1 Yinni Gusunɔ u bɑndu dii.

Tem mu nukuru doro.

Be bɑ wɑ̃ɑ n tomɑ bu yɛ̃ɛrio.

2 Guru wii wuroru kɑ yɑm wɔ̃kurɑ rɑ n kɑ nùn sikerenɛwɑ.

Gem wɔllɔwɑ u win sinɑ ɡɔnɑ tɛrie.

3 Dɔ̃ɔwɑ u rɑ n nùn swɑɑ ɡbiiye.

Kpɑ u n win yibɛrɛbɑ mwɑɑmɔ.

4 U rɑ de ɡuru mɑɑkinu nu hɑnduniɑ yɑm bururɑsiɑ.

Tem mù n nu wɑ, mu rɑ diiriwɑ.

5 Guunu nu rɑ yɑndewɑ nɡe ɡum win wuswɑɑɔ,

wi, wi u sɑ̃ɑ tem kpuron Yinni.

6 Wɔllu tɑ win ɡem sɔ̃ɔsimɔ.

Mɑ bwesenu kpuro nu win yiiko wɑɑmɔ.

7 Be bɑ bwɑ̃ɑrokunu sɑ̃ɑmɔ, bɑ koo sekuru wɑ.

Be bɑ bũnu siɑrɑmɔ, bɑ koo yɔ̃rɑ kɑ dukiri.

Bũnu kpuro nu koo yiirɑ win wuswɑɑɔ.

8 Yinni Gusunɔ, Siɔniɡibu bɑ ye nuɑ mɑ bɑ nukuru dorɑ.

Yudɑbɑ bɑ nuku dobu mɔ̀ wunɛn siribun sɔ̃.

9 Domi wunɑ ɑ kpɑ̃ɑru bo hɑnduniɑ kpuro sɔɔ.

Wunɑ ɑ mɑɑ bũnu kpuro dɑm kere.

10 Bɛɛ be i Yinni Gusunɔ kĩ, i kɔ̃sɑ tusio.

U rɑ be bɑ nùn nɑɑnɛ sɑ̃ɑ wɔre tɔn kɔ̃sobun nɔmɑn di.

11 Yɑm bururɑm mu wɑ̃ɑwɑ ɡemɡiin sɔ̃.

Nuku dobu bu wɑ̃ɑwɑ bèn ɡɔ̃ru ɡɑ dɛɛren sɔ̃.

12 Bɛɛ ɡemɡibu, i nuku dobu koowo Yinni Gusunɔn sɔ̃.

Kpɑ i win yĩsi dɛɛrɑ te wɔlle suɑ.