1 Jesúsne suas ɨt kit paiña sura piannara. Paiña kammuruzne kwizpa kanpaara. 2 Kwaizkultu payura usne Judío kammu yalta ɨt kit kamtanamɨzta. Kwisha akkwan awane ussa mɨara. Kwisha akkwan pian akwa, iztaspaarɨt akwa, usparuzpain mɨmaara:

—¿Mɨnma an kamtam ussa kamtara? Iztain. Usne kwisha akkwan awaruza wat paninnamtu. 3 ¿Anne apas yal sammikaki? Usne Maríawa painkul i. Santiagokas, Josékas, Judaskas, Simónkas paiña aimpihshtuzpain apain uzamtu. Paiña kwampihshtuzkas au pɨpulura uzamtu, kizara.

Suasne uspane ussa aliz kulat kit izkiarachi. 4 Jesúsne usparuza ka kizanara:

—Mamaz suras awane “Dios pit kainammmikane wari” minñamtu. Dios pit kainammmika paiña sura ɨtne, paiña su awakas, paiña kwalkas, paiña yalta uzturuzkas ussa wat minñamtuchi, kiznara.

5 Suane Jesúsne akkwan ishturuza wat paninnasachi. Pitchimin ishturuza chihtɨkasa paat kit wat paninnara. 6 Usmin uspawa iztasparɨt, paiña pɨpuluras awa Jesústa nɨjularachi akwa.

Suasne usne akkwan ainki pɨpuluwara chat kit awara kamtanara. 7 Usne sun doce kammuruza akwanat kit kaiznara:

—Umɨza paas paas ɨninnanash. Kwail saliztuza awaras puzninnarain, kiznara. 8 Usne usparuza ankas kaiznara:

—Attishta ɨamtune, kasmin ɨwizanaka. Pankas, tuhkas, pialkas kwaman. Tɨwilkasa ɨrain. 9 Zapato nuk kit ɨrain. Paas kamisha kwaman. 10 Yalta naptane, suain pitwizanaka, ɨmtu payukima. 11 Awane umɨza uspa pɨpulura napninamakane, up pit mɨshiamakane, tas puztain. Uspa iztakin mittɨ pil puhstɨt ulpiantawa, uspa kwail kiarɨt aizpa piankamanapa, kiznara.

12 Suasne kammuruzne paas paas ɨat kit Dios pit kainanaara, awa kwail kiarɨt aizpa maizanapa. 13 Uspane akkwan kwail saliztuza puzninnara. Pihshpikasa ishturuza nɨnat kit usparuza wat paninnara.

14 Herodesne manta kimmikane, awa Jesúspa kwinta kiarɨt aizpa mɨra. Wantuzne Jesús ara kwisha wat pianmazi. Usne Jesúspa ñanta mɨt kit kaizta:

—Juan munnammikane irɨtkas, me kuhsta. Katmizna usne akkwantuza wat paninnamtu, kizta.

15 Mamaztuzne kaizara:

—Usne Elías i.

Mamaztuzne kaizara:

—Dios pit kainammmika i. Usne ñamin Dios pit kainammmikakana i, kizara.

16 An mɨrawane, Herodesne kaizta:

—Juanne, na kɨzpu tɨttamikane, irɨt. Tas kuhsta akwa, ma uztu, kizta.

17-19 Ñamin Felipene, Herodespa aimpihshne, Herodíaskasa kasara kirɨt. Kwizta Herodesne paiña aimpihshpa ashampara kasara kirɨt. Herodías akwa Herodesne awara ɨninta, Juanta piznapa. Usne Juanta tɨtkasa kuh kit kajchira sɨpta. Herodíasne Juanta kwisha aliz kultɨt. Usne Juanta piantashina. Juanne Herodesta akkwan piji tɨnta kainara: “Paiña aimpihshpa ashampara kasara kitne, watchi,” kizta. 20 Herodíasne Juanta piantamanamtɨt. Herodesne uspa wat kwinta kit kit Juanta kwail kishitchi. Herodesne Juanta watsat kit kaizta: “Juanne wat awa i. Diosta pian i,” kizta. Katmizna paiña ashampane Juanta piantashininsachi. Herodesne Juanta impara impara mɨra. Juanne ussa kaizta: “Wat uztuchi,” kizta. Herodesne ussa mɨshira. Juanta mɨrawane, Herodesne ayukta kwail minta. 21 Wat payura, us kawira payura, Herodesne akkwan gobierno awaruzakas, suldaru awaruzakas, Galilea suras anpattuzakas kumira kwinnara. Sun payura Herodíasne Juanta piantaninta. 22 Sun payura Herodíaspa pashune kumira unamkin nap kit ku kimɨzta. Herodeskas paiña izmuruzkas kwisha wat kulazi. Katmizna sun manta kimmikane Herodíaspa pashura kaizta:

—Chiwazha paikukane, sunpawa tanash, kizta.

23 Mamasa an tɨnta ussa ka kin namta:

—Chiwazha paikukane, sunpawa tanash. Na kakwa mɨj aizpa tanash, kizta. 24 Usne tas puz kit akkuhshta mɨmara:

—¿Chima paikwanash? kizta.

Herodíasne pashura kaizta:

—Juan munnammikawa kɨzpu tɨt kit karanka, kizta.

25 Sun urain musittune manta kimmikakin ãĩn nap kit paikwat kit kaizta:

—Mamin Juan munnammikawa kɨzpu pashu. Pɨlattura unari, izna, kizta.

