Yù Nepalappâ ni Apu Kesu Kiristu kâ Kuan.
1.
Netúrâ saw yù meyannung sù mesimmu sangaw nu mabì, nga inipalappâ ni Namarò kâ Apu Kesu Kiristu. Inibilin ni Namarò kâ Apu Kesu, tapè ipakánnámmu na sù ira masserbi kuna. Á yáyù nga jinok na laguk ni Apu Kesu yù daroban na ta umay nga mangipakánnámmu nikán. Á sikán si Kuan nga masserbi kuna. 
Á sinistíguák ku yù ngámin nga nasingak ku nga meyannung sù bilin ni Namarò ánna yù ngámin nga kinagi ni Apu Kesu Kiristu nikán ánna yù kingnguá na. 
Á pagayáyatan ni Namarò sikayu ngámin nga mabbibbik sawe libru nga meyannung sù mesimmu sangaw ánna yù ira nga magginná ta pabbibbik naw kuna, sikayu ngámin nga manángngák nga manguruk sù kagian na yawe túrâ. Ta ari mabayák, á mesimmu ngámin nga netúrâ saw. 
Sikán si Kuan, á mattúrákà nikayu nga tatole ni Namarò, nga makimoray kuna sù ira pitu nga ággagammungán ta purubinsia na Asia. Parè bì ta ikállà na kayu ni Namarò ánna iyawâ na nikayu yù napiá nga nonò naw, tapè magimammà kayu. Si Namarò yù Egga kunangan, nga awán ta pamegapu na ánna awán ta pagáddekán na. Á parè bì ta ikállà na kayu gapay nayù Ikararuá ni Namarò, ánna paggimammatan na kayu. Maggián yù Ikararuá na ta arubáng nayù ággitubangán ni Namarò, nga egga kuna yù pitu nga pakáwayyá na nga makkakerumá. 
Á parè bì ta ikállà na kayu gapay ni Apu Kesu Kiristu, á pagimammatan na kayu. Si Apu Kesu Kiristu yù mekatalà nga mangipakánnámmu ta meyannung kâ Namarò. Si Apu Kesu Kiristu yù napolu nga naginnanolay nga naggapu sù ira námmatay. Aggina yù Kotunán nga Patul nga mammaguray sù ira tatolay nga mammaguray ta dabbuno. Dayáwat tam laguk si Apu Kesu Kiristu. Aggina yù mangiddù nittam. Á initapil na yù baggi na megapu nittam. Á pinalubbáng na ittam, megapu sù dága na nga mangari sù liwiliwâ tam. 
Á inisipà na ittam sù pammagure na, tapè mammaguray ittam gapay. Á pinabbalin na ittam ta páppári, nga masserbi kâ Namarò nga Yáma na. Parè bì ta meparáyaw si Apu Kesu Kiristu ta áddè ta áddè. Aggina yù kotunán nga mammaguray ta áddè ta áddè. Mapalurò. Ammán. 
Á ginnán naw ta napiá, ta manoli sangaw si Apu Kesu Kiristu, nga masingan nga mappángè ta dabbuno, nga mepulù ta kunam. Á yù ira ngámin nga tatolay, masingad da ta kunam, mássiki yù ira ngámin nga namíká kuna. Á yù ira ngámin nga makkakerumá nga tatolay ta dabbuno, nga ari manguruk kuna, maraddam ira nga makkulè ta assing da, gapu ta duttál yù pamagikáru na nira. Kuruk nga mapalurò yaw. Ammán. 
Á yawe yù kagian ni Apu Namarò, “Sikán yù Namarò ta ngámin nga ajjan ánna yù Mamabbalin ta ngámin. Sikán yù Egga kunangan, nga awán ta pamegapu na ánna awán ta pagáddekán na, yù Makáwayyá ta ngámin,” kun na. 
Sikán si Kuan nga wagi naw megapu sù panguruk tam kâ Apu Kesu. Á gapu ta kepattatádde tam kâ Apu Kesu, mepagittá ittam nga mangiyangngà ta jigâ. Á magattam ittam lâ, gapu ta mesipà ittam gapay kâ Apu Kesu sù pammagure na. Á jinigirigâ dangà nayù ira ari manguruk, á pinapáno rangà nga inipeyángay ta pugu na Patmus, gapu ta pangilayalayâ ku sù bilin ni Namarò ánna yù kuruk nga meyannung kâ Apu Kesu. 
Á tádday nga ággo na Liggu, á kunnay ta sinangngalán nangà nayù Ikararuá ni Namarò, á kunnayà ta mattatagenà, á naginnâ ta likuk ku yù ngárál nga masikan, nga kunnay ta amariung. 
Á kinagi na nikán, “Itúrâ mu ta libru yù masingam mu, á itubbuk mu laguk sù ira tatolè nga makimoray nikán sù ira pitu nga ággagammungán sù ira ili na Epeso, Esmerna, Pergamu, Tiyatira, Sardis, Piladelpia, á ta ili na Lodisia gapay,” kun na. 
Á pakaginnâ sù ngárál, nallipayà, tapè innak ku yù magubobuk nikán. Á nasingak ku pitu ira nga nanáddagán na isingan, nga buláwán. 
Á ta tangngá nayù ira pitu nga nanáddagán na isingan egga yù kun na tolay nga Kaká na ngámin na tatolay, nga nanáddak nga nabbarawási ta apaddu nga nakáddè ta takki na yù kapaddu na, á nebarakà ta gáko na yù gámì nga buláwán. 
Á kitapuraw yù duddù na nga kun na kápà. Á yù matá na, naggatang ta kun na api. 
Á nasiling yù takki na ta kun na baronsi nga nalunák ta api, nga napalinis ta napiá. Á kun na sarò na dakal nga bagi yù ngárál na. 
Á sinangngalán na ta jiwanán nga limá na yù pitu nga bituan. Á ajjan nga mallawán ta simù na yù kunnay sù bayunetá nga duá yù ngárak na nga nataram. Á manawák yù mammang na nga kunnay ta paddalingáráng na bilák ta tangngá na ággaw. 
Á pakasingak ku kâ Apu, á napalakagà ta arubáng na, nga kunnay ta natay. Á kimmâ nangà sù jiwanán nga limá na, á kinagi na nikán, “Ari ka maganássing, ta sikán yaw. Sikán yù maggiánin sù awán paga ta naparò, á sikán yù maggián lâ paga ta kabalin na ngámin. Sikán yù Olu ánna yù Kaporianán. 
Sikán yù sigga-inángà nga matolay. Á sù ngaw, natayà. Ngam naginnanolayà, ta sikán yù Egga, nga matolay ta áddè ta áddè. Sikán yù mammaguray sù ira ikararuá nga egga ta gián na námmatay, ta sikán yù manangngal ta ánnúsi nayù paggianád da ta Kades. 
“Itúrâ mu laguk yù ngámin nga nasingam mu, ánna yù ipasingak ku nikaw nga keyarigán nayù egga kunangane ánna yù mesimmu paga sangaw nu duttál yù ággo na. 
Á kagiak ku laguk yù ari ngaw nepakánnámmu nga meyannung sù ira pitu nga bituan nga nasingam mu gangù ta jiwanán nga limâ ánna yù ira pitu nga nanáddagán na isingan. Yù kebalinán nayù pitu nga bituan yù ira pitu nga manaron sù ira tatolè nga makimoray nikán ta pitu nga ággagammungád da. Á yù kebalinán nayù ira pitu nga nanáddagán na isingan, aggira yù ira tatolè nga makimoray nikán sù ira pitu nga ággagammungán.”