1 Isirelin bweseru tɑ rɑɑ sɑ̃ɑwɑ nɡe resɛm ɡeɑ

ye yɑ rɑ mɑ too.

Adɑmɑ nɡe mɛ bɑ dɑbiɑmɔ,

nɡe mɛyɑ bɑ bũu yenu dɑbiɑsiɑmɔ.

Nɡe mɛ ben tem mu kuurɑmɔ,

nɡe mɛyɑ bɑ bũu yenu sɔmmɔ kɑ kpee ɡeenu.

2 Tɔn be, bɑ sɑ̃ɑwɑ ɡɔ̃rusu yiruɡibu.

Bɑ koo yen ɑre sɔbe.

Yinni Gusunɔ u koo ben bũu yee ni kɑ nin kpee ɡeenu kɔsuku.

3 Bɑ koo tɛ̃ nɛɛ, yèn sɔ̃ sɑ ǹ Gusunɔ nɑsie,

yen sɔ̃nɑ sɑ ǹ sinɑ boko mɔ.

Adɑmɑ tɛ̃n wɑ̃ɑ te sɑ wɑ̃ɑ mini,

mbɑ sinɑ boko koo mɑɑ kpĩ u sun wunɑnɑ.

4 Wee bɑ ɡɑri kɑm ɡerumɔ,

mɑ bɑ ɑrukɑwɑni bɔkumɔ kɑ bɔ̃ri weesuɡii.

Yen sɔ̃, siribu dɑbiɑmɔ nɡe yɑkɑ kɔ̃susu

si su rɑ kpi ɡbee te bɑ wukɑ sɔɔ.

5 Kpɑ Sɑmɑriɡii be bɑ nɑɑ buu wurɑɡuu sɑ̃ɑmɔ

ɡe ɡe wɑ̃ɑ Betɛli Afɛniɔ bu nɑndɑ

kpɑ bu ɡɔɔ sinɑ ɡen sɔ̃.

Gen yɑ̃ku kowobu bɑ koo diiri

bɑ̀ n wɑ ɡen bɛɛrɛ yɑ kpɑ.

6 Domi bɑ koo kɑ ɡu dɑ Asiriɔ

bu ɡu ben sinɑ boko wɛ̃.

Isirelibɑ bɑ koo sekuru wɑ.

Bɑ koo nɑ̀ n dɑɑ yɛ̃ ko

ye bɑ kɑ bũu kuɑ ben suunu sɔɔ.

7 Ǹ n Sɑmɑrin sɔ̃n nɑ, ye kpuro yɑ kpɑwɑ mi.

Domi bɑ koo kɑ yen sinɑ boko doonɑ

nɡe dɛkɑ ye nim mu kɑ doonɔ.

8 Bɑ koo ben bũu yenu kpuro kɔsuku mi bɑ torɑ.

Kpɑ yɑkɑsu kɑ sɑ̃ki yi kpi mi.

Sɑɑ ɡɑɑ sisi yè sɔɔ bɑ koo ɡuunu kɑ ɡunɡunu sɔ̃ bu nɛɛ,

i sun sɛ̃sikio i wukiri.

9 Yinni Gusunɔ u nɛɛ,

sɑɑ dɔmɑ tèn di Isirelibɑ bɑ durum kuɑ Gibeɑɔ,

bɑ torɑmɔ bɑ dɔɔwɑ.

N ǹ weenɛ tɑbu bu tɔn kɔ̃so be wɔri mi?

10 Nɛ, Yinni Gusunɔ kon bu sɛɛyɑsiɑ nɡe mɛ nɑ kĩ,

kpɑ bwesenu nu nɔɔ tiɑ ko nu bu wɔri ben torɑ bɑkɑnun sɔ̃.

11 Isirelibɑ bɑ sɑ̃ɑwɑ nɡe nɑɑ kpɛmi yi yi rɑ dobi tɑɑku.

Adɑmɑ kon suɡu doke ben wĩi burɑ ni sɔɔ.

Kon de Yudɑbɑ bu kɔrɔ ko,

kpɑ be, Yɑkɔbun bweseru bu tem kusɑnu kɔsuku.

12 Yen sɔ̃ tɛ̃, bɛɛ Isirelibɑ i ɡbee kpɑɑru koowo i ɡem duure.

Kpɑ i durom ɡɛ̃.

Domi sɑɑ yɑ turɑ i kɑ ɡɔsirɑmɑ nɛ, Yinni Gusunɔn mi,

kpɑ n bɛɛ susi n bɛɛ ɡeɑ kuɑ.

13 Adɑmɑ bɛɛ, i kɔ̃sɑ duurɑ mɑ i kɔ̃sɑ ɡɑ̃.

Mɑ i bɛɛn weesun ɑre di.

I bɛɛn nɑɑnɛ doke bɛɛn tiin dɑm

kɑ tɑbu kowo dɑbi dɑbiru sɔɔ.

14 Yen sɔ̃nɑ tɑbun wurenu koo nɔɔrɑ bɛɛn suunu sɔɔ.

Kpɑ bu bɛɛn ɡbɑ̃rɑnu kpuro kɔsuku

nɡe mɛ Sɑlumɑn sinɑ boko u Bɛti Aribɛli wɔri,

mɑ u bii mɛrobu kɑ ben bibu munkɑ.

15 Bɛɛ Betɛliɡibu, wee ye kon bɛɛ kuɑ bɛɛn nuku kɔ̃surun sɔ̃.

Bururu yɑm sɑ̃reru yɑnde,

tɑbu sɔɔrɑ bɑ koo bɛɛn sinɑ boko ɡo.