1 Bɛɛ be i wɑ̃ɑ i tomɑ, i swɑɑ dɑkio i nɔ.

Yinni Gusunɔwɑ mɑn ɡɔsɑ sɑɑ nɛn mɛron nukurun di.

U mɑn sokɑ kɑ nɛn yĩsiru ye bɑ mɑn mɑrɑ wurɛ.

2 Mɑ u derɑ nɛn ɡɑri yi kuɑ nɡe tɑkobi ye yɑ nɔɔ do.

U mɑn win nɔmɑ wukiri, u mɑn kɔ̃su.

U mɑn kuɑ nɡe sɛ̃u ɡe ɡɑ dɛ̃ɛ mɔ,

mɑ u mɑn doke win sɛ̃ɛ bwɑ̃ɑrɔ.

3 U mɑn sɔ̃ɔwɑ u nɛɛ,

Isirelin bweseru tɑ sɑ̃ɑwɑ win sɔm kowo.

Ten min diyɑ u koo win yiiko sɔ̃ɔsi.

4 Adɑmɑ nɛ, nɑ nɛɛwɑ,

kɑmɑ nɑ sɔmburu kuɑ.

Nɛn dɑm, kɑmɑ mu kuɑ.

Kɑ mɛ, nɑ yɛ̃ mɑ Gusunɔ nɛn Yinni u koo mɑn ɡem wɛ̃.

Nɑ ɑre yĩiyɔ win mi.

5 Yinni Gusunɔwɑ u mɑn ɡɔsɑ bɑ sere mɑn mɑrɑ,

n kɑ ko win sɔm kowo,

kpɑ n kɑ win tɔmbu Isirelibɑ, Yɑkɔbun bweseru ɡɔsiɑmɑ win mi.

Wee, u mɑn bɛɛrɛ dokemɔ.

Wiyɑ u mɑɑ mɑn dɑm wɛ̃ɛmɔ.

6 U nɛɛ, nɑ n kɑ sɑ̃ɑ win sɔm kowo,

kpɑ n kɑ Isirelibɑn bwese ni nu tie seeyɑ,

yɑ ǹ ɡɑ̃ɑnu turɑ.

Wee u mɑn kuɑ bwese tukunun yɑm bururɑm,

kpɑ n kɑ win fɑɑbɑ dɑ hɑnduniɑn ɡoonu nnɛ kpuro sɔɔ.

7 Yeniwɑ Gusunɔ, Isirelibɑn Yinni Dɛɛro

wi u bu fɑɑbɑ kuɑ,

u nun sɔ̃ɔwɑ, wunɛ wi ɑ sɑ̃ɑ dɑmɡibun yoo

wi tɔmbɑ tusɑ bɑ ɡɛmɑ.

U nɛɛ, sinɑmbɑ koo nun wɑ

kpɑ bu nun bɛɛrɛ wɛ̃.

Sinɑ bibɑ koo mɑɑ nun kpunɑ

nɛ, Isirelibɑn Yinni Dɛɛron sɔ̃,

nɛ wi nɑ sɑ̃ɑ nɑɑnɛɡii mɑ nɑ nun ɡɔsɑ.

8 Sɑɑ yɑ̀ n turɑ n kɑ nun fɑɑbɑ ko,

kon nun durom kuɑ kpɑ n nun somi.

Kon nun kɔ̃su

kpɑ n kɑ tɔmbu kpuro ɑrukɑwɑni bɔke sɑɑ wunɛn min di.

Kon de ɑ wunɛn tem sɔmɛ

kpɑ ɑ kpɑm wunɛn tɔmbu ben tem wesiɑ

mɛ mu bɑnsu sɑ̃ɑ tɛ̃.

9 Kon de ɑ dɛsobu yɑkiɑ bu doonɑ,

kpɑ ɑ be bɑ mɑɑ wɑ̃ɑ yɑm wɔ̃kurɔ sɔ̃ ɑ nɛɛ,

bu yɑrimɑ bu dɑ yɑm bururɑm sɔɔ,

kpɑ bɑ n sɑ̃ɑ nɡe yɑ̃ɑ ni nu dĩɑnu wɑɑmɔ

swɛɛn bɔkuɔ kɑ ɡuunɔ.

10 Gɔ̃ɔru kɑ nim nɔru kun bu mɔ̀.

Sɔ̃ɔ kɑ win yɑm susurɑ kun mɑɑ bu wɑhɑlɑ mɔ̀.

Domi wi u ben wɔnwɔndu mɔ,

wiyɑ u koo bu kpɑrɑ u kɑ dɑ mi bwii wɑ̃ɑ.

11 Nɛ, Yinni Gusunɔ, kon nɛn ɡuunu ɡɔsiɑ swɛɛ,

nɛn tɔmbu bu kɑ swɑɑ wɑ.

12 Be wee, bɑ wee sɑɑ tontonden di,

ben ɡɑbu sɑɑ sɔ̃ɔ yɛ̃sɑn nɔm ɡeu ɡiɑn di,

kɑ sɔ̃ɔ duu yeru ɡiɑn di,

ɡɑbu mɑɑ sɑɑ Eɡibitin berɑ ɡiɑn di.

