Bɛɛ hɑnduniɑn tɔmbu kpuro,

i Gusunɔ nɔɔɡiru sueyo kɑ nuku dobu.

2 I womu koowo win yĩsirun yiikon sɔ̃.

I win yĩsiru wɔlle suo kɑ womusu,

3 kpɑ i nùn sɔ̃ mɑ win sɔmɑ yɑ nɑnum mɔ,

domi win dɑm mu kpɑ̃.

Yen sɔ̃nɑ win yibɛrɛbɑ bɑ nùn wiru kpĩiyɑmmɛ.

4 Hɑnduniɑɡibu kpuro bɑ nùn yiirɑmmɛ.

Bɑ nùn tɔmɑmɔ kɑ womusu,

mɑ bɑ win yĩsiru bɛɛrɛ wɛ̃ɛmɔ.

5 I nɑ i Gusunɔn sɔmɑ mɛɛri ye u kuɑ.

U nɑnum mɔ ù n sɔmburu mɔ̀ tɔmbun suunu sɔɔ.

6 U derɑ dɑɑrɑ ɡberɑ,

mɑ sɑ tɔburɑ bɛsɛn nɑɑsu kun nim wɑ,

mɑ sɑ nuku dobu kuɑ wi sɔɔ.

7 U bɑndu diiwɑ sere kɑ bɑɑdommɑɔ win dɑm sɑɑbu.

U bwesenu kpuro mɛɛrɑ kɑ lɑɑkɑri,

kpɑ mɛm nɔɔ sɑribɑ bu ku rɑɑ nùn seesi.

8 I Gusunɔ siɑro bɛɛ bwesenu kpuro.

I nùn tɔmɔ bu nɔ bɑɑmɑ.

9 Domi u bɛsɛn wɑ̃ɑru wɔrɑ.

U ǹ dere su sokurɑ.

10 Gusunɔ, ɑ sun doke lɑɑkɑri mɛɛribu sɔɔ.

A derɑ sɑ wɑ̃ɑ dɔ̃ɔ sɔɔ nɡe sii ɡeesu.

11 A sun kpɛ̃ɛ yinɑ sɔɔ mɑ ɑ sun sɔmu bɑkɑnu sɔbi.

12 A derɑ bɛsɛn yibɛrɛbɑ bɑ sun sɔni,

mɑ sɑ dɔ̃ɔ kɑ nim sɑrɑ.

Adɑmɑ ɑ sun yɑrɑ min di sɑ n kɑ bɔri yɛndu mɔ.

13 Kon du wunɛn sɑ̃ɑ yerɔ n kɑ nun yɑ̃kuru kuɑ,

kpɑ n nɛn nɔɔ mwɛɛnu yibiɑ

14 ni nɑ nun kuɑ nɛn wɑhɑlɑn sɑɑ sɔɔ.

15 Kon kɑ nun kɛtɛbɑ kɑ bonu yɑ̃kuru kuɑ,

kpɑ n kɑ nun yɑ̃ɑ ni nu ɡum mɔ yɑ̃ku dɔ̃ɔ mwɑɑrɑruɡinu kuɑ.

16 Bɛɛ be i Gusunɔ nɑsie, i nɑ i nɔ,

kpɑ n bɛɛ sɔ̃ ye u mɑn kuɑ.

17 Nɑ nùn nɔɔɡiru sue u mɑn somi,

mɑ nɑ nùn siɑrɑ kɑ womusu.

18 Nɑ̀ n dɑɑ torɑru ɡɑru mɔ nɛn ɡɔ̃ruɔ,

Yinni Gusunɔ kun dɑɑ mɑn wurɑrimɔ.

19 Adɑmɑ u nɛn kɑnɑru swɑɑ dɑki u mɑn wurɑri.

20 Nɑ nùn siɑrɑ domi u nɛn kɑnɑru mwɑ.

Mɑ u ǹ mɑn win durom wunɑri.