ܡܙܡܘܪ̈ܐ.
30.
ܒܸܬ ܡܲܪܡܸܢ ܐܸܠܘܼܟ݂، ܝܵܐ ܡܵܪܝܵܐ، ܒܗ̇ܝ ܕܓܪܝܼܫܸܢܘܼܟ݂ ܡ̣ܢ ܓܘܼܒܵܐ، ܘܠܵܐ ܡܘܼܚܕܹܐ ܠܘܼܟ݂ ܠܕܸܫ̃ܡܸܢܝܼ̈ ܒܝܼܝܼ. 
ܝܵܐ ܡܵܪܝܵܐ ܐܲܠܵܗ‌ܝܼ، ܡܘܼܩܘܸܚ ܠܝܼ ܐܸܠܘܼܟ݂ ܘܩܵܡ ܒܲܣܡܸܬ ܠܝܼ. 
ܝܵܐ ܡܵܪܝܵܐ، ܡܘܼܐܣܸܩ ܠܘܼܟ݂ ܠܓܵܢܝܼ ܡ̣ܢ ܫܝܘܿܠܔ، ܡܘܼܚܹܐ ܠܘܼܟ݂ ܐܸܠܝܼ ܡܓܵܘ ܨܵܠܝܵܢܹ̈ܐ ܕܓܘܼܒܵܐ. 
ܙܡܘܿܪܘܼܢ ܠܡܵܪܝܵܐ، ܝܵܐ ܟܫܝܼܛܘܼ̈ܗ‌ܝ، ܘܫܲܟܪܘܼܢ ܠܕܟ݂ܵܪܵܐ ܕܩܘܼܕܫܹܗ. 
ܒܗ̇ܝ ܕܩܵܐ ܚܕܵܐ ܛܲܪܦܲܛܬܵ‌ܐ ܝܠܵܗ̇ ܚܸܡܬܹܗ، ܐܝܼܢܵܐ ܩܵܐ ܡܸܬܚܵܐ ܕܚܲܝܘܼܬܵ‌ܐ ܝܠܹܗ ܒܘܼܣܵܡܹܗ، ܒܪܲܡܫܵܐ ܟܹܐ ܥܲܪܩܸܠܔ ܒܸܟ݂ܝܵܐ، ܐܝܼܢܵܐ ܒܨܲܦܪܵܐ ܟܹܐ ܐܵܬܝܵܐ ܫܲܒܲܚܬܵ‌ܐ. 
ܘܐܵܢܵܐ ܐܡܝܼܪܝܼ ܒܫܸܠܝܘܼܬ‌ܝܼ: ”ܠܹܐ ܫܵܥܫܹܢ ܠܥܵܠܲܡ.“ 
ܝܵܐ ܡܵܪܝܵܐ، ܒܨܸܒ݂ܝܵܢܘܼܟ݂ ܡܘܼܥܒܸܕ ܠܘܼܟ݂ ܛܘܼܪܝܼ ܕܟܵܠܹܐ ܚܲܝܠܵܢܵܐ، ܐܝܼܢܵܐ ܛܘܼܫܹܐ ܠܘܼܟ݂ ܦܵܬܘܼܟ݂ ܘܦܝܼܫ ܠܝܼ ܫܥܝܼܫܵܐ. 
ܐܸܠܘܼܟ݂، ܝܵܐ ܡܵܪܝܵܐ، ܩܪܹܐ ܠܝܼ، ܘܒܡܵܪܝܵܐ ܢܘܼܢܹܐ ܠܝܼ: 
”ܡܘܼܕܝܼ ܝܘܼܬܪܵܢܵܐ ܐܝܼܬ ܒܡܵܘܬ‌ܝܼ ܟܲܕ ܨܵܠܹܝܢ ܓܵܘ ܓܘܼܒܵܐ؟ ܗܵܐ، ܒܸܬ ܫܲܟܸܪܘܼܟ݂ ܥܲܦܪܵܐ؟ ܗܵܐ، ܒܸܬ ܡܲܕܸܥ ܫܲܪܝܼܪܘܼܬܘܼܟ݂؟ 
”ܫܡܹܥ، ܝܵܐ ܡܵܪܝܵܐ، ܘܪܲܚܸܡ ܥܲܠܝܼ، ܝܵܐ ܡܵܪܝܵܐ، ܗܘܝܼ ܗܲܝܸܪܵܢܵܐ ܐܸܠܝܼ.“ 
ܡܘܼܚܕܸܪܘܼܟ݂ ܐܸܒ݂ܠܝܼ ܠܪܸܩܕܵܐ، ܫܘܼܠܸܚ ܠܘܼܟ݂ ܣܲܩܝܼ ܘܩܵܡ ܡܲܠܒܸܫܸܬ ܠܝܼ ܚܲܕܘܼܬܵ‌ܐ، 
ܩܵܐ ܕܙܵܡܪܵܐ ܐܸܠܘܼܟ݂ ܓܵܢܝܼ ܘܠܵܐ ܫܵܬܩܵܐ، ܝܵܐ ܡܵܪܝܵܐ ܐܲܠܵܗ‌ܝܼ، ܠܥܵܠܲܡ ܒܸܬ ܫܲܟܪܸܢܘܼܟ݂.