ܝܥܩܘܒ݂.
2.
ܐܲܚܘܿܢܘܵܬ‌ܝܼ̈، ܐܲܝܟ݂ ܡܗܘܼܡܢܹ̈ܐ ܒܡܵܪܲܢ ܝܼܫܘܿܥ ܡܫܝܼܚܵܐ، ܡܵܪܹܐ ܚܸܩܪܵܐ، ܠܵܐ ܚܵܙܹܝܬܘܿܢ ܦܵܬܵ‌ܐ، 
ܣܵܒܵܒ ܐܸܢ ܥܵܒܹܪ ܐܢܵܫܵܐ ܠܟܢܘܼܫܬܵܘܟ݂ܘܿܢ ܒܐܝܼܕܹܗ ܥܸܙܲܩܬܵ‌ܐ ܕܕܲܗܒ݂ܵܐ ܘܠܒ݂ܝܼܫܵܐ ܓ̰ܘܼܠܹ̈ܐ ܫܲܦܝܼܪܹ̈ܐ، ܘܐܘܼܦ ܥܵܒܹܪ ܚܲܕ ܡܸܣܟܹܢܵܐ ܒܓ̰ܘܼܠܹ̈ܐ ܫܸܚܬܵܢܹ̈ܐ؛ 
ܘܓܲܫܩܝܼܬܘܿܢ ܒܐܢܵܫܵܐ ܠܒ݂ܝܼܫܵܐ ܓ̰ܘܼܠܹ̈ܐ ܫܲܦܝܼܪܹ̈ܐ ܘܐܵܡܪܝܼܬܘܿܢ ܐܸܠܹܗ: ”ܐܲܢ݇ܬ ܝܬܘܿܒ݂ ܠܲܐܟ݂ܵܐ، ܒܐܵܗܵܐ ܕܘܼܟܵܐ ܨܦܵܝܝܼ،“ ܐܝܼܢܵܐ ܐܵܡܪܝܼܬܘܿܢ ܠܡܸܣܟܹܢܵܐ، ”ܐܲܢ݇ܬ ܟܠܝܼ ܬܵܡܵܐ، ܝܲܢ ܝܬܘܿܒ݂ ܠܲܐܟ݂ܵܐ ܠܟܸܣ ܐܲܩܠܵܬ‌ܝܼ̈،“ 
ܩܵܡܘܿܕܝܼ ܠܹܐ ܝܬܘܿܢ ܒܸܦܪܵܫܵܐ ܒܹܝܠܔ ܓܵܢܵܘܟ݂ܘܿܢ؟ ܘܩܵܡܘܿܕܝܼ ܗܘܹܐ ܠܵܘܟ݂ܘܿܢ ܕܲܝܵܢܹ̈ܐ ܒܚܘܼܫܵܒܹ̈ܐ ܒܝܼܫܹ̈ܐ؟ 
ܫܡܹܥܡܘܼܢ، ܐܲܚܘܿܢܘܵܬ‌ܝܼ̈ ܡܘܼܚܸܒܹ̈ܐ، ܩܵܡܘܿ ܠܵܐ ܓܘܼܒܹܐ ܠܹܗ ܐܲܠܵܗܵܐ ܠܡܸܣܟܹܢܹ̈ܐ ܕܐܵܗܵܐ ܥܵܠܡܵܐ ܕܗܵܘܝܼ ܥܲܬܝܼܪܹ̈ܐ ܒܗܲܝܡܵܢܘܼܬܵ‌ܐ ܘܝܵܪ̈ܘܿܬܹ‌ܐ ܕܗ̇ܝ ܡܲܠܟܘܼܬܵ‌ܐ ܕܩܘܼܘܸܠܔ ܠܹܗ ܠܐܵܢܝܼ ܕܡܲܚܸܒܝܼ ܠܹܗ؟ 
ܐܝܼܢܵܐ ܐܲܚܬܘܿܢ ܡܘܼܣܠܹܐ ܠܵܘܟ݂ܘܿܢ ܠܡܸܣܟܹܢܵܐ. ܠܹܐ ܝܢܵܐ ܥܲܬܝܼܪܹ̈ܐ ܒܸܙܠܵܡܵܐ ܥܲܠܵܘܟ݂ܘܿܢ؟ ܠܹܐ ܝܢܵܐ ܥܲܬܝܼܪܹ̈ܐ ܒܸܓܪܵܫܵܘܟ݂ܘܿܢ ܠܒܹܝܬ ܕܝܼܢܵܐ؟ 
