2 nɑ kĩ nɛn yellun wɑ̃ɑru tu wurɑmɑ

tɑ n sɑ̃ɑ nɡe sɑɑ ye Gusunɔ u mɑn kɔ̃su.

3 Nɑ kĩ nɑ n wɑ̃ɑ nɡe sɑɑ ye u fitilɑ sɔ̃re nɛn wuswɑɑɔ,

mɑ win yɑm bururɑm mɑn yɑm bururɑsie wɔ̃kuru.

4 Nɑ kĩ nɑ n sɑ̃ɑwɑ nɡe sɑɑ yè sɔɔ nɑ dɑm mɔ,

mɑ Gusunɔ u mɑn kɔ̃su kɑ kĩru.

5 Sɑɑ ye sɔɔ, Gusunɔ Dɑm kpuroɡii u kɑ mɑn wɑ̃ɑ,

mɑ nɛn bibɑ kɑ mɑn wɑ̃ɑ.

6 Mɛyɑ nɛn yɑɑ sɑbenu nu rɑ n bom yibɑ.

Mɛyɑ mɑɑ nɛn olifi yɑ rɑ mɑn ɡum wɛ̃ mu n kokumɔ nɡe dɑɑ kokɑ.

7 Sɑɑ ye sɔɔ, nɑ̀ n yɑrɑ tɔɔwɔ nɑ dɑ nɑ sinɑ wuun ɡbɑ̃rɑrun kɔnnɔwɔ

su kɑ siri,

8 ɑluwɑɑsibɑ bɑ̀ n mɑn wɑ,

bɑ rɑ mɑn bɛɛrɛ wɛ̃wɑ bu doonɑ min di,

kpɑ durɔ tɔkɔnu nu se nu yɔ̃rɑ.

9 Tɔn bokobu bɑ̀ n mɑn wɑ bɑ rɑ ben ɡɑri ɡerubu yɔ̃rewɑ.

10 Mɛyɑ mɑɑ sinɑmbu bɑ rɑ nɔɔ mɑri,

kpɑ n sɑ̃ɑre ben yɑrɑ ben dɑro mɑni.

11 Wi u nɛn ɡɑri nuɑ u rɑ nɛɛwɑ, doo nɔɔruɡiiwɑ nɑ sɑ̃ɑ.

Wi u mɑɑ mɑn wɑ seedɑ ɡeɑ u rɑ mɑn diiye.

12 Domi nɑ rɑ wɔnwɔndo somi ù n somiru kɑnɑ,

kpɑ n ɡobeku wi bɑ yinɑ bu somi dɑm kɛ̃.

13 Be bɑ ɡɔɔ dɔɔ, bɑ rɑ mɑn domɑru kuewɑ.

Kpɑ n ɡɔminibu nukuru yɛmiɑsiɑ n de bɑ n nuku dobu mɔ ɡɔ̃ruɔ.

14 Gem kobu bu rɑ n mɑn wɑ̃ɑsiwɑ nɡe yɑbe te nɑ sebuɑ,

ǹ kun mɛ nɡe dɑwɑni ye nɑ bɔkuɑ.

15 Nɑ rɑ n sɑ̃ɑwɑ wɔ̃kobun nɔni,

kpɑ nɑ n sɑ̃ɑ kɔ̃ri kpiriruɡibun kɔ̃ri.

16 Nɑ kuɑ sɑ̃ɑrobun tundo.

Nɑ rɑ sɔbu nɔɔri, n ben ɡɑri mɛɛri yi bɑ kɑ nɑ.

17 Adɑmɑ nɑ rɑ tɔn kɔ̃sobun nɔsu bɔɔku,

n bu wɔrɑri ye bɑ mwɑ.

18 Mɑ nɑ tii sɔ̃ɔwɑ nɑ nɛɛ,

kon ɡbiwɑ tɔkɔru sɔɔ, nɛn kpin yeru wɔllɔ.

Nɛn wɑ̃ɑrun tɔ̃nu nu ko n dɑbiwɑ nɡe yɑni sɛɛri.

19 Ko nɑ n sɑ̃ɑwɑ nɡe dɑ̃ɑ tèn ɡbini yi wɑ̃ɑ nim bɔkuɔ.

Kpɑ kɑkoru tɑ n wɑ̃ɑ nɛn kɑ̃ɑsin wɔllɔ.

20 Sɑɑ ye sɔɔ, nɛn yiiko yɑ koo wurɑmɑ,

kpɑ nɑ n dɑm mɔ nɡe tɛn te bɑ ɡɑwe.

21 Yellu, tɔmbu bɑ rɑ yɔ̃rewɑ bu nɛn ɡɑri swɑɑ dɑki.

Bɑ rɑ nɔɔ mɑriwɑ bu nɛn bwisi nɔ.

22 Nɑ̀ n ɡɑri ɡeruɑ nɑ kpɑ, ɡoo ku rɑ mɑɑ ɡɑ̃ɑnu wisi.

Nɛn ɡɑri yi, yi rɑ bu duuriwɑ kpurɛ kpurɛ nɡe nim mɛ mu dɑ̃ɑkumɔ.

23 Be kpuro bɑ rɑ n mɑn mɑrɑwɑ nɡe tom buruku ɡurɑ.

24 Kpɑ n yɛ̃ɛ musɛɛ n kɑ bu dɑm kɛ̃ sɑnɑm mɛ bɑ dɑm bie.

Bɑ ǹ kpɛ̃ bu mɑn nuki sɑnku n wuswɑɑ burisinɑ.

25 Nɛnɑ nɑ rɑ n bu swɑɑ ɡbiiye,

kpɑ nɑ n wɑ̃ɑ ben suunu sɔɔ nɡe sinɑ boko

wi u rɑ win tɔmbu nukuru yɛmiɑsie.