘܕܵܪܵܐ ܡܗܘܼܡܢܘܼܬܘܼܟ݂،
ܫܘܼܬܐܸܣܵܐ ܠܘܼܟ݂ ܐܲܪܥܵܐ ܘܒܸܟܠܵܝܵܐ ܝܠܵܗ̇.
91 ܒܕܝܼܘܵܢܘܼ̈ܟ݂ ܒܸܟܠܵܝܵܐ ܝܢܵܐ ܐܸܕܝܘܿܡ،
ܣܵܒܵܒ ܟܠܵܝܗܝ ܪܹ̈ܓܵܘܵܬܘܼܟ݂ ܝܼܢܵܐ.
92 ܐܸܢ ܠܵܐ ܗܵܘܹܐ ܗܘܵܐ ܢܵܡܘܿܣܘܼܟ݂ ܒܲܣܝܼܡܘܼܬܝܼ،
ܒܸܬ ܛܵܠܩܹܢ ܗܘܵܐ ܒܥܵܘܩܵܢܝܼ.
93 ܠܥܵܠܲܡ ܠܹܐ ܡܲܢܫܹܝܢ ܦܘܼܩܵܕܘܼ̈ܟ݂،
ܣܵܒܵܒ ܒܝܼܵܝܗܝ ܩܵܡ ܡܲܚܹܝܬ ܠܝܼ.
94 ܕܝܼܘܼܟ݂ ܝܼܘܸܢ ܐܵܢܵܐ، ܦܲܪܸܩ ܠܝܼ،
ܣܵܒܵܒ ܠܦܘܼܩܵܕܘܼ̈ܟ݂ ܛܥܹܐ ܠܝܼ.
95 ܣܦܝܼܪܗܘܿܢ ܐܸܠܝܼ ܪ̈ܲܫܝܼܥܹܐ ܠܛܲܠܘܼܩܝܼ،
ܐܝܼܢܵܐ ܣܵܗܕܘܵܬܘܼ̈ܟ݂ ܒܸܬ ܦܲܪܡܹܝܢ.
96 ܠܟܠܔ ܟܡܝܼܠܘܼܬܵܐ ܚܙܹܐ ܠܝܼ ܚܘܼܬܵܡܵܐ،
ܐܝܼܢܵܐ ܦܘܼܩܕܵܢܘܼܟ݂ ܪܘܝܼܚܵܐ ܝܠܹܗ ܪܵܒܵܐ.
ܡ
97 ܟܡܵܐ ܟܹܐ ܡܲܚܸܒܸܢ ܠܢܵܡܘܿܣܘܼܟ݂،
ܟܠܹܗ ܝܵܘܡܵܐ ܗ̇ܘ ܝܼܠܹܗ ܗܲܓܲܝܬܝܼ.
98 ܦܘܼܩܕܵܢܘܼ̈ܟ݂ ܩܵܡ ܥܵܒ݂ܕܝܼ ܠܝܼ ܒܘܼܫ ܚܲܟܝܼܡܵܐ ܡ̣ܢ ܕܸܫ̃ܡܸܢܝܼ̈،
ܣܵܒܵܒ ܠܟܸܣܠܝܼ ܝܢܵܐ ܗܲܠܔ ܥܵܠܲܡ.
99 ܗܘܹܐ ܠܝܼ ܒܘܼܫ ܚܲܟܝܼܡܵܐ ܡ̣ܢ ܟܠܵܝܗܝ ܡܲܠܦܵܢܝܼ̈،
ܣܵܒܵܒ ܣܵܗܕܘܵܬܘܼ̈ܟ݂ ܗܲܓܲܝܬܵܐ ܝܢܵܐ ܐܸܠܝܼ.
