ܓܠܝܢܐ. 3. ”ܘܠܡܲܠܲܐܟ݂ܵܐ ܕܥܹܕܬܵ‌ܐ ܕܓܵܘ ܣܲܪܕܝܼܣ ܟܬܘܿܒ݂: ’ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܗ̇ܘ ܕܐܝܼܬ ܠܹܗ ܫܒܲܥ ܪ̈ܘܼܚܹܐ ܕܐܲܠܵܗܵܐ ܘܫܲܒ݂ܥܵܐ ܟܵܘܟ݂ܒܹ̈ܐ: ”ܟܹܐ ܝܵܕܥܹܢ ܠܦܘܼܠܚܵܢܘܼ̈ܟ݂، ܕܐܝܼܬ ܠܘܼܟ݂ ܫܸܡܵܐ ܕܚܵܝܵܐ ܝܘܸܬ، ܐܝܼܢܵܐ ܡܝܼܬܵ‌ܐ ܝܘܸܬ. ”ܪܥܘܿܫ، ܘܡܲܩܘܝܼ ܠܡܸܢܕܝܼܵܢܹ̈ܐ ܕܦܝܵܫܵܐ ܝܢܵܐ ܟܲܕ ܗܕܝܼܪܹܐ ܝܗܘܵܘ ܠܸܡܝܵܬܵ‌ܐ، ܣܵܒܵܒ ܠܵܐ ܚܙܹܐ ܠܝܼ ܠܦܘܼܠܚܵܢܘܼ̈ܟ݂ ܡܘܼܟܡܸܠܹܐ ܩܲܕܡ ܐܲܠܵܗ‌ܝܼ. ”ܒܵܣ ܕܟ݂ܘܿܪ ܡܘܼܕܝܼ ܩܘܼܒܸܠܔ ܠܘܼܟ݂ ܘܫܡܝܼܥ ܠܘܼܟ݂، ܢܛܘܿܪܹܗ ܘܬܲܘܸܒ. ܘܐܸܢ ܠܵܐ ܪܵܥܫܹܬ، ܒܸܬ ܐܵܬܹܝܢ ܐܲܝܟ݂ ܓܹܢܵܒ݂ܵܐ، ܘܠܹܐ ܝܵܕܥܹܬ ܒܐܲܝܢܝܼ ܣܵܥܲܬ ܒܸܬ ܐܵܬܹܝܢ ܥܲܠܘܼܟ݂. ”ܐܝܼܢܵܐ ܐܝܼܬ ܠܘܼܟ݂ ܚܲܕܟܡܵܐ ܐܢܵܫܹ̈ܐ ܓܵܘ ܣܲܪܕܝܼܣ ܕܠܵܐ ܟ̰ܘܼܦܠܸܢܗܘܿܢ ܓ̰ܘܼܠܵܝ̈ܗ‌ܝ. ܐܵܢܝܼ ܒܸܬ ܚܵܕܪܝܼ ܥܲܡܝܼ ܒܓ̰ܘܼܠܹ̈ܐ ܚܘܵܪܹ̈ܐ ܣܵܒܵܒ ܚܫܝܼܚܹܐ ܝܢܵܐ. ”ܗ̇ܘ ܕܓ݂ܵܠܹܒ ܒܸܬ ܦܵܐܹܫ ܗܵܕܟ݂ܵܐ ܡܘܼܠܒܸܫܵܐ ܓ̰ܘܼܠܹ̈ܐ ܚܘܵܪܹ̈ܐ، ܘܗܸܟ̃ ܠܹܐ ܓܵܪܕܹܢܹܗ ܫܸܡܹܗ ܡ̣ܢ ܟܬܵܒ݂ܵܐ ܕܚܲܝܹ̈ܐ، ܘܒܸܬ ܡܵܘܕܹܝܢ ܒܫܸܡܹܗ ܩܲܕܡ ܒܵܒܝܼ ܘܩܲܕܡ ܡܲܠܲܐܟ݂ܘܼ̈ܗ‌ܝ. ”ܗ̇ܘ ܕܐܝܼܬ ܠܹܗ ܢܵܬܝܵܬܹ̈‌ܐ، ܫܵܡܹܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈‌ܐ.“‘ ”ܘܠܡܲܠܲܐܟ݂ܵܐ ܕܥܹܕܬܵ‌ܐ ܕܓܵܘ ܦ̮ܝܼܠܵܕܲܠܦ̮ܝܼܵܐ ܟܬܘܿܒ݂: ’ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܗ̇ܘ ܕܝܼܠܹܗ ܩܲܕܝܼܫܵܐ ܘܫܲܪܝܼܪܵܐ، ܗ̇ܘ ܕܐܝܼܬ ܠܹܗ ܩܕܝܼܠܵܐ ܕܕܵܘܝܼܕ، ܗ̇ܘ ܕܟܹܐ ܦܵܬܹܚ ܘܐܢܵܫܵܐ ܠܹܐ ܕܵܒܹܪ، ܘܟܹܐ ܕܵܒܹܪ ܘܐܢܵܫܵܐ ܠܹܐ ܦܵܬܹܚ: ”ܟܹܐ ܝܵܕܥܹܢ ܠܦܘܼܠܚܵܢܘܼ̈ܟ݂، ܗܵܐ، ܩܵܡ ܝܵܗܒܹܢܘܼܟ݂ ܬܲܪܥܵܐ ܦܬܝܼܚܵܐ، ܗ̇ܘ ܕܐܘܼܦ ܚܲܕ ܠܹܐ ܡܵܨܹܐ ܕܵܒܹܪܹܗ، ܣܵܒܵܒ ܐܝܼܬ ܠܘܼܟ݂ ܚܲܕܟ̰ܵܐ ܚܲܝܠܵܐ، ܘܢܛܝܼܪܘܼܟ݂ ܠܗܹܡܸܙܡܵܢܝܼ ܘܠܵܐ ܣܪܝܼܒ݂ ܠܘܼܟ݂ ܠܫܸܡܝܼ. ”ܗܵܐ، ܐܵܢܝܼ ܕܝܼܢܵܐ ܡ̣ܢ ܟܢܘܼܫܬܵ‌ܐ ܕܣܵܛܵܢܵܐ، ܐܵܢܝܼ ܕܒܹܐܡܵܪܵܐ ܝܢܵܐ ܒܘܼܬ ܓܵܢܵܝܗ‌ܝ ܕܝܗܘܼܕܵܝܹ̈ܐ ܝܢܵܐ، ܟܲܕ ܠܹܐ ܝܢܵܐ ܘܕܲܓܘܼܠܹܐ ܝܢܵܐ، ܒܸܬ ܡܲܥܒܸܕܸܢܗܘܿܢ ܕܐܵܬ‌ܝܼ ܘܣܵܓ݂ܕܝܼ ܩܲܕܡ ܐܲܩܠܵܬܘܼ̈ܟ݂، ܘܕܝܵܕܥܝܼ ܕܐܵܢܵܐ ܩܵܡ ܡܲܚܸܒܸܢܘܼܟ݂. ”ܣܵܒܵܒ ܢܛܝܼܪܘܼܟ݂ ܦܘܼܩܕܵܢܝܼ ܠܸܚܡܵܠܵܐ، ܐܘܼܦ ܐܵܢܵܐ ܒܸܬ ܢܵܛܪܹܢܘܼܟ݂ ܡ̣ܢ ܣܵܥܲܬ ܕܓ̰ܘܼܪܵܒܵܐ، ܗ̇ܝ ܕܗܕܝܼܪܬܵ‌ܐ ܝܠܵܗ̇ ܠܹܐܬܵܝܵܐ ܥܲܠܔ ܟܠܵܗ̇ ܒܪܝܼܬܵ‌ܐ، ܠܓ̰ܲܪܘܼܒܹܐ ܠܐܵܢܝܼ ܕܒܸܥܡܵܪܵܐ ܝܢܵܐ ܥܲܠܔ ܐܲܪܥܵܐ. ”ܒܹܐܬܵܝܵܐ ܝܘܸܢ ܓ̰ܲܠܕܹܐ. ܕܒ݂ܘܿܩ ܠܡܸܢܕܝܼ ܕܐܝܼܬ ܠܘܼܟ݂، ܕܐܘܼܦ ܚܲܕ ܠܵܐ ܫܵܩܹܠܔ ܠܟܠܝܼܠܘܼܟ݂. ”ܗ̇ܘ ܕܓ݂ܵܠܹܒ ܒܸܬ ܥܵܒ݂ܕܹܢܹܗ ܣܛܘܼܢܵܐ ܓܵܘ ܗܲܝܟܠܵܐ ܕܐܲܠܵܗ‌ܝܼ، ܘܠܹܐ ܦܵܠܹܛ ܐܚܹܪܢܵܐ ܠܒܲܕܲܪ، ܘܒܸܬ ܟܵܬܒܹܢ ܥܲܠܘܼܗ‌ܝ ܫܸܡܵܐ ܕܐܲܠܵܗ‌ܝܼ ܘܫܸܡܵܐ ܕܡܕܝܼܢ݇ܬܵ‌ܐ ܕܐܲܠܵܗ‌ܝܼ، ܐܘܿܪܸܫܠܸܡ ܚܲܕܬܵ‌ܐ، ܕܝܼܠܵܗ̇ ܒܸܨܠܵܝܵܐ ܡ̣ܢ ܫܡܲܝܵܐ ܡ̣ܢ ܐܲܠܵܗ‌ܝܼ، ܘܒܸܬ ܟܵܬܒܹܢ ܥܲܠܘܼܗ‌ܝ ܫܸܡܝܼ ܚܵܕܬܵ‌ܐ. ”ܗ̇ܘ ܕܐܝܼܬ ܠܹܗ ܢܵܬܝܵܬܹ̈‌ܐ، ܫܵܡܹܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈‌ܐ.