13 Wɔllu, ɑ yɛ̃ɛrio.

Tem, ɑ nukuru doro.

Bɛɛ mɑɑ ɡuunu, i dɛsiru kɑro.

Domi Yinni Gusunɔ u win tɔmbu nukuru yɛmiɑsiɑmɔ.

Be bɑ nɔni sɔ̃ɔre, u ben wɔnwɔndu mɔ.

14 Yerusɑlɛmuɡibu bɑ mɔ̀,

Yinni Gusunɔ u sun deri,

mɑ u sun duɑri.

15 Adɑmɑ Gusunɔ u nɛɛ,

tɔn kurɔ u rɑ win bii wi u bɔm kɛ̃mɔ duɑri?

U ku rɑ win wɔnwɔndu ko?

Bɑɑ ù n duɑri, nɛ, nɑ ǹ nun duɑrimɔ, Yerusɑlɛmu.

16 Domi nɑ wunɛn yĩsiru yoruɑ nɛn nɔm tɑrɑrɔ.

Nɑ rɑ wunɛn ɡbɑ̃rɑru yɑɑye nɛn bwisikunu sɔɔ.

17 Wee be bɑ koo nun seeyɑ, bɑ wee.

Kpɑ be bɑ rɑɑ nun wɔri

bɑ wunɛn yɑ̃nu ɡurɑ bu yɑri min di.

18 A mɛɛrio ɑ kɑ sikerenɑ.

Wunɛn bibu wee bɑ wee, bɑ mɛnnɑmɔ wunɛn mi.

Bɑ ko n sɑ̃ɑ nɡe burɑ yɑ̃nu,

kpɑ ɑ n sɑ̃ɑ nɡe kurɔ kpɑo.

Nɛ, Yinni Gusunɔwɑ nɑ yeni bɔ̃ruɑ kɑ nɛn tiin wɑ̃ɑru.

19 Wunɛn tem mɛ bɑ rɑɑ wɔri bɑ sɑnkɑ,

tɔmbɑ koo dɑbiɑ mɛ sɔɔ bɑ n bɑɑsinɛ.

Be bɑ rɑɑ mɑɑ nun dɑm dimɔ,

bɑ koo doonɑ n tomɑ.

20 Wunɛn bii be bɑ mɑrɑ yoru

sɔɔ tem tukumɔ,

bɑ koo wurɑmɑ ben temɔ, kpɑ bu nun sɔ̃ bu nɛɛ,

tem mɛni, mu ǹ sun turɑ.

Sɑ kĩ bu mɑɑ sun sosiɑ.

21 Sɑɑ yerɑ kɑɑ tii bikiɑ ɑ nɛɛ,

wɑrɑ u nun bii beni mɑruɑ.

Domi ɑ wunɛn bibu biɑ,

ɑ ǹ mɑɑ ɡɑbu wɑ ɑ mɑrɑ

ye bɑ nun yinɑ bɑ doonɑ.

Wɑrɑ u bii beni seeyɑ.

A rɑɑ wɑ̃ɑwɑ wunɛ turo,

mɑn diyɑ bii beni bɑ nɑ.

22 Yinni Gusunɔ u nɛɛ,

wee nɑ kon tɔn tukobu yĩreru ɡɑru sɔ̃ɔsi

te tɑ koo de bu wunɛn bibu ɡurɑmɑ bu nun wesiɑ.

23 Sinɑmbu kɑ ben bii tɔn kurɔbu bɑ koo nun nɔɔri.

Bɑ koo nun kpunɑ bu wiru tem ɡirɑri,

kpɑ bu tii kɑwɑ bu nun bɛɛrɛ bɑkɑ wɛ̃.

Sɑnɑm mɛyɑ kɑɑ ɡiɑ mɑ nɛnɑ nɑ sɑ̃ɑ Yinni Gusunɔ.

Be bɑ mɑɑ mɑn yĩiyɔ bɑ ǹ sekuru wɑsi.

24 Ye tɑbu durɔ u ɡurɑ tɑbu sɔɔ,

bɑ koo kpĩ bu nùn ye wɔrɑri?

Be dɑmɡii u yoru mwɑ,

bɑ koo kpĩ bu bu yɑkiɑ?

25 Yinni Gusunɔ u nɛɛ, oo, mɛyɑ,

kon dɑmɡiin yobu yɑkiɑ,

kpɑ n tɑbu durɔn yɑ̃ɑ ni u rɑɑ ɡurɑ wɔrɑ.

Domi kon kɑ wunɛn yibɛrɛbɑ sɑnnɑ,

kpɑ n wunɛn bibu fɑɑbɑ ko.

26 Kon de be bɑ nun tɑɑre bu ɡoonɑ,

kpɑ ben tɔn ɡoberu kɑ ben mɔru yu bu ɡo nɡe tɑm,

kpɑ tɔmbu kpuro bu ɡiɑ

mɑ nɛ, Yinni Gusunɔwɑ nɑ nun fɑɑbɑ mɔ̀.

Nɛnɑ nɑ sɑ̃ɑ wunɛ Yɑkɔbun Yinni dɑmɡii

wi u nun yɑkiɑ.