100 ܒܘܼܫ ܙܵܘܕܵܐ ܡ̣ܢ ܚܘܵܪ̈ܕܸܩܢܹܐ ܟܹܐ ܦܲܪܡܹܝܢ،
ܣܵܒܵܒ ܦܘܼܩܵܕܘܼ̈ܟ݂ ܢܛܝܼܪܵܝ ܠܝܼ.
101 ܡ̣ܢ ܟܠܔ ܐܘܼܪܚܵܐ ܒܝܼܫܬܵܐ ܡܘܼܟܠܹܐ ܠܝܼ ܐܲܩܠܝܼ̈،
ܩܵܐ ܕܢܵܛܪܹܢ ܚܲܒܪܘܼܟ݂.
102 ܡ̣ܢ ܕܝܼܘܵܢܘܼܟ݂ ܠܵܐ ܩܠܝܼܒ ܠܝܼ،
ܣܵܒܵܒ ܐܲܢ݇ܬ ܩܵܡ ܡܲܠܦܸܬ ܠܝܼ.
103 ܟܡܵܐ ܚܸܠܝܹ̈ܐ ܝܢܵܐ ܠܫܵܡܵܟܝܼ̈ ܗܹܡܸܙܡܵܢܘܼ̈ܟ݂،
ܒܘܼܫ ܚܸܠܝܹ̈ܐ ܡ̣ܢ ܕܸܒ݂ܫܵܐ ܠܦܘܼܡܝܼ.
104 ܡ̣ܢ ܦܘܼܩܵܕܘܼ̈ܟ݂ ܟܹܐ ܫܵܩܠܹܢ ܦܲܪܡܲܝܬܵܐ،
ܒܘܼܬ ܐܵܗܵܐ، ܣܢܹܐ ܠܝܼ ܟܠܔ ܐܘܼܪܚܵܐ ܕܕܘܼܓܠܵܐ.
ܢ
105 ܫܪܵܓ݂ܵܐ ܝܠܹܗ ܠܐܲܩܠܝܼ ܚܲܒܪܘܼܟ݂،
ܘܒܲܗܪܵܐ ܠܫܒ݂ܝܼܠܝܼ.
106 ܝܡܹܐ ܠܝܼ ܘܒܸܬ ܡܲܩܘܹܝܢ ܡܵܘܡܝܼܬܝܼ،
ܠܸܢܛܵܪܵܐ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.
107 ܦܝܼܫ ܠܝܼ ܡܘܼܠܝܸܨܵܐ ܟ̰ܸܡ ܪܵܒܵܐ،
ܝܵܐ ܡܵܪܝܵܐ، ܡܲܚܝܼ ܠܝܼ ܐܲܝܟ݂ ܚܲܒܪܘܼܟ݂.
108 ܩܲܒܸܠܔ ܠܗܘܿܢ ܩܘܼܪ̈ܒܵܢܹܐ ܕܨܸܒ݂ܝܵܢܵܐ ܡ̣ܢ ܦܘܼܡܝܼ، ܝܵܐ ܡܵܪܝܵܐ،
ܘܕܝܼܘܵܢܘܼ̈ܟ݂ ܡܲܠܸܦ ܠܝܼ.
109 ܓܵܢܝܼ ܒܩܹܘܲܢܕܹܢܘܿܣ ܝܠܵܗ̇ ܐܲܡܝܼܢܵܐܝܼܬ،
ܐܝܼܢܵܐ ܢܵܡܘܿܣܘܼܟ݂ ܠܵܐ ܡܘܼܢܫܹܐ ܠܝܼ.
110 ܡܘܼܬܸܒ݂ ܠܗܘܿܢ ܪ̈ܲܫܝܼܥܹܐ ܦܲܚܵܐ ܐܸܠܝܼ،
ܐܝܼܢܵܐ ܡ̣ܢ ܦܘܼܩܵܕܘܼ̈ܟ݂ ܠܵܐ ܚܠܝܼܛ ܠܝܼ.
