57
(I mɑɑ mɛɛrio nɑɑsu 8-12, 108:2-6)
1 Womu ɡe Dɑfidi u wom kowobun wiruɡii kuɑ. U womu ɡeni kuɑwɑ sɑnɑm mɛ Sɔɔlu u nùn nɑɑ ɡire u ɡo. Mɑ u dɑ u kukuɑ kpee bɑɑ sɔɔ. Ge wee.
2 Gusunɔ, ɑ nɛn wɔnwɔndu wɑɑwo.
Wunɛn miyɑ nɑ kuku yeru kɑsu.
Wunɛn kɑsɑn sɑɑrɑ tɑ koo mɑn bere
sere nɛn nɔni swɑ̃ɑru kpuro tu kɑ kpe.
3 Yinni Wɔrukoo, wunɑ nɑ nɔɔɡiru sue,
domi wunɑ ɑ rɑ mɑn nɔɔri.
4 Sɑɑ wɔllun diyɑ kɑɑ mɑn somimɑ.
Kɑɑ nɛn yibɛrɛbɑ burisinɑ.
A mɑn wunɛn bɔrɔkiniru kɑ wunɛn tɔn ɡeeru sɔ̃ɔsimɑ.
5 Wee nɑ wɑ̃ɑ tɔn kɔ̃sobun suunu sɔɔ
be bɑ sɑ̃ɑ nɡe ɡbee sinɑn si su rɑ tɔmbu tem.
Ben donnɑ nu sɑ̃ɑ ben yɑɑsi kɑ ben sɛ̃ɛnu.
Mɑ ben yɑrɑ sɑ̃ɑ nɡe tɑkobi ye yɑ nɔɔ do.
6 Gusunɔ, wɔllu tɑ ǹ kpɛ̃ tu nun mwɑ wunɛn kpɑ̃ɑrun sɔ̃.
A wunɛn yiiko sɔ̃ɔsio tem kpuro sɔɔ.
7 Nɛn yibɛrɛ be, bɑ mɑn yɛ̃ri bɛriɑ nɛn swɛɛ kpuro sɔɔ,
mɑ nɑ tem tuke nɑ wɑ bɑ wɔru ɡbɑ nɛn wuswɑɑɔ.
Adɑmɑ berɑ bɑ ɡu wɔri.
8 Gusunɔ, nɛn tororɑ sɔ̃.
Kon nun womu kuɑ kpɑ n nɛn bɑrɑnu so.
9 A yɑndo nɛn bwɛ̃rɑ.
Mɑnɑ nɛn ɡɔ̃ɔɡerɑ wɑ̃ɑ.
Mɑnɑ nɛn mɔrɔku ɡɑ wɑ̃ɑ n kɑ sɔ̃ɔ bɔɔsiɑ.
10 Yinni Gusunɔ, kon nun siɑrɑ tɔmbun suunu sɔɔ,
kpɑ n mɑɑ nun tɔmɑ kɑ womusu.
11 Domi wunɛn tɔn ɡeerɑ wɑ̃ɑwɑ sere kɑ wɔllɔ.
Mɛyɑ mɑɑ wunɛn bɔrɔkiniru tɑ sɔ̃ɔsirɑmɔ sere kɑ ɡuru winɔ.
12 Gusunɔ, wɔllu tɑ ǹ kpɛ̃ tu wunɛn kpɑ̃ɑru mwɑ.
A wunɛn yiiko sɔ̃ɔsio hɑnduniɑ kpuro sɔɔ.