ܒ ܛܝܡܬܐܘܣ.
4.
ܚܲܦܘܼܛܹܐ ܝܘܸܢ ܐܸܠܘܼܟ݂ ܩܲܕܡ ܐܲܠܵܗܵܐ ܘܝܼܫܘܿܥ ܡܫܝܼܚܵܐ، ܗ̇ܘ ܕܗܕܝܼܪܵܐ ܝܠܹܗ ܕܕܵܐܹܢ ܠܚܵܝܹ̈ܐ ܘܠܡܝܼ̈ܬܹ‌ܐ ܒܓܸܠܝܵܢܹܗ ܕܡܲܠܟܘܼܬܹܗ، 
ܡܲܟܪܸܙ ܗܹܡܸܙܡܵܢ، ܒܸܚܦܵܛܵܐ ܒܙܲܒ݂ܢܵܐ ܘܠܵܐ ܒܙܲܒ݂ܢܵܐ؛ ܡܲܢܟܸܣ، ܡܲܪܥܸܫ، ܗܲܒ݂ܠܔ ܠܸܒܵܐ ܒܟܠܵܗ̇ ܚܡܵܠܬܵ‌ܐ ܘܒܡܲܠܲܦܬܵ‌ܐ. 
ܣܵܒܵܒ ܒܸܬ ܐܵܬܹ‌ܐ ܙܲܒ݂ܢܵܐ ܕܐܢܵܫܹ̈ܐ ܠܹܐ ܡܲܨܝܸܬ‌ܝܼ ܠܝܘܼܠܦܵܢܵܐ ܫܲܪܝܼܪܵܐ، ܐܝܼܢܵܐ ܐܲܝܟ݂ ܫܲܗܘܲܬܝܵܬܵܝ̈ܗ‌ܝ ܒܸܬ ܡܲܙܝܸܕܝܼ ܩܵܐ ܓܵܢܵܝܗ‌ܝ ܡܲܠܦܵܢܹ̈ܐ ܕܗܲܡܙܸܡܝܼ ܐܸܠܵܝܗ‌ܝ ܐܲܝܟ݂ ܕܛܵܠܹܒ ܠܸܒܵܝܗ‌ܝ، 
ܘܒܸܬ ܡܲܕܸܪܝܼ ܢܵܬܵܝܗ‌ܝ ܡ̣ܢ ܫܪܵܪܵܐ، ܘܒܸܬ ܩܵܠܒܝܼ ܠܗܲܩܝܵܬܹ̈‌ܐ. 
ܐܝܼܢܵܐ ܐܲܢ݇ܬ، ܗܘܝܼ ܪܥܝܼܫܵܐ ܒܟܠܵܝܗ‌ܝ ܡܸܢܕܝܼܵܢܹ̈ܐ، ܩܲܒܸܠܔ ܓ̰ܘܼܢܓ̰ܵܪܹ̈ܐ، ܦܠܘܿܚ ܦܘܼܠܚܵܢܵܐ ܕܚܲܕ ܡܲܟܪܸܙܵܢܵܐ، ܘܡܲܟܡܸܠܔ ܠܚܸܠܡܲܬܘܼܟ݂. 
ܣܵܒܵܒ ܐܵܢܵܐ ܐܵܕܝܼܵܐ ܗܕܝܼܪܵܐ ܝܘܸܢ ܕܦܵܝܫܹܢ ܡܘܼܩܪܸܒ݂ܵܐ، ܘܥܕܵܢܵܐ ܕܦܪܵܫܬ‌ܝܼ ܡܛܝܼܬܵ‌ܐ ܝܠܵܗ̇. 
ܦܠܵܫܵܐ ܨܦܵܝܝܼ ܦܠܝܼܫܵܐ ܝܘܸܢ، ܪܲܗܛܝܼ ܡܘܼܟܡܸܠܹܗ ܝܘܸܢ، ܗܲܝܡܵܢܘܼܬ‌ܝܼ ܢܛܝܼܪܘܼܗ̇ ܝܘܸܢ. 