111 ܗܘܹܐ ܠܗܘܿܢ ܝܵܪܬܘܼܬܵܐ ܐܸܠܝܼ ܣܵܗܕܘܵܬܘܼ̈ܟ݂ ܠܥܵܠܲܡ،
ܣܵܒܵܒ ܦܨܝܼܚܘܼܬܵܐ ܕܠܸܒܝܼ ܝܢܵܐ.
112 ܡܘܼܬܸܒ݂ ܠܝܼ ܠܸܒܝܼ ܠܸܥܒ݂ܵܕܵܐ ܩܵܢܘܿܢܘܼ̈ܟ݂،
ܠܥܵܠܲܡ، ܗܲܠܔ ܚܲܪܬܵܐ.
ܣ
113 ܠܦܠܝܼܥܵܐ ܒܪܸܥܝܵܢܵܐ ܟܹܐ ܣܵܢܹܝܢ،
ܐܝܼܢܵܐ ܠܢܵܡܘܿܣܘܼܟ݂ ܟܹܐ ܡܲܚܸܒܸܢ.
114 ܣܸܬܵܪܝܼ ܘܡܵܛܵܠܝܼ ܐܲܢ݇ܬ ܝܼܘܸܬ،
ܠܚܲܒܪܘܼܟ݂ ܟܹܐ ܣܵܦܪܹܢ.
115 ܪܚܘܿܩܘܼܢ ܡܸܢܝܼ، ܝܵܐ ܒܝܼܫܹ̈ܐ،
ܕܢܵܛܪܹܢ ܦܘܼܩܕܵܢܹ̈ܐ ܕܐܲܠܵܗܝܼ.
116 ܣܢܘܿܕ ܠܝܼ ܐܲܝܟ݂ ܗܹܡܸܙܡܵܢܘܼܟ݂ ܩܵܐ ܕܚܵܝܹܝܢ،
ܘܠܵܐ ܫܵܒ݂ܩܹܬ ܢܵܟ݂ܦܹܢ ܡ̣ܢ ܣܲܒ݂ܪܵܐ ܕܐܝܼܬ ܠܝܼ.
117 ܣܢܘܿܕ ܠܝܼ ܩܵܐ ܕܦܵܝܫܹܢ ܦܘܼܪܩܵܐ،
ܘܒܸܬ ܚܵܝܪܹܢ ܒܩܵܢܘܿܢܘܼ̈ܟ݂ ܐܲܡܝܼܢܵܐܝܼܬ.
118 ܡܘܼܣܠܹܐ ܠܘܼܟ݂ ܠܟܠܵܝܗܝ ܚܵܠܛܵܢܹ̈ܐ ܡ̣ܢ ܩܵܢܘܿܢܘܼ̈ܟ݂،
ܣܵܒܵܒ ܣܪܝܼܩܵܐ ܝܠܹܗ ܦܸܠܡܵܝܗܝ.
119 ܐܲܝܟ݂ ܚܸܠܬ ܕܣܹܐܡܵܐ ܪܘܼܦܝܵܝ ܠܘܼܟ݂ ܟܠܵܝܗܝ ܪ̈ܲܫܝܼܥܹܐ ܕܐܲܪܥܵܐ،
ܒܘܼܬ ܐܵܗܵܐ، ܟܹܐ ܡܲܚܸܒܸܢ ܠܟܠܵܝܗܝ ܣܵܗܕܘܵܬܘܼ̈ܟ݂.
120 ܪܘܼܬܪܸܬ ܠܹܗ ܒܸܣܪܝܼ ܒܥܸܠܬܵܐ ܕܣܘܼܪܵܕܘܼܟ݂،
ܘܡ̣ܢ ܕܝܼܘܵܢܘܼ̈ܟ݂ ܟܹܐ ܙܵܕܥܹܢ.
ܥ
121 ܥܒ݂ܝܼܕ ܠܝܼ ܕܝܼܘܵܢ ܘܙܲܕܝܼܩܘܼܬܵܐ،
ܠܵܐ ܫܵܒ݂ܩܹܬ ܠܝܼ ܒܐܝܼܕܵܐ ܕܙܵܠܡܵܢܝܼ̈.
