ܡܙܡܘܪ̈ܐ.
103.
ܒܲܪܸܟ݂ܝ، ܝܵܐ ܓܵܢܝܼ، ܠܡܵܪܝܵܐ، ܘܟܠܔ ܕܒܓܵܘܝܼ ܠܫܸܡܵܐ ܕܩܘܼܕܫܹܗ. 
ܒܲܪܸܟ݂ܝ، ܝܵܐ ܓܵܢܝܼ، ܠܡܵܪܝܵܐ، ܘܠܵܐ ܢܵܫܝܲܬ‌ܝ ܟܠܵܝܗ‌ܝ ܦܘܼܪ̈ܥܵܢܘܼܗ‌ܝ، 
ܕܟܹܐ ܫܵܒܹܩ ܟܠܹܗ ܥܵܘܠܵܟ݂ܝ، ܕܟܹܐ ܒܲܣܸܡ ܟܠܵܝܗ‌ܝ ܡܲܪ̈ܥܵܟ݂ܝ، 
ܕܟܹܐ ܦܲܪܸܩ ܡ̣ܢ ܓܘܼܒܵܐ ܚܲܝܵܟ݂ܝ̈، ܕܟܹܐ ܒܲܢܦܸܪܵܟ݂ܝ ܒܛܲܝܒܘܼܬܵ‌ܐ ܘܪ̈ܲܚܡܹܐ، 
ܕܟܹܐ ܡܲܣܒܸܥ ܒܛܵܒ݂ܬܵ‌ܐ ܚܲܝܘܼܬܵܟ݂ܝ، ܕܦܵܝܫܵܐ ܚܘܼܕܸܬܬܵ‌ܐ ܐܲܝܟ݂ ܢܸܫܪܵܐ ܥܠܲܝܡܘܼܬܵܟ݂ܝ. 
ܟܹܐ ܥܵܒܹܕ ܦܘܼܠܚܵܢܹ̈ܐ ܕܙܲܕܝܼܩܘܼܬܵ‌ܐ ܡܵܪܝܵܐ، ܘܕܝܼܘܵܢܹ̈ܐ ܠܟܠܵܝܗ‌ܝ ܛܠܝܼܡܹ̈ܐ. 
ܡܘܼܕܸܥ ܠܹܗ ܐܘܼܪ̈ܚܵܬܘܼܗ‌ܝ ܠܡܘܼܫܹܐ، ܠܒܢܲܝ̈ ܐܝܼܣܪܵܐܹܝܠܔ ܦܘܼܠܚܵܢܘܼ̈ܗ‌ܝ. 
ܡܪܲܚܡܵܢܵܐ ܝܠܹܗ ܘܚܲܢܵܢܵܐ ܡܵܪܝܵܐ، ܝܲܪܝܼܟ݂ܬܵ‌ܐ ܒܹܐܢܹܗ ܘܦܪܝܼܬܵ‌ܐ ܛܲܝܒܘܼܬܹܗ. 
ܠܥܵܠܲܡ ܠܹܐ ܕܵܪܹܫ، ܘܠܵܐ ܠܥܵܠܲܡ ܢܵܛܹܪ ܟܲܪܒܹܗ. 
ܠܵܐ ܐܲܝܟ݂ ܚܛܵܗܲܢ̈ ܥܒ݂ܝܼܕ ܠܹܗ ܐܸܠܲܢ، ܘܠܵܐ ܐܲܝܟ݂ ܥܵܘܠܲܢ̈ ܦܪܝܼܥ ܠܹܗ ܐܸܠܲܢ. 
ܣܵܒܵܒ ܐܲܝܟ݂ ܕܝܼܠܵܗ̇ ܪܵܡܬܵ‌ܐ ܫܡܲܝܵܐ ܥܲܠܔ ܐܲܪܥܵܐ، ܗܵܕܟ݂ܵܐ ܓܘܼܪܬܵ‌ܐ ܝܠܵܗ̇ ܛܲܝܒܘܼܬܹܗ ܥܲܠܔ ܙܕܝܼܥܘܼ̈ܗ‌ܝ. 
ܐܲܝܟ݂ ܕܝܼܠܹܗ ܪܸܚܩܵܐ ܡܲܕܢܚܵܐ ܡ̣ܢ ܡܲܥܪܒ݂ܵܐ، ܗܵܕܟ݂ܵܐ ܡܘܼܪܚܸܩ ܠܹܗ ܡܸܢܲܢ ܓܢܵܗܲܢ̈. 