26 Sun manta kimmikane kwisha tayalta. Usne ussain minta: “Ap izmuruzne na kaizta aizpa mɨara. Nane uspa iztakin na kaizta aizpa kimanash kaizsachish,” minta. 27 Suasne manta kimmikane suldaru awara ɨninta, Juanpa kɨzpu karanpa. 28 Usne kajchira ɨt kit tɨmpukin kɨzpu tɨtta. Usne pɨlattura kɨzpukasa karat kit musittura mɨlat. Musittune akkuhshta mɨlara.

29 Sun mɨarawane, Juanpa kammuruzne ɨat kit ussa muat kit pilta kamaara.

30 Mamaz sura kaiyarawane, sun doce ɨnintuzne Jesús tura wanmakkat kit ussa chiwazha kiarɨt aizpakas chiwazha kamtanarɨt aizpakas kaizara. 31 Kwisha akkwan awa Jesús tukin aarɨt akwa, uspane kuasachi. Katmizna Jesúsne usparuza kaiznara:

—Mamaz sura, awa tuchira, ɨzhain, pitchin kwaizkulana, kiznara.

32 Suasne Jesúskas paiña kammuruzkas kanuawara ɨara, pul surakima.

33 Akkwan awane uspa ɨamtura izat kit ussa piankaara. Sua pɨpuluras awane mittɨwara ãĩn chaara, uspakin an ñancha piannaana. Uskasa wanmakkaara. 34 Kanuaras kihshtawane, Jesúsne akkwan awaruza iznat kit usparuza kiwainshinara, uspa pɨrikukana izarɨt akwa, uspa kwira kimchiruzkana izarɨt akwa. Usne usparuza akkwan kamtanamɨzta. 35 Nashtɨmtuasmin, paiña kammuruzne ussa aat kit kaizara:

—Sun sune pul i. Awa purachi. Nashtui. 36 Usparuza ɨninnari, ɨanapa, kasha sura kasha pɨpulura chiwazha paitkuanapa, kizara.

37 Usne usparuza sɨnkanara:

—Umin kumira kwinnari, kuiznapa, kiznara.

Uspane ussa kaizara:

—Sunpawa pan paitkwashitne, aune, paas cien payurakima kal kitpamakpas. Aune sunpawa pial mɨjchimakpas, awaruza kumira kwinnana, kizara.

38 Usne usparuza mɨmanara:

—¿Yawa panma mɨjmakpas? ¡Izna ɨrain! kiznara.

Sairawane, uspane kaizara:

—Aune cinco pankas paas pishkarukas mɨjmakpas, kizara.

39 Suasne Jesúsne kaiznara:

—Pɨtkin uzninwizanaka, akkwantuzne apain akkwantuzne anta, kiznara. 40 Uspane sunpawa uzninnara, cienkimakas cincuentakimakas. 41 Usne cinco pankas paas pishkarukas sapta. Chiyura izak kit Diosta aishtaish kizta. Usne pan kɨz kit kammuruza kwinnara, wanta nailnanapa. Usne paas pishkarukas wanta nailnara. 42 Wan awane kuat kit tukkarɨt. 43 Akkwan pitti pitti tizara. Kammuruzne doce tɨmta pankasa pishkarukasa sap winñara. 44 Kwisha akkwan awane kuara. Usparuzpain cinco mil ampune kuara.

45 Suasne usne paiña kammuruza kanuara ɨninnara, uspa an ñancha kwakkanapa, Betsaida pɨpulurakima. Kwiztane usne wanta ɨninnara uspa yaltakima. 46 Wantuza ɨninnarawane, usne ɨzara Diosta paikwan ɨrɨt. 47 Tɨlkwil parɨkane, kammuruzne kanuawara ɨat kit katsa pi paizkara piannaara. Jesúsne mazainpa piltain nukkultɨt. 48 Usne usparuza iznara, tɨnta tailtuasmin. Inkwane tɨnta pamtu akwa, uspane wat kwakkasachi. Tɨlawain, tɨlkwilmin usne usparuza mittɨwarain pi ɨsal ɨsal atchara. Usne usparuza pɨnnash minta. 49 Uspane ussa pi ɨsal chara izarawane, usparuzpain minñat kit kwianñara: “Ɨra awa izpul iztumakpas,” kizara. 50 Wanne ussa izat kit ishkuarɨt. Mamin Jesúsne usparuza kwinta kit kit kaiznara:

—Uruza kwira kinanash. Tɨnta kultain. Nane Jesús ish. Ishkuman, kiznara.

51 Jesús kanuara warawane, usne inkwa pailninta. Uspane us akwa ishkuat kit iztaspaarɨt. 52 Jesús pan wanta nailnarawane, uspane Jesús wan kit aizpa mɨarachi.

53 Kwakara kwakkaarawane, uspane Genesaret sura piannaat kit kanuara pimamin kantaara. 54 Kanuaras kihsharawane, akkwan Genesaret pɨpuluras awane Jesústa piannaara. 55 Sun awane wan surakima ɨat kit ishturuza kwaara, Jesús tukin piannankima. 56 Jesús ainki pɨpulurakas katsa pɨpulurakas ɨnkalparakas ɨmtuasmin, awane ishturuza kwaat kit mikin taara. Uspane Jesústa paikuara: “Aune up kwaksham puntakin paashimtumakpas, wat panapa,” kizara. Ussa paakane, ishtune wat parɨt. Jesúsne ishturuza wat paninnarɨt.