122 ܗܘܝܼ ܥܲܪܵܒ݂ܵܐ ܕܪܹܓܘܼܟ݂ ܠܛܵܒ݂ܬܵܐ،
ܠܵܐ ܫܵܒ݂ܩܹܬ ܙܵܠܡܝܼ ܐܸܠܝܼ ܚܵܬܪ̈ܵܢܹܐ.
123 ܥܲܝܢܝܼ̈ ܚܒܹܐ ܠܗܘܿܢ ܒܸܣܦܵܪܵܐ ܠܦܘܼܪܩܵܢܘܼܟ݂،
ܘܠܗܹܡܸܙܡܵܢ ܕܙܲܕܝܼܩܘܼܬܘܼܟ݂.
124 ܥܒ݂ܘܿܕ ܥܲܡ ܪܹܓܘܼܟ݂ ܐܲܝܟ݂ ܛܲܝܒܘܼܬܘܼܟ݂،
ܘܩܵܢܘܿܢܘܼ̈ܟ݂ ܡܲܠܸܦ ܐܸܠܝܼ.
125 ܥܲܒ݂ܕܘܼܟ݂ ܝܼܘܸܢ ܐܵܢܵܐ، ܡܲܦܪܸܡ ܠܝܼ
ܕܝܵܕܥܹܢ ܣܵܗܕܘܵܬܘܼ̈ܟ݂.
126 ܥܕܵܢܵܐ ܝܠܵܗ̇ ܕܥܵܒܹܕ ܚܲܕ ܡܸܢܕܝܼ ܡܵܪܝܵܐ،
ܒܗ̇ܝ ܕܒܘܼܛܸܠܔ ܠܗܘܿܢ ܢܵܡܘܿܣܘܼܟ݂.
127 ܒܘܼܬ ܐܵܗܵܐ، ܟܹܐ ܡܲܚܸܒܸܢ ܦܘܼܩܕܵܢܘܼ̈ܟ݂،
ܒܘܼܫ ܡ̣ܢ ܕܲܗܒ݂ܵܐ، ܘܡ̣ܢ ܕܲܗܒ݂ܵܐ ܨܸܦܝܵܐ.
128 ܒܘܼܬ ܐܵܗܵܐ، ܟܠܵܝܗܝ ܦܘܼܩܵܕܹ̈ܐ ܟܹܐ ܢܵܛܪܹܢ ܬܪܘܼܨܵܐܝܼܬ،
ܟܠܵܗ̇ ܐܘܼܪܚܵܐ ܕܕܘܼܓܠܵܐ ܣܢܹܐ ܠܝܼ.
ܦ
129 ܥܓ̰ܝܼܒܹ̈ܐ ܝܢܵܐ ܣܵܗܕܘܵܬܘܼ̈ܟ݂،
ܒܘܼܬ ܐܵܗܵܐ ܢܛܝܼܪܵܝ ܠܵܗ̇ ܓܵܢܝܼ.
130 ܦܬܵܚܬܵܐ ܕܚܲܒܪܘܼܟ݂ ܟܹܐ ܒܲܗܪܸܢܵܐ،
ܟܹܐ ܡܲܦܪܸܡܵܐ ܠܗܘܿܢ ܦܫܝܼ̈ܛܹܐ.
131 ܦܘܼܡܝܼ ܦܬܝܼܚ ܠܝܼ ܘܡܘܼܠܗܸܕ ܠܝܼ،
ܣܵܒܵܒ ܠܦܘܼܩܕܵܢܘܼ̈ܟ݂ ܪܘܼܚܪܸܚ ܠܝܼ.
