2 tɔnu u ko n ɑrufɑɑni mɔ Gusunɔn mi?

Aɑwo! Tɔnu ù n sɑ̃ɑ dee dee, win tiin ɑrufɑɑniwɑ.

3 A tɑmɑɑ yèn sɔ̃ ɑ sɑ̃ɑ ɡemɡii,

Gusunɔ u yen ɑre wɑɑmɔ?

À n sĩimɔ dee dee ɑrufɑɑni yerɑ̀ u wɑɑmɔ.

4 A tɑmɑɑ yèn sɔ̃ ɑ nùn mɛm nɔɔwɑmmɛ,

yen sɔ̃nɑ u nun sɛɛyɑsiɑmɔ?

A tɑmɑɑ yèn sɔ̃ ɑ nùn nɑsie,

yen sɔ̃nɑ u nun sirimɔ?

5 Aɑwo. Wunɛn torɑ dɑbinun sɔ̃nɑ u nun sɛɛyɑsiɑmɔ.

Wunɛn kɔ̃sɑ yɑ mɑɑ kpɑ̃.

6 Domi ɑ wunɛn berusebun yɑ̃nu tɔrubɑ mwɑ,

mɑ ɑ bu deri tereru.

7 A ǹ wi nim nɔru ɡɑ mɔ̀ nim kɑ̃ u nɔ.

Mɛyɑ ɑ ǹ mɑɑ wi ɡɔ̃ɔrɑ mɔ̀ dĩɑnu kɑ̃ u di.

8 A rɑɑ sɑ̃ɑwɑ dɑmɡii kɑ bɛɛrɛɡii,

mɑ ɑ tem mɛ kpuro mɔ.

9 A ɡɔminibu ɡirɑwɑ bɑ doonɑ nɔm dirɑ, ɑ ǹ bu somi.

Mɑ ɑ ɡobekubɑn dɑm buɑ.

10 Yen sɔ̃nɑ yɛ̃ri nun wɑ̃ɑsi beri berikɑ,

mɑ bɛrum nun mwɑ subɑru sɔɔ.

11 Mɑ yɑm wɔ̃kurɑ nun wukiri nɡe nim bwee bɑkɑru,

ɑ ǹ mɑɑ yɑm wɑɑmɔ.

12 Sɑ yɛ̃ mɑ Gusunɔ u wɑ̃ɑ wɔllɔ.

A mɛɛrio ɑ wɑ sere mi kperi wɑ̃ɑ.

13 Kɑ mɛ, ɑ ɡerumɔ ɑ mɔ̀, mbɑ Gusunɔ u yɛ̃.

U ǹ kpɛ̃ u tɔnu siri ɡuru wiru sɔɔ.

14 Guru wiru tɑ sinum mɔ,

u ǹ kpɛ̃ u ɡɑ̃ɑnu wɑ min di.

U sirenɛwɑ wɔllu mi tɔnɑ.

15 Yoobu, ɑ yɔ̃rɑriwɑ ɑ kɔ̃sɑn kowobun yirɑ ye swĩi?

16 A ǹ yɛ̃ mɑ bɑ bu ɡo ben ɡɔɔn sɑɑ yu sere turi?

Bɑ doonɑ nɡe ɡɑnɑ ye yɑ nim diirɑ.

17 Tɔn ben bweseru bɑ rɑ rɑɑ Gusunɔ sɔ̃wɑ bu nɛɛ,

u bu derio sɛ̃ɛ.

Mbɑ wi Dɑm kpuroɡii u koo kpĩ u bu kuɑ.

18 N deemɑ Gusunɔ wiyɑ u rɑɑ ben yɛnun dukiɑ kuurɑsiɑ.

Adɑmɑ bɑ ǹ nùn sɑɑwɑrɑ kue,

ye bɑ ben himbɑ yiimɔ.

19 Be bɑ ɡem swĩi bɑ koo yɛ̃ɛri,

bɑ̀ n tɔn kɔ̃so wɑ u kɑm kuɑ.

Be bɑ ǹ tɑɑrɛ mɔ, bɑ koo yɛ̃ɛwɑ bu nɛɛ,

20 wee, bɛsɛn yibɛrɛ u kɑm kuɑ,

win dukiɑ ye u mɔ kpuro, yɑ dɔ̃ɔ mwɑɑrɑ.

21 Yoobu, ɑ kɑ Gusunɔ doro, kpɑ ye kpuro yu nun sɑnɔ kuɑ.

À n kuɑ mɛ, wunɛn nuku dobu koo wurɑmɑ.

22 A win sɔ̃ɔsiru swɑɑ dɑkio kpɑ ɑ tu nɛnɛ ɡɔ̃ruɔ.

23 À n kɑ kɔ̃sɑ tondɑ mɑ ɑ wurɑmɑ,

Dɑm kpuroɡii koo nun wunɛn yellun wɑ̃ɑru wesiɑ.

24 A wunɛn wurɑ ye ɑ mɔ kɔ̃ɔwɔ temɔ.

Kpɑ ɑ wunɛn kpee ɡobiɡiru deri dɑɑrun torɑɔ,

25 kpɑ Dɑm kpuroɡii u ko wunɛn wurɑ kɑ wunɛn sii ɡeesu.

26 Sɑɑ yerɑ kɑɑ n nuku dobu mɔ Gusunɔ Dɑm kpuroɡiin mi.

Kpɑ ɑ nùn nɑɑnɛ ko, ɑ nùn wunɛn wuswɑɑ sɔ̃ɔsi.

27 À n nùn kɑnɑ u koo nun wisi,

kpɑ ɑ wunɛn nɔɔ mwɛɛnu yibiɑ.

28 Ye ɑ niɑ kuɑ kpuro, yɑ koo koorɑwɑ.

Wunɛn swɛɛ yi ɑ swĩi kpuro, yi ko n dɛɛrewɑ.

29 À n wɑ̃ɑ nɔni swɑ̃ɑru sɔɔ,

kɑɑ tii kɑwɑ ɑ nɛɛ, tii suɑbɑ bu nun tu kpɛ̃ɛ.

Kpɑ Gusunɔ u nun wɔlle suɑ.

30 U koo mɑm tɑɑrɛɡii yɑrɑ kɔ̃sɑn di,

wunɛn dɛɛrɑrun sɔ̃.