ܡܙܡܘܪ̈ܐ.
84.
ܟܡܵܐ ܡܘܼܚܸܒܹ̈ܐ ܝܢܵܐ ܡܲܫܟܢܘܼ̈ܟ݂، ܝܵܐ ܡܵܪܝܵܐ ܚܲܝܠܬܵܢܵܐ. 
ܪܘܼܚܪܸܚ ܠܵܗ̇ ܘܐܘܼܦ ܬܝܼܡ ܠܵܗ̇ ܓܵܢܝܼ ܠܕܵܪ̈ܵܬܹ‌ܐ ܕܡܵܪܝܵܐ، ܠܸܒܝܼ ܘܦܲܓ݂ܪܝܼ ܟܹܐ ܫܲܒܚܝܼ ܠܐܲܠܵܗܵܐ ܚܵܝܵܐ. 
ܐܘܼܦ ܨܸܦܪܬܵ‌ܐ ܡܘܼܫ݇ܟ̰ܸܚ ܠܵܗ̇ ܒܲܝܬܵ‌ܐ، ܘܣܢܘܿܢܝܼܬܵ‌ܐ ܩܸܢܵܐ ܩܵܬܘܼܗ̇، ܕܡܲܬܒ݂ܵܐ ܙܲܥܝܘܼ̈ܗ̇، ܠܟܸܣ ܡܲܕܒܚܘܼ̈ܟ݂، ܝܵܐ ܡܵܪܝܵܐ ܚܲܝܠܬܵܢܵܐ، ܡܲܠܟܝܼ ܘܐܲܠܵܗ‌ܝܼ. 
ܛܘܼܒ݂ܵܐ ܠܥܵܡܪ̈ܵܢܹܐ ܕܒܲܝܬܘܼܟ݂، ܗܲܪ ܒܸܬ ܫܲܒܚܝܼ ܠܘܼܟ݂. ܣܹܠܵܗ 
ܛܘܼܒ݂ܵܐ ܠܐܢܵܫܹ̈ܐ ܕܚܲܝܠܵܝܗ‌ܝ ܒܝܼܘܼܟ݂ ܝܼܠܹܗ، ܫܒ݂ܝܼܠܹ̈ܐ ܕܠܨܸܗܝܘܿܢ ܒܠܸܒܵܝܗ‌ܝ. 
ܥܵܒ݂ܪ̈ܵܢܹܐ ܕܪܵܘܘܿܠܵܐ ܕܒܸܟ݂ܝܵܐ، ܟܹܐ ܥܵܒ݂ܕܝܼ ܠܹܗ ܥܲܝܢܵܬܹ̈‌ܐ، ܐܘܼܦ ܡܸܛܪܵܐ ܩܲܕܡܵܝܬܵ‌ܐ ܟܹܐ ܡܲܒܪܝܼܵܐ ܒܸܪ̈ܟܹܐ ܕܡ̈ܝܼܵܐ. 
ܟܹܐ ܐܵܙܠ݇ܝܼ ܡ̣ܢ ܚܲܝܠܵܐ ܠܚܲܝܠܵܐ، ܒܸܬ ܦܵܝܫܝܼ ܚܸܙܝܵܐ ܠܐܲܠܵܗܵܐ ܒܨܸܗܝܘܿܢ، 
ܝܵܐ ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ، ܫܡܹܥ ܨܠܘܿܬ‌ܝܼ، ܗܲܒ݂ܠܔ ܢܵܬܵ‌ܐ، ܝܵܐ ܐܲܠܵܗܵܐ ܕܝܲܥܩܘܿܒ݂. ܣܹܠܵܗ 
ܚܙܝܼ ܡܵܛܵܠܲܢ، ܝܵܐ ܐܲܠܵܗܵܐ، ܘܚܘܼܪ ܒܦܵܬܵ‌ܐ ܕܡܫܝܼܚܘܼܟ݂. 
ܣܵܒܵܒ ܒܘܼܫ ܨܦܵܝܝܼ ܝܠܹܗ ܚܲܕ ܝܵܘܡܵܐ ܒܕܵܪ̈ܵܬܘܼܟ݂ ܡ̣ܢ ܐܲܠܦܵܐ ܒܕܘܼܟܵܐ ܐܚܹܪܬܵ‌ܐ. ܓܘܼܒܹܐ ܠܝܼ ܠܹܗܘܵܝܵܐ ܒܣܩܘܼܦܬܵ‌ܐ ܕܒܲܝܬܵ‌ܐ ܕܐܲܠܵܗ‌ܝܼ، ܡ̣ܢ ܠܸܥܡܵܪܵܐ ܒܡܲܫܟܢܹ̈ܐ ܕܪ̈ܲܫܝܼܥܹܐ. 
ܣܵܒܵܒ ܫܸܡܫܵܐ ܘܡܵܛܵܠܵܐ ܝܠܹܗ ܡܵܪܝܵܐ ܐܲܠܵܗܵܐ، ܫܵܦܵܩܲܬ ܘܐܝܼܩܵܪܵܐ ܒܸܬ ܝܵܗܒܹܠܔ ܡܵܪܝܵܐ، ܠܹܐ ܡܲܟܠܹܐ ܛܵܒ݂ܬܵ‌ܐ ܡ̣ܢ ܕܐܵܢܝܼ ܕܚܵܕܪܝܼ ܒܬܲܡܝܼܡܘܼܬܵ‌ܐ. 
ܝܵܐ ܡܵܪܝܵܐ ܚܲܝܠܬܵܢܵܐ، ܛܘܼܒ݂ܵܐ ܠܐܢܵܫܵܐ ܕܣܵܒܹܪ ܒܝܼܘܼܟ݂.