ܡܙܡܘܪ̈ܐ.
139.
ܝܵܐ ܡܵܪܝܵܐ، ܨܘܼܚܨܝܼܵܐ ܝܘܸܬ ܐܸܠܝܼ ܘܟܹܐ ܝܵܕܥܹܬ ܠܝܼ. 
ܐܲܢ݇ܬ ܟܹܐ ܝܵܕܥܹܬ ܝܬܵܒ݂ܬ‌ܝܼ ܘܩܝܵܡܬ‌ܝܼ، ܦܘܼܪܡܹܐ ܠܘܼܟ݂ ܚܘܼܫܵܒ݂ܝܼ ܡ̣ܢ ܪܸܚܩܵܐ. 
ܐܘܼܪܚܝܼ ܘܕܡܵܟ݂ܬ‌ܝܼ ܬܘܼܦ̮ܬܸܫ ܠܘܼܟ݂، ܘܟܠܵܝܗ‌ܝ ܐܘܼܪ̈ܚܵܬ‌ܝܼ ܟܹܐ ܝܵܕܥܹܬ. 
ܟܲܕ ܗܸܫ ܠܲܝܬ ܚܲܒܪܵܐ ܒܠܸܫܵܢܝܼ، ܗܵܐ ܐܲܢ݇ܬ، ܝܵܐ ܡܵܪܝܵܐ، ܟܹܐ ܝܵܕܥܹܬ ܠܹܗ ܟܠܹܗ. 
ܡ̣ܢ ܒܵܬܪܵܐ ܘܩܲܕܡܵܐ ܩܵܡ ܚܲܪܕܸܬ ܠܝܼ، ܘܩܵܡ ܡܲܬܒܸܬ ܐܝܼܕܘܼܟ݂ ܥܲܠܝܼ. 
ܥܓ̰ܝܼܒܬܵ‌ܐ ܝܠܵܗ̇ ܐܵܗܵܐ ܝܕܵܥܬܵ‌ܐ ܩܵܬ‌ܝܼ، ܥܸܠܸܠܔ ܝܼܠܵܗ̇ ܡ̣ܢ ܨܲܠܡܲܢܬ‌ܝܼ. 
ܠܐܲܝܟܵܐ ܐܵܙܹܠ݇ܢ ܡ̣ܢ ܪܘܼܚܘܼܟ݂، ܘܠܐܲܝܟܵܐ ܥܵܪܩܹܢ ܡ̣ܢ ܦܵܬܘܼܟ݂؟ 
ܐܸܢ ܐܵܣܩܹܢ ܠܫܡܲܝܵܐ، ܬܵܡܵܐ ܝܘܸܬ ܐܲܢ݇ܬ، ܘܐܸܢ ܫܲܘܹܝܢ ܫܘܝܼܬ‌ܝܼ ܓܵܘ ܫܝܘܿܠܔ، ܗܵܐ، ܬܵܡܵܐ ܝܘܸܬ. 
ܐܸܢ ܫܵܩܠܹܢ ܓܘܼܠܦܵܢܹ̈ܐ ܕܨܸܡܚܵܐ، ܘܫܵܪܹܝܢ ܒܚܲܪܬܵ‌ܐ ܕܝܵܡܵܐ، 
ܐܘܼܦ ܬܵܡܵܐ ܐܝܼܕܘܼܟ݂ ܒܸܬ ܡܗܲܕܝܵܐ ܠܝܼ، ܘܝܲܡܝܼܢܘܼܟ݂ ܒܸܬ ܕܵܒ݂ܩܵܐ ܠܝܼ. 
ܘܐܸܢ ܐܵܡܪܹܢ: ”ܒܫܪܵܪܵܐ، ܚܸܫܟܵܐ ܒܸܬ ܟܲܣܹܐ ܠܝܼ، ܘܒܲܗܪܵܐ ܕܥܲܠܝܼ ܒܸܬ ܗܵܘܹܐ ܠܲܝܠܹܐ،“ 
ܐܘܼܦ ܚܸܫܟܵܐ ܠܹܐ ܝܠܹܗ ܚܸܫܟܵܢܵܐ ܐܸܠܘܼܟ݂، ܘܠܲܝܠܹܐ ܐܲܝܟ݂ ܐܝܼܡܵܡܵܐ ܟܹܐ ܒܲܗܪܸܢ، ܐܲܝܟ݂ ܚܸܫܟܵܐ، ܗܵܕܟ݂ܵܐ ܒܲܗܪܵܐ. 
ܒܗ̇ܝ ܕܐܲܢ݇ܬ ܒܪܹܐ ܠܘܼܟ݂ ܠܪܸܥܝܵܢܝܼ، ܩܵܡ ܙܵܩܪܹܬ ܠܝܼ ܒܒܲܛܢܵܐ ܕܝܸܡܝܼ. 
