13
1 Wee nɛn nɔni yi ye kpuro wɑ,
nɛn swɑsu su mɑɑ ye kpuro nuɑ,
mɑ nɑ ye lɑɑkɑri kuɑ.
2 Ye i yɛ̃, yerɑ nɛn tii nɑ mɑɑ yɛ̃.
I ǹ mɑn bwisi kere.
3 Adɑmɑ Yinni Gusunɔ Dɑm kpuroɡiiwɑ nɑ kĩ n ɡɑri sɔ̃.
Wiyɑ kon weeweenu koosi.
4 Domi bɛɛ, weesɑ i rɑ n sekumɔ.
I sɑ̃ɑwɑ tim nɛmɔ weesuɡibu.
5 N dɑɑ burɑm bo i n mɑɑri,
kpɑ bu bɛɛ ɡɑrisi nɡe bwisiɡibu.
6 Tɛ̃, i nɛn weeweenu swɑɑ dɑkio,
kpɑ i nɔ ye nɑ ɡerumɔ.
7 I tɑmɑɑ i ko i Gusunɔn biru yɔ̃rɑ kɑ weesu?
I ko i nùn mɔru bɑrɑ kɑ ɡɑri weesuɡii?
8 Bɛɛyɑ i ko i kɑ nùn yinɑ?
Bɛɛyɑ i ko i nùn weeweenu kuɑ?
9 Ù n bɛɛ wɛ̃ɛrɑ i ko i nùn wɛ̃re?
I ko i nùn nɔni wɔ̃ke nɡe tɔnu?
10 Bɑɑ ì n win biru yɔ̃rɑ ɑsiri sɔɔ,
kɑ mɛ, u koo bɛɛ tɑɑrɛ wɛ̃.
11 Win kpɑ̃ɑru tɑ ǹ bɛɛ bɛrum mɔ̀?
I ǹ nɑndɑmɔ win sɔ̃?
12 Bɛɛn ɡɑri sɑɑrinu nu sɑ̃ɑwɑ nɡe torom.
Ye i ɡerumɔ yɑ ǹ dɑm mɔ nɡe weke te bɑ kɑ sɔndu mɔmɑ.
13 I mɑrio, kpɑ i de n ɡɑri ɡere,
kpɑ n mɑn deemɑ ye n ko n mɑn deemɑ.
14 Wee nɑ sɔɔru kpɑ, bɑɑ nɑ̀ n kon nɛn wɑ̃ɑru biɑn nɑ.
15 Gusunɔ ù n kĩ, u mɑn ɡoowo.
Kɑ mɛ, wiyɑ nɑ nɑɑnɛ sɑ̃ɑ.
Kon kɑ tii yinɑ win wuswɑɑɔ.
16 Yɑ koo kpĩ yu kɑ mɑn fɑɑbɑ nɑɑwɑ.
Domi tɔn kɔ̃so kun kpɛ̃ u terɑ win wuswɑɑɔ.
17 I swɑɑ dɑkio i nɛn ɡɑri nɔ.
I swɑɑ tem kpĩiyɔ i nɔ ye kon ɡere.
18 Wee nɑ sɔɔru kpɑ n kɑ nɛn ɡɑri ɡere.
Nɑ mɑɑ yɛ̃ mɑ nɑ ɡem mɔ.
19 Wɑrɑ u koo kɑ mɑn sikirinɑ nɛn ɡem sɔɔ.
Nɑ sɔɔru kpɑ nɑ̀ n tɑɑrɛ mɔ n kɑ nɔɔ mɑri kpɑ n kpunɑ n ɡbi.
20 Gusunɔ, ɑ mɑn ɡɑ̃ɑnu yiru yeni kuo,
kpɑ n ku mɑɑ nun kukuɑ.
21 A mɑn wunɛn nɔmu swɛnyɑrio,
kpɑ nɑ kun mɑɑ nɑnde.
22 A mɑn sokuo, kpɑ n nun wurɑri.
Nɑ̀ n nun kɑnɑ, ɑ mɑn wisio.
23 Torɑnu nyewɑ nɑ nun torɑri.
A de n nu ɡiɑ.
24 Mbɑn sɔ̃nɑ ɑ mɑn biru kisi,
mɑ ɑ mɑn kuɑ nɡe wunɛn yibɛrɛ.
25 Wɑrɑ ɑ nɑɑ ɡire. Wuru ɡe ɡɑ kɑ woo doonɔ?
Wɑrɑ ɑ nɑɑ swĩi. Yɑkɑ ɡbebusu?
26 Mbɑn sɔ̃nɑ ɑ mɑn wɑhɑlɑ bɑkɑ yeni kpɛ̃ɛ,
mɑ ɑ mɑn sɛɛyɑsiɑmɔ nɛn ɑluwɑɑsirun torɑnun sɔ̃.
27 Mbɑn sɔ̃nɑ ɑ mɑn yɔ̃rɑsiɑ nɡe wìn nɑɑsu bɑ bɔkuɑ kɑ sii yɔni,
mɑ ɑ nɛn kookoosu kpuro mɛɛrɑ,
mɑ ɑ nɛn nɑɑ dɑbusɑnun ɡeeru yi.
28 Wee nɛn wɑsi yi dɑm dwiiyɑ yi sɑnkirɑ
nɡe yɑbe te kɔkɔnu di.
Tɔnun wɑ̃ɑrɑ sɑ̃ɑwɑ wɔnwɔndu