ܠܹܐ ܝܢܵܐ ܐܵܢܝܼ ܒܸܓܕܵܦܵܐ ܥܲܠܔ ܫܸܡܵܐ ܛܵܒ݂ܵܐ ܕܒܝܼܹܗ ܦܝܼܫ ܠܵܘܟ݂ܘܿܢ ܩܸܪܝܹܐ؟ 
ܐܸܢ ܒܫܲܪܝܼܪܘܼܬܵ‌ܐ ܡܲܟܡܘܼܠܹܐ ܝܬܘܿܢ ܢܵܡܘܿܣܵܐ ܡܲܠܟܵܝܵܐ ܐܲܝܟ݂ ܕܝܼܠܹܗ ܓܵܘ ܟܬܵܒ݂ܵܐ: ”ܡܲܚܸܒܸܬ ܠܫܒ݂ܵܒ݂ܘܼܟ݂ ܐܲܝܟ݂ ܓܵܢܘܼܟ݂،“ ܨܦܵܝܝܼ ܒܸܥܒ݂ܵܕܵܐ ܝܬܘܿܢ. 
ܐܝܼܢܵܐ ܐܸܢ ܒܸܚܙܵܝܵܐ ܝܬܘܿܢ ܦܵܬܵ‌ܐ، ܒܸܚܛܵܝܵܐ ܝܬܘܿܢ ܘܦܝܵܫܵܐ ܝܬܘܿܢ ܡܘܼܢܟܸܣܹܐ ܒܢܵܡܘܿܣܵܐ ܐܲܝܟ݂ ܫܵܡܛܵܢܹ̈ܐ ܕܢܵܡܘܿܣܵܐ. 
ܣܵܒܵܒ ܐܸܢ ܚܲܕ ܢܵܛܹܪ ܟܠܵܝܗ‌ܝ ܦܘܼܩܕܵܢܹ̈ܐ، ܐܝܼܢܵܐ ܢܵܦܹܠܔ ܒܚܲܕ ܡܸܢܵܝܗ‌ܝ، ܚܲܝܵܒ݂ܵܐ ܝܠܹܗ ܒܟܠܵܝܗ‌ܝ. 
ܣܵܒܵܒ ܗ̇ܘ ܕܐܡܝܼܪܹܗ: ”ܠܵܐ ܙܵܢܹܝܬ،“ ܐܘܼܦ ܐܡܝܼܪܹܗ: ”ܠܵܐ ܩܵܛܠܹܬ.“ ܗܵܕܟ݂ܵܐ ܐܸܢ ܠܵܐ ܙܵܢܹܝܬ ܐܝܼܢܵܐ ܩܵܛܠܹܬ، ܗܘܹܐ ܠܘܼܟ݂ ܫܵܡܛܵܢܵܐ ܕܢܵܡܘܿܣܵܐ. 
ܗܵܕܟ݂ܵܐ ܗܲܡܙܸܡܘܼܢ ܘܗܵܕܟ݂ܵܐ ܦܠܘܿܚܘܼܢ ܐܲܝܟ݂ ܕܐܸܢ ܒܢܵܡܘܿܣܵܐ ܕܚܹܐܪܘܼܬܵ‌ܐ ܒܸܬ ܦܵܝܫܝܼܬܘܿܢ ܕܝܼܢܹܐ. 
ܣܵܒܵܒ ܕܝܵܢܬܵ‌ܐ ܕܠܵܐ ܪ̈ܲܚܡܹܐ ܒܸܬ ܗܵܘܝܵܐ ܠܗ̇ܘ ܕܠܵܐ ܥܵܒܹܕ ܪ̈ܲܚܡܹܐ. ܪ̈ܲܚܡܹܐ ܟܹܐ ܓ݂ܵܠܒܝܼ ܠܕܝܵܢܬܵ‌ܐ. 