132 ܕܘܼܪ ܠܟܸܣܠܝܼ ܘܪܲܚܸܡ ܥܲܠܝܼ،
ܐܲܝܟ݂ ܕܝܼܘܵܢܘܼܟ݂ ܠܡܲܚܸܒܵܢܹ̈ܐ ܕܫܸܡܘܼܟ݂.
133 ܡܲܩܘܝܼ ܦܵܣܘܿܥܝܵܬܝܼ̈ ܒܗܹܡܸܙܡܵܢܘܼܟ݂،
ܘܠܵܐ ܫܵܒ݂ܩܹܬ ܗܲܟܸܡ ܥܲܠܝܼ ܟܠܔ ܥܵܘܠܵܐ.
134 ܦܲܪܸܩ ܠܝܼ ܡ̣ܢ ܙܠܘܼܡܝܵܐ ܕܒܲܪܢܵܫܵܐ،
ܩܵܐ ܕܢܵܛܪܹܢ ܦܘܼܩܵܕܘܼ̈ܟ݂.
135 ܒܲܗܪܸܢ ܦܵܬܘܼܟ݂ ܥܲܠܔ ܪܹܓܘܼܟ݂،
ܘܡܲܠܸܦ ܠܝܼ ܩܵܢܘܿܢܘܼ̈ܟ݂.
136 ܫܵܩ̈ܝܼܵܬܹܐ ܕܡ̈ܝܼܵܐ ܓ̰ܪܹܐ ܠܗܘܿܢ ܡ̣ܢ ܥܲܝܢܝܼ̈،
ܣܵܒܵܒ ܠܵܐ ܢܛܝܼܪܗܘܿܢ ܢܵܡܘܿܣܘܼܟ݂.
ܨ
137 ܙܲܕܝܼܩܵܐ ܝܘܸܬ ܐܲܢ݇ܬ، ܝܵܐ ܡܵܪܝܵܐ،
ܘܬܪ̈ܘܼܨܹܐ ܝܢܵܐ ܕܝܼܘܵܢܘܼ̈ܟ݂.
138 ܦܩܝܼܕܵܝ ܠܘܼܟ݂ ܣܵܗܕܘܵܬܘܼ̈ܟ݂ ܒܙܲܕܝܼܩܘܼܬܵܐ،
ܘܒܟܠܔ ܡܗܘܼܡܢܘܼܬܵܐ.
139 ܩܵܡ ܐܵܟܹܠܔ ܠܝܼ ܛܢܵܢܝܼ،
ܣܵܒܵܒ ܡܘܼܢܫܹܐ ܠܗܘܿܢ ܚܲܒܪ̈ܵܢܘܼܟ݂ ܕܸܫ̃ܡܸܢܝܼ̈.
140 ܨܘܼܪܸܦܬܵܐ ܝܠܵܗ̇ ܗܹܡܸܙܡܵܢܘܼܟ݂ ܪܵܒܵܐ،
ܘܪܹܓܘܼܟ݂ ܟܹܐ ܡܲܚܸܒ ܠܵܗ̇.
141 ܙܥܘܿܪܵܐ ܝܘܸܢ ܐܵܢܵܐ ܘܡܘܼܣܠܝܼܵܐ،
ܐܝܼܢܵܐ ܦܘܼܩܵܕܘܼ̈ܟ݂ ܠܵܐ ܢܸܫܝܵܝ ܠܝܼ.
142 ܙܲܕܝܼܩܘܼܬܘܼܟ݂ ܙܲܕܝܼܩܘܼܬܵܐ ܝܠܵܗ̇ ܠܥܵܠܲܡ،
ܘܢܵܡܘܿܣܘܼܟ݂ ܫܪܵܪܵܐ ܝܠܹܗ.
143 ܥܵܘܩܵܢܵܐ ܘܐܘܼܠܨܵܢܵܐ ܩܵܡ ܡܲܫ݇ܟ̰ܚܝܼ ܠܝܼ،
ܐܝܼܢܵܐ ܒܲܣܝܼܡܘܼܬܝܼ ܝܢܵܐ ܦܘܼܩܕܵܢܘܼ̈ܟ݂.