ܘܐܵܕܝܼܵܐ ܦܝܼܫܵܐ ܝܠܹܗ ܢܛܝܼܪܵܐ ܐܸܠܝܼ ܟܠܝܼܠܵܐ ܕܙܲܕܝܼܩܘܼܬܵ‌ܐ، ܐܲܝܢܝܼ ܕܡܵܪܲܢ، ܕܝܼܠܹܗ ܕܲܝܵܢܵܐ ܟܹܐܢܵܐ، ܒܸܬ ܦܵܪܹܥ ܠܝܼ ܒܗ̇ܘ ܝܵܘܡܵܐ؛ ܘܠܵܐ ܐܲܚܟ̰ܝܼ ܐܸܠܝܼ، ܐܝܼܢܵܐ ܐܘܼܦ ܠܟܠܵܝܗ‌ܝ ܐܵܢܝܼ ܕܡܲܚܸܒܝܼ ܠܹܗ ܓܸܠܝܵܢܹܗ. 
ܡܲܠܝܸܙ ܕܐܵܬܹܝܬ ܠܟܸܣܠܝܼ ܒܓ̰ܲܠܕܘܼܬܵ‌ܐ، 
ܣܵܒܵܒ ܕܹܐܡܵܐ ܫܒ݂ܝܼܩ ܠܹܗ ܐܸܠܝܼ، ܟܲܕ ܡܘܼܚܸܒ ܠܹܗ ܠܐܵܗܵܐ ܕܘܼܢܝܹܐ ܘܐܙܝܼܠܔ ܠܹܗ ܠܬܹܣܵܠܘܿܢܝܼܩܹܐ. ܩܪܝܼܣܦܘܿܣ ܐܙܝܼܠܔ ܠܹܗ ܠܓܵܠܵܛܝܼܵܐ، ܘܛܸܛܘܿܣ ܠܕܲܠܡܵܛܝܼܵܐ. 
ܐܲܚܟ̰ܝܼ ܠܘܼܩܵܐ ܒܢܲܦ̮ܫܹܗ ܥܲܡܝܼ ܝܠܹܗ. ܫܩܘܿܠܔ ܠܡܵܪܩܘܿܣ ܘܡܲܝܬ‌ܝܼ ܠܹܗ ܥܲܡܘܼܟ݂، ܣܵܒܵܒ ܡܵܪܹܐ ܝܘܼܬܪܵܢܵܐ ܝܠܹܗ ܐܸܠܝܼ ܒܚܸܠܡܲܬ. 
ܛܘܼܟ݂ܝܼܩܘܿܣ ܫܘܼܕܸܪܝܼ ܠܐܵܦܸܣܘܿܣ. 
ܐܝܼܡܲܢ ܕܐܵܬܹܝܬ ܡܲܝܬܹܝܬ ܠܵܗ̇ ܥܵܒܵܝܬܵ‌ܐ ܕܫܒ݂ܝܼܩܵܐ ܠܝܼ ܠܟܸܣ ܩܵܪܦܘܿܣ ܓܵܘ ܛܪܘܿܐܘܿܣ، ܐܘܼܦ ܡܲܝܬܹܝܬ ܠܗܘܿܢ ܟܬܵܒܹ̈ܐ، ܐܝܼܢܵܐ ܒܘܼܫ ܙܵܘܕܵܐ ܟܬܵܒܹ̈ܐ ܕܓܸܠܕܵܐ. 
ܐܵܠܸܟܣܲܢܕܪܘܿܣ ܢܲܚܵܫܵܐ ܥܒ݂ܝܼܕ ܠܹܗ ܪܵܒܵܐ ܒܝܼܫܵܬܹ̈‌ܐ ܐܸܠܝܼ. ܡܵܪܲܢ ܒܸܬ ܦܵܪܹܥ ܠܹܗ ܐܲܝܟ݂ ܦܘܼܠܚܵܢܘܼ̈ܗ‌ܝ. 
ܐܘܼܦ ܐܲܢ݇ܬ ܗܵܘܹܝܬ ܗܸܫܝܲܪ ܡܸܢܹܗ، ܣܵܒܵܒ ܪܵܒܵܐ ܩܝܼܡ ܠܹܗ ܕܲܠܩܘܼܒ݂ܠܔ ܕܗܹܡܸܙܡܵܢܲܢ̈. 
