Hebreos
Mɨnpazha Judío Awaruza Pɨnkɨh Para
Pɨnkɨh pammikane Judío awaruza an pɨnkɨh pam kit usparuza Jesucristowa kamtanamtu, mamaz awaruz usparuza naizninnamtu akwa. Mɨnpazha Judío awaruzne Jesucristora chɨhkashimtu, ussa an nɨjkulamanpa, an ñancha kamarɨt aizpa kianapa. Pammikane usparuza kurunnamtu, Judío awa kamarɨt aizpa kaiyamanpa, Jesucristo kamtamkin anza wat akwa, Dios Jesústa au sukin ɨnintɨt akwa (1.1-3).
Suasne pɨnkɨh pammikane Jesús Dios painkul i kamtanamɨztu, us Dioskasa ñamin uztɨt akwa. An sukin naiztuasmin, Jesúsne Dios ussa ɨnintɨt aizpa kamtɨt. Jesúsne an ñamin Dios pit kainammtuzkinkas (1.1) ángelkinkas (1.4–2.18) Moiséskinkas Josuékinkas (3.1–4.13) ñamin Judío pariyaruzkinkas (4.14–7.28) an katsa mika namtɨt. Jesucristo akwa, Diosne awaruza masas pit kin nanamtu (8.1–9.28). Jesucristo au akwa irɨt akwa, usne torokinkas pɨrikukinkas an tɨnta i, Jesús au katsa pariya namtɨt akwa. Diosne Jesucristora nɨjkultumikara watsat mɨlnazi, paiña kwail kirɨt aizpa wat kulninnapa, inna ishkumanpa. Ñamin Judío awa tororakas pɨrikurakas Dios akwa piantarɨtkas, Jesúsne au kwail akwa irɨt, ussa nɨjkultumikara watcha watsat mɨlnanapa (10.1-31).
Jesucristora nɨjkulamturuza awaruza watsat mɨlnanazi kainammtuasmin, pammikane ñamin akkwan Judío awaruzkas Jesústa nɨjkulara kaiznara. Capítulo 13kin pammikane Judío awaruza kurunnam kit chiwazha uspa akwa paikwat kit izmuruza kakishapu kiznamtu.
1
Diosne paiña painkul akwa awaruza paranara
1 Nane maza pit kainanashimtus, Diosta piankamanapa. An ñamin Diosne paiña kainammtuza kurunnara, paiña pit pananapa, an ñamin kwaltuza parananapa. Akkwan pijikas akkwan tuntukas usparuza paranara. 2 An minpa payura Diosne paiña painkulta ɨninta, aumɨza parananapa. Diosne ussa narɨt, wan chiwal sarɨt aizpa sapnapa, wan ɨninnapa. Dioskas paiña painkul akwa wan sukas wan chiyukas sara, wan pa kianapa. 3 Diospa painkulne Dioskanain watsal iztɨt, au awaruz “Dios kwisha wari” piankamanapa. Diosne paiña painkulkanain iztɨt. Us wan sarɨt aizpa iznamtu akwa, usne parat kit au sukinkas au chiyurakas us pashit aizpa kinazi, us tɨnta akwa. Diospa painkul au kwail kiarɨt aizpa sɨnam sarawane, usne chiyura nut kit Dios iztakin ɨninmɨzta.
Cristone ángelkinkas an tɨnta i
4 Mane Diosne paiña painkulta ángelkinkas an tɨnta sara. Katmizna Cristowa kalne ángelpa kalkinkas an tɨnta i. Dioskas ussa paiña painkul munninta, Dios kin namtɨt aizpa sapnapa. 5 Diosne mizurainkas ángelta ka kaiztachi:
“Nune ap painkul i.
Nane nua ap painkulta namnintau”✡ Sal 2.7
Mamasa ángelta ka kaiztachi:
“Nane up papihsh anash.
Nune ap painkul anazi.”✡ 2 S 7.14
6 An Dios painkulne wan ángeltuzkinkas anza tɨnta i. Dios paiña ñancha painkul au sura uztuza annakane, ka kaiznara:
“Wan ángeltuzne ussa wanmakkat kit ussa wakpuj wainñarawa.”✡ Dt 32.43
7 Dios ángeltuzpa parakane, usne sunkana kaiztu:
“Nane wan ángeltuza ap kiwaintuza namninnanash, nawa wakpuj wainñanapa.
Uspane inkwakanakas ippakanakas izanazi.”✡ Sal 104.4
8 Paiña painkulne ángeltuzkana chi. Diosne paiña painkulpa ka kaiztu:
“Nune Dios i. Nune pailta payukima ɨninnazi.
Ɨninkane, nune wan nil aizpa kinazi.
9 Nune wan wat kinpa pashimtu.
Nune kwail kinpa pashimtuchi.
Katmizna nane nua ɨninnapa nat kit nua up izmuruzkin an wat kulnintau.”✡ Sal 45.6-7
10 Ma pitchin Diosne paiña painkulta ka kaizta:
“Nune Anpat i. Nune an ñancha an su sara.
Nukas up chihtɨkasa wan chiyura wa aizpa sara.
11 Wan sarɨt aizpa pailtɨnazi. Nune mizurainkas pailmanazi.
Wanne pĩn pɨttukanain pailtɨnazi, tailchasachi akwa.
12 Pĩn pɨtta uk kit nan kit masaskana maizmu.
Nune, Dios painkulne, maizmanazi.
Nune wan payukima uznazi.”✡ Sal 102.25-27
13 Diosne mizurainkas paiña ángeltuza ka kaiznarachi:
“Ap ɨnintukin nakasa uztain,
ap aliztuza anuppanakima.”✡ Sal 110.1
14 Dios ángeltuza sunkana kaiznarachikas, Diosne ángeltuza ɨninnara, ussa kiwainñapa, ussa wakpuj wainñanapa. Usne usparuza ɨninnamtu, Diosta piantuza kiwainanapa, suntuz an kwail kiamanpa, chiyura uzanapa. Sunkana Diosne Diosta piantuza watsat mɨlnanazi.