144 ܙܲܕܝܼܩܘܼܬܵܐ ܝܢܵܐ ܣܵܗܕܘܵܬܘܼ̈ܟ݂ ܠܥܵܠܲܡ،
ܗܲܒ݂ܠܔ ܠܝܼ ܦܲܪܡܲܝܬܵܐ ܕܚܵܝܹܝܢ.
ܩ
145 ܩܪܹܐ ܠܝܼ ܒܟܠܹܗ ܠܸܒܵܐ؛ ܓ̰ܲܘܸܒ ܠܝܼ، ܝܵܐ ܡܵܪܝܵܐ،
ܘܩܵܢܘܿܢܘܼ̈ܟ݂ ܒܸܬ ܢܵܛܪܹܢ.
146 ܩܪܹܐ ܠܝܼ ܐܸܠܘܼܟ݂، ܦܲܪܸܩ ܠܝܼ،
ܘܒܸܬ ܢܵܛܪܹܢ ܣܵܗܕܘܵܬܘܼ̈ܟ݂.
147 ܩܕܝܼܡ ܠܝܼ ܓ̰ܲܠܕܹܐ ܒܨܲܦܪܵܐ ܘܓܥܹܐ ܠܝܼ،
ܠܚܲܒܪܘܼܟ݂ ܣܦܝܼܪܝܼ.
148 ܦܬܝܼܚܹܐ ܝܢܵܐ ܥܲܝܢܝܼ̈ ܒܒܲܕ̈ܠܹܐ ܕܠܲܝܠܹܐ،
ܠܗܲܓܘܼܝܹܐ ܗܹܡܸܙܡܵܢܘܼܟ݂.
149 ܫܡܹܥ ܩܵܠܝܼ ܐܲܝܟ݂ ܛܲܝܒܘܼܬܘܼܟ݂،
ܝܵܐ ܡܵܪܝܵܐ، ܐܲܝܟ݂ ܕܝܼܘܵܢܘܼܟ݂ ܡܲܚܝܼ ܠܝܼ.
150 ܩܘܼܪܒܸܢܗܘܿܢ ܐܸܠܝܼ ܢܵܦܠܵܢܹ̈ܐ ܕܒܵܬܪ ܒܝܼܫܬܵܐ،
ܪܚܝܼܩ ܠܗܘܿܢ ܡ̣ܢ ܢܵܡܘܿܣܘܼܟ݂.
151 ܩܘܼܪܒܵܐ ܝܘܸܬ ܐܲܢ݇ܬ، ܝܵܐ ܡܵܪܝܵܐ،
ܘܫܪܵܪܵܐ ܝܢܵܐ ܟܠܵܝܗܝ ܦܘܼܩܕܵܢܘܼ̈ܟ݂.
152 ܡ̣ܢ ܓ̰ܲܠܕܹܐ ܝܕܝܼܥ ܠܝܼ ܡ̣ܢ ܣܵܗܕܘܵܬܘܼ̈ܟ݂،
ܕܠܥܵܠܲܡ ܫܘܼܬܐܸܣܵܝ ܝܘܸܬ.
ܪ
153 ܚܙܝܼ ܐܘܼܠܨܵܢܝܼ ܘܦܲܨܝܼ ܠܝܼ،
ܣܵܒܵܒ ܢܵܡܘܿܣܘܼܟ݂ ܠܵܐ ܡܘܼܢܫܹܐ ܠܝܼ.
154 ܥܒ݂ܘܿܕ ܕܝܼܘܵܢܝܼ ܘܦܲܪܸܩ ܠܝܼ،
ܐܲܝܟ݂ ܗܹܡܸܙܡܵܢܘܼܟ݂ ܡܲܚܝܼ ܠܝܼ.
