1 Yinni Gusunɔ u Sirusi ɡɔsɑ

u nùn nɛni kɑ win dɑm.

U koo bwesenu kpuro tɑɑre win wuswɑɑɔ,

kpɑ u sinɑmbun dɑm wunɑ.

U koo nùn wusun kɔnnɔsu wukiɑ su n kɛniɑre.

U nùn sɔ̃ɔwɑ u nɛɛ,

2 kon nun ɡbiiyɑ

kpɑ n wunɛn swɛɛ kpuro sɔmɛ yi nɔɔ nɛrɑ.

Kon ɡɑmbo sii ɡɑnduɡii kɑ yin kɔkɔrɔ sisuɡii bɔɔku.

3 Kon nun ɑrumɑni wɛ̃

ye yɑ rɑɑ beruɑ yɑm wɔ̃kuru sɔɔ,

kpɑ ɑ ɡiɑ mɑ nɛ Gusunɔ, Isirelibɑn Yinniwɑ

nɑ nun sokumɔ kɑ wunɛn yĩsiru.

4 Nɛn sɔmɔ Yɑkɔbu wi nɑ ɡɔsɑn sɔ̃nɑ

nɑ nun sokɑ kɑ wunɛn yĩsiru,

mɑ nɑ nun bɛɛrɛ bɑkɑ wɛ̃

bɑɑ mɛ ɑ ǹ mɑn yɛ̃.

5 Nɛnɑ Yinni Gusunɔ, ɡoo mɑɑ sɑri nɡe nɛ.

Yen sɔ̃nɑ nɑ nun dɑm wɛ̃ bɑɑ mɛ ɑ ǹ mɑn yɛ̃.

6 Kpɑ tɔmbu bu ɡiɑ

sɑɑ sɔ̃ɔ yɑri yerun di sere sɔ̃ɔ duu yerɔ

mɑ nɛnɑ Yinni Gusunɔ.

Goo mɑɑ sɑri nɡe nɛ.

7 Nɛnɑ nɑ rɑ de yɑm bururɑm

kɑ yɑm wɔ̃kurɑ n wɑ̃ɑ.

Nɛnɑ nɑ rɑ mɑɑ de ɑlɑfiɑ kɑ wɑhɑlɑ yɑ n wɑ̃ɑ.

Nɛ, Yinni Gusunɔwɑ nɑ rɑ ye kpuro ko.

8 Kon de nɑsɑrɑ yu nɑ wɔllun di nɡe ɡurɑ,

kpɑ tem mu nɔɔ wukiɑ mu de fɑɑbɑ yu kpi,

kpɑ ɡem mu kpɛ̃ɑ kɑ ye sɑnnu.

Nɛ, Yinni Gusunɔwɑ nɑ ye kpuro mɔ̀.

9 Bɔ̃rurowɑ tɔnu wi u kɑ win tɑkɑ kowo sikirinɑmɔ.

U sɑ̃ɑwɑ nɡe tem mɔndu te tɑ ten mɔmɔ bikiɑ tɑ nɛɛ,

mbɑ u mɔ̀ mi.

Ǹ kun mɛ nɡe ɡɑ̃ɑ ni u kuɑ mɑ nu nɛɛ,

u ǹ nɔmɑ du.

10 Bɔ̃rurowɑ wi u win tundo kɑ win mɛro bikiɑ u nɛɛ,

mbɑn sɔ̃nɑ i mɑn mɑrɑ mɛni.

11 Amɛniwɑ Gusunɔ Isirelibɑn Yinni Dɛɛro

wi u bu tɑkɑ kuɑ u bu sɔ̃ɔwɑ.

U nɛɛ, n ǹ bɛɛ i ko mɑn bikiɑ

ye kon kɑ nɛn bibu ko,

kpɑ i mɑn woodɑ wɛ̃ nɛn nɔmɑn sɔmburun sɔ̃.

12 Nɛnɑ nɑ tem kuɑ

mɑ nɑ tɔnu tɑkɑ kuɑ u n kɑ wɑ̃ɑ mɛ sɔɔ.

Nɛn nɔmuwɑ ɡɑ mɑɑ wɔllu tɛriɑ,

mɑ nɑ sɔ̃ɔ kɑ suru kɑ kperi yi yi mi.

13 Nɛ, Yinni Gusunɔ Dɑm kpuroɡii,

nɛnɑ nɑ Sirusi seeyɑ u kɑ ɡeɑ ko ye nɑ ɡɔ̃ru doke.

Kon win swɛɛ kpuro nɔɔ nɛrɑsiɑ.

U koo nɛn wuu Yerusɑlɛmun bɑnsu seeyɑ,

kpɑ u nɛn tɔn be bɑ rɑɑ yoru mwɛɛrɑ yɑrɑ yorun di

n kun kɑ kɔsiɑru ɡɑru.