“‘ ”ܘܠܡܲܠܲܐܟ݂ܵܐ ܕܥܹܕܬܵ‌ܐ ܕܓܵܘ ܠܵܕܝܼܩܝܼܵܐ ܟܬܘܿܒ݂: ’ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܗ̇ܘ ܕܝܼܠܹܗ ܐܵܡܹܝܢ، ܗ̇ܘ ܣܵܗܕܵܐ ܡܗܘܼܡܢܵܐ ܘܫܲܪܝܼܪܵܐ، ܫܘܼܪܵܝܵܐ ܕܒܪܝܼܬܵ‌ܐ ܕܐܲܠܵܗܵܐ: ”ܟܹܐ ܝܵܕܥܹܢ ܠܦܘܼܠܚܵܢܘܼ̈ܟ݂، ܕܠܵܐ ܩܲܪܝܼܪܵܐ ܝܘܸܬ ܘܠܵܐ ܚܲܡܝܼܡܵܐ. ܛܘܼܒ݂ܵܐ ܕܗܵܘܹܝܬ ܗܘܵܐ ܩܲܪܝܼܪܵܐ ܝܲܢ ܚܲܡܝܼܡܵܐ. ”ܗܵܕܟ݂ܵܐ، ܣܵܒܵܒ ܦܲܫܘܼܥܵܐ ܝܘܸܬ، ܠܵܐ ܚܲܡܝܼܡܵܐ ܘܠܵܐ ܩܲܪܝܼܪܵܐ، ܒܸܬ ܓܵܣܹܢܘܼܟ݂ ܡ̣ܢ ܦܘܼܡܝܼ. ”ܣܵܒܵܒ ܒܹܐܡܵܪܵܐ ܝܘܸܬ: ’ܥܲܬܝܼܪܵܐ ܝܘܸܢ، ܘܡܘܼܙܝܸܕܵܐ ܝܘܸܢ، ܘܠܡܸܢܕܝܼ ܠܹܐ ܝܘܸܢ ܣܢܝܼܩܵܐ.‘ ܐܝܼܢܵܐ ܠܹܐ ܝܘܸܬ ܒܝܼܕܵܥܵܐ ܕܫܲܩܝܼ ܝܘܸܬ، ܘܕܵܘܝܵܐ، ܘܡܸܣܟܹܢܵܐ، ܘܣܸܡܝܵܐ ܘܫܘܼܠܚܵܝܵܐ، ”ܒܝܼܵܗܒ݂ܵܐ ܝܘܸܢ ܡܸܠܟܵܐ ܐܸܠܘܼܟ݂ ܕܙܵܒ݂ܢܹܬ ܡܸܢܝܼ ܕܲܗܒ݂ܵܐ ܨܘܼܪܸܦܵܐ ܒܢܘܼܪܵܐ ܕܗܵܘܹܝܬ ܥܲܬܝܼܪܵܐ، ܘܓ̰ܘܼܠܹ̈ܐ ܚܘܵܪܹ̈ܐ ܠܸܠܒ݂ܵܫܵܐ ܕܠܵܐ ܦܵܝܫܵܐ ܚܙܝܼܬܵ‌ܐ ܢܟܸܦܬܵ‌ܐ ܕܫܘܼܠܚܵܝܘܼܬܘܼܟ݂، ܘܡܲܠܗܵܡ ܠܸܫܝܵܦܵܐ ܠܥܲܝ̈ܢܘܼܟ݂ ܕܚܵܙܹܝܬ. ”ܟܠܵܝܗ‌ܝ ܐܵܢܝܼ ܕܡܲܚܸܒܸܢܗܘܿܢ ܟܹܐ ܡܲܢܟܸܣܸܢܗܘܿܢ ܘܬܲܥܠܸܡܸܢܗܘܿܢ. ܒܵܣ ܗܘܝܼ ܛܲܢܵܢܵܐ ܘܬܲܘܸܒ. ”ܗܵܐ، ܟܸܠܝܵܐ ܝܘܸܢ ܩܲܕܡ ܬܲܪܥܵܐ ܘܬܲܩܬܘܼܩܹܐ. ܐܸܢ ܐܢܵܫܵܐ ܫܵܡܹܥ ܩܵܠܝܼ ܘܦܵܬܹܚ ܬܲܪܥܵܐ، ܒܸܬ ܥܵܒ݂ܪܹܢ ܠܟܸܣܠܹܗ، ܘܒܸܬ ܐܵܟ݂ܠܹܢ ܥܲܡܹܗ، ܘܗ̇ܘ ܥܲܡܝܼ. ”ܗ̇ܘ ܕܓ݂ܵܠܹܒ ܒܸܬ ܝܵܗܒܹܢܹܗ ܠܸܬܝܵܒ݂ܵܐ ܥܲܡܝܼ ܥܲܠܔ ܬܪܘܿܢܘܿܣܝܼ، ܕܵܐܟ݂ܝܼ ܕܐܘܼܦ ܐܵܢܵܐ ܓ݂ܠܝܼܒ ܠܝܼ ܘܝܬܝܼܒ݂ ܠܝܼ ܥܲܡ ܒܵܒܝܼ ܥܲܠܔ ܬܪܘܿܢܘܿܣܹܗ. ”ܗ̇ܘ ܕܐܝܼܬ ܠܹܗ ܢܵܬܝܵܬܹ̈‌ܐ، ܫܵܡܹܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈‌ܐ.“‘“