155 ܪܸܚܩܵܐ ܝܠܹܗ ܦܘܼܪܩܵܢܵܐ ܡ̣ܢ ܪ̈ܲܫܝܼܥܹܐ،
ܣܵܒܵܒ ܠܩܵܢܘܿܢܘܼ̈ܟ݂ ܠܵܐ ܛܥܹܐ ܠܗܘܿܢ.
156 ܪܵܒܵܐ ܝܢܵܐ ܪ̈ܲܚܡܘܼܟ݂، ܝܵܐ ܡܵܪܝܵܐ،
ܐܲܝܟ݂ ܕܝܼܘܵܢܘܼ̈ܟ݂ ܡܲܚܝܼ ܠܝܼ.
157 ܪܵܒܵܐ ܝܢܵܐ ܪ̈ܵܕܘܿܦܝܼ ܘܕܸܫ̃ܡܸܢܝܼ̈،
ܐܝܼܢܵܐ ܡ̣ܢ ܣܵܗܕܘܵܬܘܼ̈ܟ݂ ܠܵܐ ܩܠܝܼܒ ܠܝܼ.
158 ܚܙܹܐ ܠܝܼ ܚܵܝܝܼܢܹ̈ܐ ܘܓܘܼܢܓܸܙ ܠܝܼ،
ܣܵܒܵܒ ܗܹܡܸܙܡܵܢܘܼ̈ܟ݂ ܠܵܐ ܢܛܝܼܪܗܘܿܢ.
159 ܚܙܝܼ ܕܵܐܟ݂ܝܼ ܦܘܼܩܵܕܘܼ̈ܟ݂ ܟܹܐ ܡܲܚܸܒܸܢ،
ܝܵܐ ܡܵܪܝܵܐ، ܐܲܝܟ݂ ܛܲܝܒܘܼܬܘܼܟ݂ ܡܲܚܝܼ ܠܝܼ.
160 ܐܝܼܬܘܼܬܵܐ ܕܚܲܒܪܘܼܟ݂ ܫܲܪܝܼܪܘܼܬܵܐ ܝܠܵܗ̇،
ܘܠܥܵܠܲܡ ܝܼܢܵܐ ܟܠܵܝܗܝ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.
ܫ
161 ܓܘܼܪ̈ܵܢܹܐ ܢܦܝܼܠܔ ܠܗܘܿܢ ܒܵܬܪܝܼ ܒܠܵܐ ܥܸܠܬܵܐ،
ܐܝܼܢܵܐ ܡ̣ܢ ܚܲܒܪ̈ܘܼܟ݂ ܟܹܐ ܙܵܕܹܥ ܠܸܒܝܼ.
162 ܒܸܦܨܵܚܵܐ ܝܘܸܢ ܐܵܢܵܐ ܥܲܠܔ ܗܹܡܸܙܡܵܢܘܼܟ݂،
ܐܲܝܟ݂ ܗ̇ܘ ܕܡܲܫ݇ܟ̰ܸܚ ܣܠܵܒܬܵܐ ܪܵܒܵܐ.
163 ܟܹܐ ܣܵܢܹܝܢ ܠܕܘܼܓܠܵܐ ܘܟܹܐ ܓܲܢܓܸܙܸܢ ܡܸܢܹܗ،
ܐܝܼܢܵܐ ܢܵܡܘܿܣܘܼܟ݂ ܟܹܐ ܡܲܚܸܒܸܢ.
164 ܫܒܲܥ ܓܵܗܹ̈ܐ ܒܝܵܘܡܵܐ ܟܹܐ ܫܲܒܚܸܢܘܼܟ݂،
ܒܘܼܬ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.
165 ܫܠܵܡܵܐ ܪܵܒܵܐ ܐܝܼܬ ܠܡܲܚܸܒܵܢܹ̈ܐ ܕܢܵܡܘܿܣܘܼܟ݂،
ܘܠܲܝܬ ܐܸܠܵܝܗܝ ܬܘܼܪܩܵܠܵܐ.