ܒܝܵܗܒ݂ܵܠܬܵ‌ܐ ܕܓ̰ܘܼܘܵܒܝܼ ܩܲܕܡܵܝܬܵ‌ܐ ܐܘܼܦ ܚܲܕ ܠܵܐ ܟܠܹܐ ܠܹܗ ܥܲܡܝܼ. ܟܠܵܝܗ‌ܝ ܩܵܡ ܫܵܒ݂ܩܝܼ ܠܝܼ. ܐܵܗܵܐ ܠܵܐ ܦܵܝܫܵܐ ܚܘܼܫܒܸܢܬܵ‌ܐ ܓܢܵܗܵܐ ܐܸܠܵܝܗ‌ܝ. 
ܐܝܼܢܵܐ ܡܵܪܲܢ ܟܠܹܐ ܠܹܗ ܒܕܸܦܢܝܼ ܘܩܵܡ ܚܲܠܸܢܝܼ، ܗܵܕܟ݂ܵܐ ܕܡܲܟܪܲܙܬܵ‌ܐ ܒܝܼܝܼ ܦܵܝܫܵܐ ܬܘܼܡܸܡܬܵ‌ܐ، ܘܟܠܵܝܗ‌ܝ ܐܸܡܘܵܬܹ̈‌ܐ ܫܵܡܥܝܼ. ܘܦܝܼܫ ܠܝܼ ܦܘܼܨܝܵܐ ܡ̣ܢ ܦܘܼܡܵܐ ܕܐܲܪܝܵܐ. 
ܘܒܸܬ ܦܲܨܹܐ ܠܝܼ ܡܵܪܲܢ ܡ̣ܢ ܟܠܔ ܦܘܼܠܚܵܢܵܐ ܒܝܼܫܵܐ، ܘܒܸܬ ܡܲܡܛܹܐ ܠܝܼ ܨܵܠܵܡܲܬ ܠܡܲܠܟܘܼܬܹܗ ܫܡܲܝܵܢܵܝܬܵ‌ܐ. ܐܸܠܹܗ ܚܸܩܪܵܐ ܠܥܵܠܲܡ ܥܵܠܡܝܼܢ. ܐܵܡܹܝܢ. 
ܗܲܒ݂ܠܔ ܫܠܵܡܵܐ ܠܦܪܝܼܣܩܸܠܵܐ ܘܠܐܵܩܸܠܘܿܣ، ܘܠܒܲܝܬܵ‌ܐ ܕܐܵܢܹܣܝܼܦܵܪܘܿܣ. 
ܐܵܪܸܣܛܘܿܣ ܦܝܼܫ ܠܹܗ ܓܵܘ ܩܘܿܪܲܢܬܘܿܣ، ܐܝܼܢܵܐ ܠܛܪܘܿܦܝܼܡܘܿܣ ܫܒ݂ܝܼܩ ܠܝܼ ܡܪܝܼܥܵܐ ܓܵܘ ܡܝܼܠܹܛܘܿܣ. 
ܡܲܠܝܸܙ ܕܐܵܬܹܝܬ ܡ̣ܢ ܩܲܕܡ ܣܸܬܘܵܐ. ܒܝܼܵܗܒ݂ܘܼܟ݂ ܝܼܠܹܗ ܫܠܵܡܵܐ ܐܹܘܒܘܿܠܘܿܣ، ܐܘܼܦ ܦܘܿܕܸܣ ܘܠܝܼܢܘܿܣ ܘܩܠܵܘܕܝܼܵܐ ܘܟܠܵܝܗ‌ܝ ܐܲܚܘܿܢܘܵܬܹ̈‌ܐ. 
ܡܵܪܲܢ ܗܵܘܹܐ ܥܲܡ ܪܘܼܚܘܼܟ݂. ܫܵܦܵܩܲܬ ܥܲܡܵܘܟ݂ܘܿܢ. ܐܵܡܹܝܢ.