14 Yinni Gusunɔ u Isirelibɑ sɔ̃ɔwɑ u nɛɛ,

Eɡibitiɡibu kɑ Etiopiɡibun dukiɑ yɑ koo ko bɛɛɡiɑ,

kpɑ Sebɑɡii be bɑ ɡunu bu nɑ bɛɛn mi,

bu ko bɛɛn yobu.

Bwese ni kpuro nu ko n bɛɛ swĩiwɑ

bɑ n nu yɔni bɔkuɑ.

Nu koo yiirɑ bɛɛn wuswɑɑɔ

kpɑ nu wurɑ nu nɛɛ,

bɛɛ tɔnɑn miyɑ nɛ, Gusunɔ nɑ wɑ̃ɑ.

Goo mɑɑ sɑri nɡe nɛ.

15 Gusunɔ Isirelibɑn Yinni ɑ sɑ̃ɑwɑ fɑɑbɑ kowo,

ɑdɑmɑ ɑ ǹ wɑɑrɔ kɑ nɔni.

16-17 Gusunɔ u Isirelibɑ fɑɑbɑ kuɑ ye yɑ ǹ nɔru mɔ.

Bɑ ǹ sekuru wɑsi sere kɑ bɑɑdommɑɔ.

Adɑmɑ be bɑ bwɑ̃ɑrokunu sekumɔ,

bɑ koo tukɑ kɑ sekuru.

18 Yinni Gusunɔ turowɑ u sɑ̃ɑ Gusunɔ.

Wiyɑ u wɔllu tɑkɑ kuɑ, mɑ u tem kuɑ.

U ǹ mɑɑ dere mu n wɑ̃ɑ dirum,

kpɑ hunde konibɑ bɑ n kɑ wɑ̃ɑ mɛ sɔɔ.

Wiyɑ u ɡeruɑ u nɛɛ,

wiyɑ Yinni Gusunɔ.

Goo mɑɑ sɑri nɡe wi.

19 U ǹ win ɡɑri ɡeruɑ ɡbɛnum ɡbɛnum.

U yi kpɑrɑwɑ bɑtumɑ sɔɔ.

U ǹ mɑɑ Yɑkɔbun bweseru sɔ̃ɔwɑ u nɛɛ,

tu nùn kɑsuo kɑm sɔɔ.

Wi, Yinni Gusunɔ, ɡeeyɑ u rɑ ɡere.

Gem ɡɑriyɑ u rɑ mɑɑ kpɑre.

yen sɔ̃, i mɛnnɑmɑ.

I susimɑ bɛɛ be i kpikiru suɑ tɑbun di.

Be bɑ bwɑ̃ɑroku dɑ̃ɑɡinu sɔɔwɑ,

mɑ bɑ bũu sokumɔ wi u ǹ kpɛ̃ u bu fɑɑbɑ ko,

bɑ ǹ yɛ̃ru mɔ.

21 I nɑ i tii tusiɑ,

kpɑ i kɑ bũu sɑ̃ɔ be nɑ

bu wesiɑnɑ ben tii tiinɛ sɔɔ.

Wɑrɑ u ɡeruɑ sɑɑ toren di ye yɑ koo koorɑ.

N ǹ nɛ, Yinni Gusunɔ ro?

Goo mɑɑ sɑri nɡe nɛ.

Nɛ turowɑ nɑ sɑ̃ɑ ɡemɡii wi u rɑ fɑɑbɑ ko.

22 Yen sɔ̃, bɛɛ be i wɑ̃ɑ hɑnduniɑn ɡoonu nnɛ kpuro sɔɔ,

i ɡɔsirɑmɑ nɛn mi, kpɑ i fɑɑbɑ wɑ.

Domi nɛnɑ nɑ sɑ̃ɑ Gusunɔ.

Goo mɑɑ sɑri nɡe nɛ.

23 Gemɑ nɑ ɡerumɔ.

Nɛn ɡɑri kun mɑɑ kɑm mɔ̀.

Nɑ bɔ̃ruɑ kɑ nɛn tiin yĩsiru nɑ nɛɛ,

dũuru bɑɑtere tɑ koo yiirɑ nɛn wuswɑɑɔ,

kpɑ nɔɔ bɑɑɡere ɡu bɔ̃re kɑ nɛn yĩsiru.

24 Bɑ koo ɡere bu nɛɛ,

nɛ turon miyɑ ɡem kɑ dɑm mu wɑ̃ɑ.

Be bɑ mɑn seesi kpuro bɑ koo sekuru wɑ.

25 Nɛ, Yinni Gusunɔwɑ kon Isirelibɑn bweseru kpuro ɡem wɛ̃

kpɑ tɑ n kɑ nuku dobu mɔ.