ܐܲܝܟ݂ ܕܪܲܚܸܡ ܒܵܒܵܐ ܥܲܠܔ ܒܢܘܿܢܘܼ̈ܗ‌ܝ، ܗܵܕܟ݂ܵܐ ܟܹܐ ܪܲܚܸܡ ܡܵܪܝܵܐ ܥܲܠܔ ܙܕܝܼܥܘܼ̈ܗ‌ܝ. 
ܣܵܒܵܒ ܗ̇ܘ ܟܹܐ ܝܵܕܹܥ ܓܒ݂ܝܼܠܬܲܢ، ܟܹܐ ܕܵܟܹܪ ܕܥܲܦܪܵܐ ܝܘܲܚ ܐܲܚܢܲܢ. 
ܐܢܵܫܵܐ ܐܲܝܟ݂ ܓܸܠܵܐ ܝܢܵܐ ܝܵܘܡܵܢܘܼ̈ܗ‌ܝ، ܐܲܝܟ݂ ܦܸܩܚܵܐ ܕܕܸܫܬܵ‌ܐ ܗܵܕܟ݂ܵܐ ܟܹܐ ܦܵܩܹܚ، 
ܐܝܼܡܲܢ ܕܦܵܘܚܵܐ ܟܹܐ ܥܵܒܹܪ ܥܲܠܘܼܗ‌ܝ، ܐܚܹܪܢܵܐ ܠܲܝܬ ܗ̇ܘ، ܘܠܹܐ ܝܵܕܥܵܐ ܠܹܗ ܐܚܹܪܢܵܐ ܕܘܼܟܬܹܗ. 
ܐܝܼܢܵܐ ܛܲܝܒܘܼܬܵ‌ܐ ܕܡܵܪܝܵܐ ܡ̣ܢ ܥܵܠܲܡ ܝܼܠܵܗ̇ ܘܗܲܠܔ ܥܵܠܲܡ ܥܲܠܔ ܙܕܝܼܥܘܼ̈ܗ‌ܝ، ܘܙܲܕܝܼܩܘܼܬܹܗ ܥܲܠܔ ܒܢܘܿܢܹ̈ܐ ܕܒܢܘܿܢܹ̈ܐ. 
ܠܢܵܛܪܵܢܵܐ ܕܘܲܥܕܹܗ، ܘܠܕܵܟ݂ܪܵܢܵܐ ܕܦܘܼܩܕܵܢܘܼ̈ܗ‌ܝ ܠܸܥܒ݂ܵܕܵܝ. 
ܡܵܪܝܵܐ ܒܫܡܲܝܵܐ ܡܘܼܩܘܹܐ ܠܹܗ ܟܘܼܪܣܝܹܗ، ܘܡܲܠܟܘܼܬܹܗ ܟܹܐ ܗܲܟܡܵܐ ܥܲܠܔ ܟܠܔ. 
ܒܲܪܟ݂ܘܼܢ ܠܡܵܪܝܵܐ، ܝܵܐ ܡܲܠܲܐܟ݂ܘܼ̈ܗ‌ܝ، ܓܲܒܵܪܹ̈ܐ ܕܚܲܝܠܵܐ ܥܵܒ݂ܕܵܢܹ̈ܐ ܕܚܲܒܪܹܗ، ܠܸܫܡܵܥܵܐ ܠܩܵܠܵܐ ܕܚܲܒܪܹܗ. 
ܒܲܪܟ݂ܘܼܢ ܠܡܵܪܝܵܐ، ܝܵܐ ܟܠܵܝܗ‌ܝ ܚܲܝܠܵܘܵܬܘܼ̈ܗ‌ܝ، ܡܫܲܡܫܵܢܘܼ̈ܗ‌ܝ ܥܵܒ݂ܕܵܢܹ̈ܐ ܕܨܸܒ݂ܝܵܢܹܗ. 
ܒܲܪܟ݂ܘܼܢ ܠܡܵܪܝܵܐ، ܝܵܐ ܟܠܵܝܗ‌ܝ ܥܒ݂ܵܕܘܼ̈ܗ‌ܝ، ܒܟܠܵܝܗ‌ܝ ܕܘܼܟܵܢܹ̈ܐ ܕܫܘܼܠܛܵܢܹܗ، ܒܲܪܸܟ݂ܝ، ܝܵܐ ܓܵܢܝܼ، ܠܡܵܪܝܵܐ.