ܡܘܼܕܝܼ ܝܘܼܬܪܵܢܵܐ ܐܝܼܬ ܐܲܚܘܿܢܘܵܬ‌ܝܼ̈، ܐܸܢ ܚܲܕ ܐܢܵܫܵܐ ܐܵܡܹܪ ܕܐܝܼܬ ܠܹܗ ܗܲܝܡܵܢܘܼܬܵ‌ܐ ܐܝܼܢܵܐ ܠܲܝܬ ܠܹܗ ܦܘܼܠܚܵܢܹ̈ܐ؟ ܡܵܨܝܵܐ ܗܲܝܡܵܢܘܼܬܹܗ ܦܲܪܩܵܐ ܠܹܗ؟ 
ܐܸܢ ܐܲܚܘܿܢܵܐ ܝܲܢ ܚܵܬܵ‌ܐ ܠܲܝܬ ܠܗܘܿܢ ܓ̰ܘܼܠܹ̈ܐ ܘܠܵܐ ܡܹܐܟ݂ܘܼܠܬܵ‌ܐ ܕܝܵܘܡܵܐ، 
ܘܐܵܡܹܪ ܐܸܠܵܝܗ‌ܝ ܚܲܕ ܡܸܢܵܘܟ݂ܘܿܢ: ”ܙܹܠ݇ܡܘܼܢ ܒܫܠܵܡܵܐ، ܫܚܘܿܢܘܼܢ ܘܣܒܹܥܡܘܼܢ،“ ܐܝܼܢܵܐ ܠܵܐ ܝܵܗܒ݂ܝܼܬܘܿܢ ܠܗܘܿܢ ܣܢܝܼܩܘܼܝܵܬܹ̈‌ܐ ܕܦܲܓ݂ܪܵܐ، ܡܘܼܕܝܼ ܝܠܹܗ ܝܘܼܬܪܵܢܵܐ؟ 
ܗܵܕܟ݂ܵܐ، ܐܘܼܦ ܗܲܝܡܵܢܘܼܬܵ‌ܐ ܕܠܵܐ ܦܘܼܠܚܵܢܹ̈ܐ ܡܝܼܬܬܵ‌ܐ ܝܠܵܗ̇ ܒܢܲܦ̮ܫܘܼܗ̇. 
ܐܝܼܢܵܐ ܚܲܕ ܒܸܬ ܐܵܡܹܪ: ”ܐܲܢ݇ܬ ܐܝܼܬ ܠܘܼܟ݂ ܗܲܝܡܵܢܘܼܬܵ‌ܐ، ܘܐܵܢܵܐ ܐܝܼܬ ܠܝܼ ܦܘܼܠܚܵܢܹ̈ܐ.“ ܡܲܚܙܝܼ ܠܝܼ ܗܲܝܡܵܢܘܼܬܘܼܟ݂ ܕܠܵܐ ܦܘܼܠܚܵܢܹ̈ܐ، ܘܐܵܢܵܐ ܒܸܬ ܡܲܚܙܸܢܘܼܟ݂ ܗܲܝܡܵܢܘܼܬ‌ܝܼ ܒܝܲܕ ܦܘܼܠܚܵܢܝܼ̈. 
ܐܲܢ݇ܬ ܟܹܐ ܗܲܡܸܢܸܬ ܕܐܝܼܬ ܚܲܕ ܐܲܠܵܗܵܐ. ܪܵܒܵܐ ܨܦܵܝܝܼ ܒܸܥܒ݂ܵܕܵܐ ܝܘܸܬ؛ ܐܘܼܦ ܫܹܐܕܹ̈ܐ ܟܹܐ ܗܲܡܸܢܝܼ ܘܟܹܐ ܪܵܓܕܝܼ. 
