1 Yinni Gusunɔ u nɛɛ,

i kɔbɑ soowo.

Wee yibɛrɛbɑ bɑ nɛn sɑ̃ɑ yeru wuusimɑ nɡe kɑsi.

Domi Isirelibɑ bɑ nɛn ɑrukɑwɑni kusiɑ.

Mɑ bɑ nɛn sɔ̃ɔsiru yinɑ.

2 Bɑ koo mɑn nɔɔɡiru suemɑ bu nɛɛ,

bɑ nɛ ben Yinni yɛ̃.

3 Adɑmɑ bɑ ɡeɑ deri,

mɑ yibɛrɛbɑ bɑ koo bu nɑɑ swĩi.

4 Bɑ tii sinɑmbu kuɑ

bɑ ǹ mɑn sɑɑwɑrɑ kue.

Mɑ bɑ bũnu sekɑ kɑ sii ɡeesu kɑ wurɑ.

Yen sɔ̃nɑ bɑ koo kɑm ko.

5 Bɛɛ Sɑmɑriɡibu, nɑ bɛɛn nɑɑ wurɑɡiɑ ye tusɑ.

Nɑ mɑɑ kɑ bɛɛ mɔru mɔ̀.

Sɑɑ yerɑ̀ i ko i sinɑ bɑ ku n bɛɛ tɑɑrɛ wɛ̃.

6 Wi u bwɑ̃ɑrokunun sɔmburu yɛ̃ Isirelibɑ sɔɔ

wiyɑ u nɑɑ wurɑɡiɑ ye kuɑ.

Yɑ ǹ sɑ̃ɑ Gusunɔ.

Yen sɔ̃nɑ bɑ koo ye kɔsuku muku muku.

7 Wee i woo duurɑ,

yen sɔ̃nɑ i ko i woo bɔkɔ ɡɛ̃.

Mɔndu ɡɑrɑ nɛɛ, dobi bɛm sɑri ku rɑ n som mɔ.

I n mɑɑ yɛ̃ mɑ bɛɛn ɡbeɑn dĩɑnu nù n dɑɑ ɡeɑ kuɑ,

sɔbɑ bɑ koo nu ɡurɑ.

8 Isirelibɑ bɑ derɑ bɑ bu mwɛ.

Be wee bwesenu sɔɔ nɡe weke te ɡoo kun mɑɑ kĩ.

9 Domi bɑ dɑ Asiriɔ nɡe ɡbeeku kɛtɛku ɡe ɡɑ tii kpɑre.

Bɑ dɑ bɑ somiru kɑsu mi.

10 Bɑ bwese tukunu ɡobi kɔsiɑ bɑ n kɑ nɔɔ tiɑ sɑ̃ɑ.

Adɑmɑ kɑ mɛ, kon bu mɛnnɑ,

kpɑ Asirin sinɑ boko u bu yoo sɔmɑ koosiɑ.

11 Isirelibɑ bɑ bũu turɑnu kuɑ nu dɑbi.

Niyɑ nu derɑ bɑ durum mɔ̀.

12 Bɑɑ nɑ̀ n bu nɛn woodɑbɑ yoruɑ sere kɑ yen ɡɑri piiminɔ,

bɑ rɑ ye ɡɑrisiwɑ nɡe ye yɑ wee tɔn tukon min di.

13 Bɑ rɑ yɛɛ ɡo bu kɑ mɑn yɑ̃kuru kuɑ,

kpɑ bu yin yɑɑ tem.

Adɑmɑ ben yɑ̃ku ni, nu ǹ mɑn doremɔ.

Nɑ ǹ ben torɑnu duɑri.

Kon bu sɛɛyɑsiɑ.

Yen sɔ̃nɑ bɑ koo ɡɔsirɑ bu dɑ Eɡibitiɔ.

14 Isirelibɑ bɑ tii sinɑ kpɑɑru bɑniɑ.

Mɑ bɑ nɛ ben tɑkɑ kowo duɑri.

Yudɑbɑ bɑ mɑɑ ben wuu dɑbinu ɡbɑ̃rɑru toosi.

Adɑmɑ kon ben wusu dɔ̃ɔ sɔkiri kpɑ u ben dii ɡeenu di.