ܒܸܬ ܫܲܟܪܸܢܘܼܟ݂ ܒܗ̇ܝ ܕܣܲܗܡܵܢܵܐ ܘܥܓ̰ܝܼܒܵܐ ܦܝܼܫ ܠܝܼ ܥܒ݂ܝܼܕܵܐ، ܥܓ̰ܝܼܒܹ̈ܐ ܝܢܵܐ ܦܘܼܠܚܵܢܘܼ̈ܟ݂، ܘܓܵܢܝܼ ܨܦܵܝܝܼ ܟܹܐ ܝܵܕܥܵܐ. 
ܠܵܐ ܦܝܼܫ ܠܗܘܿܢ ܛܸܫܝܹܐ ܓܲܪ̈ܡܝܼ ܡܸܢܘܼܟ݂، ܟܲܕ ܦܝܼܫ ܠܝܼ ܥܒ݂ܝܼܕܵܐ ܒܣܸܬܵܪܵܐ، ܦܝܼܫ ܠܝܼ ܙܩܝܼܪܵܐ ܓܵܘ ܬܲܚ̈ܬܵܝܵܬܹ‌ܐ ܕܐܲܪܥܵܐ. 
ܚܙܹܐ ܠܗܘܿܢ ܥܲܝ̈ܢܘܼܟ݂ ܓܒ݂ܝܼܠܬ‌ܝܼ، ܘܓܵܘ ܟܬܵܒ݂ܘܼܟ݂ ܟܠܵܝܗ‌ܝ ܝܵܘܡܵܢܝܼ̈ ܦܝܼܫ ܠܗܘܿܢ ܟܬܝܼܒܹܐ، ܦܝܼܫ ܠܗܘܿܢ ܪܫܝܼܡܹܐ، ܟܲܕ ܠܲܝܬ ܗܘܵܐ ܐܘܼܦ ܚܲܕ ܡܸܢܵܝܗ‌ܝ. 
ܘܐܸܠܝܼ ܟܡܵܐ ܡܝܘܼܩܪܹ̈ܐ ܝܢܵܐ ܚܘܼܫܵܒ݂ܘܼ̈ܟ݂، ܝܵܐ ܐܲܠܵܗܵܐ، ܟܡܵܐ ܪܵܒܵܐ ܝܢܵܐ ܡܸܢܝܵܢܵܝ̈ܗ‌ܝ. 
ܐܸܢ ܡܵܢܹܢܗܘܿܢ ܒܘܼܫ ܒܸܬ ܙܵܝܕܝܼ ܡ̣ܢ ܣܹܠܵܐ، ܟܹܐ ܪܵܥܫܹܢ ܘܗܸܫ ܐܵܢܵܐ ܥܲܡܘܼܟ݂ ܝܼܘܸܢ. 
ܛܘܼܒ݂ܵܐ ܕܩܵܛܠܹܬ ܠܪ̈ܲܫܝܼܥܹܐ، ܝܵܐ ܐܲܠܵܗܵܐ، ܪܚܘܿܩܘܼܢ ܡܸܢܝܼ، ܝܵܐ ܫܲܦܟ݂ܵܢܹ̈ܐ ܕܕܸܡܹ̈ܐ. 
ܟܹܐ ܗܲܡܙܸܡܝܼ ܒܘܼܬ ܕܝܼܘܼܟ݂ ܒܥܵܘܠܵܐ، ܕܸܫ̃ܡܸܢܘܼ̈ܟ݂ ܟܹܐ ܫܵܩܠܝܼ ܫܸܡܘܼܟ݂ ܒܣܪܝܼܩܘܼܬܵ‌ܐ. 
ܗܵܐ، ܠܹܐ ܣܵܢܹܝܢ ܠܣܵܢܝܵܢܘܼ̈ܟ݂، ܝܵܐ ܡܵܪܝܵܐ، ܘܠܹܐ ܓܲܢܓܸܙܸܢ ܡ̣ܢ ܩܵܝܡܵܢܹ̈ܐ ܕܕܲܠܩܘܼܒ݂ܠܘܼܟ݂؟ 
ܣܢܵܝܬܵ‌ܐ ܓܡܝܼܪܬܵ‌ܐ ܟܹܐ ܣܵܢܹܢܗܘܿܢ، ܗܘܹܐ ܠܗܘܿܢ ܐܸܠܝܼ ܕܸܫ̃ܡܸܢܹ̈ܐ. 
ܨܲܚܨܝܼ ܠܝܼ، ܝܵܐ ܐܲܠܵܗܵܐ، ܘܝܕܹܥ ܠܸܒܝܼ، ܬܲܦ̮ܬܸܫ ܠܝܼ ܘܝܕܹܥ ܚܲܡܝܼ̈. 
ܘܚܙܝܼ ܐܸܢ ܐܝܼܬ ܒܝܼܝܼ ܡܸܢܕܝܼ ܥܲܓ̰ܸܙܵܢܵܐ ܩܵܬܘܼܟ݂، ܘܡܗܲܕܝܼ ܠܝܼ ܒܐܘܼܪܚܵܐ ܕܠܥܵܠܲܡ.