ܒܵܥܹܝܬ ܕܝܵܕܥܹܬ، ܝܵܐ ܒܲܪܢܵܫܵܐ ܣܦܝܼܩܵܐ، ܕܗܲܝܡܵܢܘܼܬܵ‌ܐ ܕܠܵܐ ܦܘܼܠܚܵܢܹ̈ܐ ܒܲܛܝܼܠܬܵ‌ܐ ܝܠܵܗ̇؟ 
ܠܵܐ ܦܝܼܫ ܠܹܗ ܡܘܼܟܫܸܛܵܐ ܒܵܒܲܢ ܐܲܒ݂ܪܵܗܵܡ ܒܝܲܕ ܦܘܼܠܚܵܢܘܼ̈ܗ‌ܝ ܐܝܼܡܲܢ ܕܡܘܼܩܪܸܒ݂ ܠܹܗ ܠܐܝܼܣܚܵܩ ܒܪܘܿܢܹܗ ܥܲܠܔ ܡܲܕܒܚܵܐ؟ 
ܒܸܚܙܵܝܵܐ ܝܘܸܬ ܕܵܐܟ݂ܝܼ ܗܲܝܡܵܢܘܼܬܹܗ ܘܦܘܼܠܚܵܢܘܼ̈ܗ‌ܝ ܐܣܝܼܪܹ̈ܐ ܝܗܘܵܘ ܒܥܘܼܕܵܠܹܐ، ܘܗܲܝܡܵܢܘܼܬܹܗ ܦܝܼܫ ܠܵܗ̇ ܡܘܼܟܡܸܠܬܵ‌ܐ ܒܦܘܼܠܚܵܢܘܼ̈ܗ‌ܝ. 
ܘܦܝܼܫ ܠܹܗ ܬܘܼܡܸܡܵܐ ܟܬܵܒ݂ܵܐ ܕܐܡܝܼܪܹܗ: ܗܘܼܡܸܢܹܗ ܐܲܒ݂ܪܵܗܵܡ ܒܐܲܠܵܗܵܐ ܘܦܝܼܫ ܠܵܗ̇ ܚܘܼܫܒܸܢܬܵ‌ܐ ܐܸܠܹܗ ܠܙܲܕܝܼܩܘܼܬܵ‌ܐ، ܘܦܝܼܫ ܠܹܗ ܩܸܪܝܵܐ ܚܲܒ݂ܪܵܐ ܕܐܲܠܵܗܵܐ. 
ܒܸܚܙܵܝܵܐ ܝܬܘܿܢ، ܕܐܢܵܫܵܐ ܟܹܐ ܦܵܐܹܫ ܡܘܼܟܫܸܛܵܐ ܒܦܘܼܠܚܵܢܘܼ̈ܗ‌ܝ ܘܠܵܐ ܒܗܲܝܡܵܢܘܼܬܵ‌ܐ ܒܢܲܦ̮ܫܘܼܗ̇. 
ܠܵܐ ܗܵܕܟ݂ܵܐ ܐܘܼܦ ܪܵܚܵܒ݂ ܙܵܢܝܼܬܵ‌ܐ ܦܝܼܫ ܠܵܗ̇ ܡܘܼܟܫܸܛܬܵ‌ܐ ܒܦܘܼܠܚܵܢܘܼ̈ܗ̇ ܐܝܼܡܲܢ ܕܡܘܼܫܪܹܐ ܠܵܗ̇ ܠܓܵܫܘܿܫܹ̈ܐ ܘܫܘܼܕܪܵܝ ܠܵܗ̇ ܒܚܕܵܐ ܐܘܼܪܚܵܐ ܐܚܹܪܬܵ‌ܐ؟ 
ܣܵܒܵܒ ܕܵܐܟ݂ܝܼ ܕܦܲܓ݂ܪܵܐ ܕܠܵܐ ܪܘܼܚܵܐ ܡܝܼܬܵ‌ܐ ܝܠܹܗ، ܗܵܕܟ݂ܵܐ ܐܘܼܦ ܗܲܝܡܵܢܘܼܬܵ‌ܐ ܕܠܵܐ ܦܘܼܠܚܵܢܹ̈ܐ ܡܝܼܬܬܵ‌ܐ ܝܠܵܗ̇.