ܡܙܡܘܪ̈ܐ.
91.
ܝܵܬܒ݂ܵܢܵܐ ܒܣܸܬܵܪܵܐ ܕܥܸܠܵܝܵܐ، ܒܛܸܠܵܢܝܼܬܵ‌ܐ ܕܚܲܝܠܬܵܢܵܐ ܒܸܬ ܫܵܪܹܐ. 
ܒܸܬ ܐܵܡܪܹܢ ܒܘܼܬ ܡܵܪܝܵܐ: ”ܗ̇ܘ ܝܼܠܹܗ ܒܹܝܬ ܓܵܘܣܝܼ ܘܚܸܣܢܝܼ، ܐܲܠܵܗ‌ܝܼ، ܒܸܬ ܣܵܒܪܹܢ ܒܝܼܹܗ.“ 
ܒܗ̇ܝ ܕܗ̇ܘ ܒܸܬ ܦܲܨܹܐ ܠܘܼܟ݂ ܡ̣ܢ ܢܸܫܒ݂ܵܐ ܕܨܲܝܵܕܵܐ، ܡ̣ܢ ܡܲܪ̈ܥܹܐ ܩܵܛܠܵܢܹ̈ܐ ܘܛܲܠܩܵܢܹ̈ܐ. 
ܒܦܲܪ̈ܘܼܗ‌ܝ ܒܸܬ ܟܲܣܹܐ ܠܘܼܟ݂، ܘܬܚܘܿܬ ܓܘܼܠܦܵܢܘܼ̈ܗ‌ܝ ܒܸܬ ܥܵܪܩܹܬ، ܣܲܟܪܵܐ ܘܡܵܛܵܠܵܐ ܝܠܵܗ̇ ܫܲܪܝܼܪܘܼܬܹܗ. 
ܠܹܐ ܙܵܕܥܹܬ ܡ̣ܢ ܙܕܘܼܥܬܵ‌ܐ ܕܠܲܝܠܹܐ، ܡ̣ܢ ܓܹܐܪܵܐ ܕܦܵܪܹܚ ܒܐܝܼܡܵܡܵܐ، 
ܡ̣ܢ ܡܲܪܥܵܐ ܩܵܛܠܵܢܵܐ ܕܚܵܕܹܪ ܒܚܸܫܟܵܐ، ܡ̣ܢ ܡܲܚܪܲܒ݂ܬܵ‌ܐ ܕܛܲܠܩܵܐ ܒܛܲܗܪܵܐ. 
ܟܲܕ ܢܵܦܠܝܼ ܐܲܠܦܵܐ ܡ̣ܢ ܕܸܦܢܘܼܟ݂، ܘܪܸܒܘܼܬܵ‌ܐ ܡ̣ܢ ܝܲܡܝܼܢܘܼܟ݂، ܠܟܸܣܠܘܼܟ݂ ܠܹܐ ܩܲܪܒܸܢ. 
ܐܲܚܟ̰ܝܼ ܒܥܲܝ̈ܢܘܼܟ݂ ܒܸܬ ܚܵܝܪܹܬ، ܘܦܘܼܪܥܵܢܵܐ ܕܪ̈ܲܫܝܼܥܹܐ ܒܸܬ ܚܵܙܹܝܬ. 
ܒܗ̇ܝ ܕܠܡܵܪܝܵܐ ܥܸܠܵܝܵܐ، ܗ̇ܘ ܕܝܼܠܹܗ ܒܹܝܬ ܓܵܘܣܝܼ، ܥܒ݂ܝܼܕ ܠܘܼܟ݂ ܡܲܥܡܪܘܼܟ݂، 
ܠܹܐ ܬܵܦܩܵܐ ܒܝܼܘܼܟ݂ ܒܝܼܫܬܵ‌ܐ، ܘܠܹܐ ܩܲܪܒܸܢܵܐ ܠܡܲܫܟܢܘܼܟ݂ ܡܚܘܿܬܵ‌ܐ. 
ܣܵܒܵܒ ܒܸܬ ܦܵܩܹܕ ܠܡܲܠܲܐܟ݂ܘܼ̈ܗ‌ܝ ܒܘܼܬ ܕܝܼܘܼܟ݂، ܕܢܵܛܪܝܼ ܠܘܼܟ݂ ܒܟܠܵܝܗ‌ܝ ܐܘܼܪ̈ܚܵܬܘܼܟ݂. 
ܥܲܠܔ ܐܝܼܕܵܬܵܝ̈ܗ‌ܝ ܒܸܬ ܛܵܥܢܝܼ ܠܘܼܟ݂، ܕܠܵܐ ܬܲܪܩܸܠܵܐ ܒܟܹܐܦܵܐ ܐܲܩܠܘܼܟ݂. 
ܥܲܠܔ ܐܲܪܝܵܐ ܘܦܲܬܢܵܐ ܒܸܬ ܦܵܣܥܹܬ، ܓܘܼܪܝܵܐ ܕܐܲܪܝܵܐ ܘܬܲܢܝܼܢܵܐ ܒܸܬ ܕܲܫܕܸܫܸܬ. 
”ܒܸܬ ܦܲܨܹܢܹܗ ܣܵܒܵܒ ܡܘܼܚܸܒ ܠܹܗ ܐܸܠܝܼ، ܒܸܬ ܡܲܪܡܸܢܹܗ ܠܫܲܝܢܵܐ ܒܗ̇ܝ ܕܝܕܝܼܥ ܠܹܗ ܫܸܡܝܼ. 
”ܒܸܬ ܓ̰ܲܘܸܒܸܢܹܗ ܐܝܼܡܲܢ ܕܩܵܪܹܐ ܠܝܼ، ܥܲܡܹܗ ܝܘܸܢ ܐܵܢܵܐ ܒܥܕܵܢܵܐ ܕܥܵܘܩܵܢܵܐ، ܒܸܬ ܦܲܨܹܢܹܗ ܘܒܸܬ ܡܝܲܩܪܸܢܹܗ. 
”ܒܝܘܼܪܟ݂ܵܐ ܕܝܵܘܡܵܢܹ̈ܐ ܒܸܬ ܡܲܣܒܸܥܸܢܹܗ، ܘܒܸܬ ܡܲܚܙܹܝܢ ܐܸܠܹܗ ܦܘܼܪܩܵܢܝܼ.“