166 ܣܒܝܼܪܝܼ ܒܦܘܼܪܩܵܢܘܼܟ݂، ܝܵܐ ܡܵܪܝܵܐ،
ܘܦܘܼܩܕܵܢܘܼ̈ܟ݂ ܥܒ݂ܝܼܕ ܠܝܼ.
167 ܢܛܝܼܪܵܗ̇ ܓܵܢܝܼ ܣܵܗܕܘܵܬܘܼ̈ܟ݂،
ܘܟܹܐ ܡܲܚܸܒܸܢܗܘܿܢ ܪܵܒܵܐ.
168 ܢܛܝܼܪܝܼ ܦܘܼܩܵܕܘܼ̈ܟ݂ ܘܣܵܗܕܘܵܬܘܼ̈ܟ݂،
ܣܵܒܵܒ ܟܠܵܝܗܝ ܐܘܼܪ̈ܚܵܬܝܼ ܩܲܕܡ ܥܲܝ̈ܢܘܼܟ݂ ܝܼܢܵܐ.
ܬ
169 ܩܲܪܒܸܢܵܐ ܡܲܩܘܲܚܬܝܼ ܠܟܸܣܠܘܼܟ݂، ܝܵܐ ܡܵܪܝܵܐ،
ܐܲܝܟ݂ ܚܲܒܪܘܼܟ݂ ܡܲܦܪܸܡ ܠܝܼ.
170 ܥܵܒ݂ܪܵܐ ܩܲܕܡܘܼܟ݂ ܦܲܪܦܲܠܬܝܼ،
ܐܲܝܟ݂ ܗܹܡܸܙܡܵܢܘܼܟ݂ ܦܲܨܝܼ ܠܝܼ.
171 ܡܲܢܒܸܥܝܼ ܣܸܦܘܵܬܝܼ̈ ܬܸܫܒܘܿܚܬܵܐ،
ܣܵܒܵܒ ܟܹܐ ܡܲܠܦܸܬ ܠܝܼ ܩܵܢܘܿܢܘܼ̈ܟ݂.
172 ܙܵܡܹܪ ܠܸܫܵܢܝܼ ܗܹܡܸܙܡܵܢܘܼܟ݂،
ܣܵܒܵܒ ܟܠܵܝܗܝ ܦܘܼܩܕܵܢܘܼ̈ܟ݂ ܙܲܕܝܼܩܘܼܬܵܐ ܝܢܵܐ.
173 ܗܵܘܝܵܐ ܐܝܼܕܘܼܟ݂ ܠܗܲܝܘܼܪܝܼ،
ܣܵܒܵܒ ܦܘܼܩܵܕܘܼ̈ܟ݂ ܓܘܼܒܹܐ ܠܝܼ.
174 ܪܘܼܚܪܸܚ ܠܝܼ ܠܦܘܼܪܩܵܢܘܼܟ݂، ܝܵܐ ܡܵܪܝܵܐ،
ܘܢܵܡܘܿܣܘܼܟ݂ ܒܘܼܣܵܡܝܼ ܝܠܹܗ.
175 ܚܵܝܵܐ ܓܵܢܝܼ ܘܫܲܒܚܵܐ ܐܸܠܘܼܟ݂،
ܘܕܝܼܘܵܢܘܼ̈ܟ݂ ܗܲܝܸܪܝܼ ܠܝܼ.
176 ܚܠܝܼܛ ܠܝܼ ܐܲܝܟ݂ ܥܸܪܒܵܐ ܛܠܝܼܩܵܐ؛ ܛܥܝܼ ܒܵܬܪ ܪܹܓܘܼܟ݂،
ܣܵܒܵܒ ܦܘܼܩܕܵܢܘܼ̈ܟ݂ ܠܵܐ ܡܘܼܢܫܹܐ ܠܝܼ.