Yinni Gusunɔ, nɑ nun siɑrɑ

wunɛ wi ɑ sɑ̃ɑ nɡe nɛn kpee bɑɑ.

Wunɑ ɑ rɑ mɑn tɑbu sɔ̃ɔsi.

2 Wunɑ ɑ rɑ mɑn durom kue kpɑ ɑ mɑn kɔ̃su.

Wunɑ ɑ sɑ̃ɑ nɛn kuku yee dɑmɡiru kɑ nɛn fɑɑbɑ kowo.

Wunɑ ɑ sɑ̃ɑ nɛn tɛrɛru te tɑ rɑ mɑn ɡɑnɛ.

Wunɑ ɑ rɑ de bwesenu nu n mɑn wiru kpĩiyɛ.

3 Yinni Gusunɔ, wɑrɑ rɑ n tɔnu ɑ n sere kɑ win bwisikunu mɔ̀.

Wɑrɑ rɑ n tɔnu ɑ n sere kɑ win weeweenu mɔ̀.

4 Tɔnu u sɑ̃ɑwɑ nɡe woo.

Win wɑ̃ɑrun tɔ̃nu nu sɑ̃ɑwɑ nɡe sɑɑru te tɑ rɑ doonɛ.

5 Yinni Gusunɔ, ɑ de wɔllu tu tem dɛbɛ dɛbɛ ko kpɑ ɑ sɑrɑmɑ.

A ɡuunu bɑbo kpɑ dɔ̃ɔ u yɑri ni sɔɔn di.

6 A de ɡuru mɑɑkinu nu sɔ̃ɔsirɑ, kpɑ ɑ nɛn yibɛrɛbɑ yɑrinɑsiɑ.

A bu sɛ̃ɛnu tweeyo kpɑ ɑ de bu yɑrinɑ.

7 A wunɛn nɔmu dɛmiɑmɑ wɔllun di.

A mɑn wɔro kpɑ ɑ mɑn fɑɑbɑ ko

nim bɑkɑm kɑ tɔn tukobun min di

8 be bɑ rɑ n ɡɑri kɑm yɑrɑmɔ ben nɔsun di,

kpɑ bɑ n ben nɔm ɡeu yiiye

bu kɑ nɔɔ mwɛɛ weesuɡinu ko.

9 Yinni Gusunɔ, kon nun wom kpɔɔ kuɑ.

Kon nun womu kuɑ kɑ mɔrɔku sɛrum wɔkuruɡuu,

10 wunɛ wi ɑ rɑ sinɑmbu fɑɑbɑ ko,

kpɑ ɑ nɛ, Dɑfidi wunɛn sɔm kowo yɑrɑ tɑkobi ɡɔɔɡiɑn di.

11 Yinni Gusunɔ, ɑ mɑn wɔro,

kpɑ ɑ mɑn fɑɑbɑ ko tɔn tukobun nɔmɑn di,

be bɑ rɑ n ɡɑri kɑm yɑrɑmɔ ben nɔsun di,

kpɑ bɑ n ben nɔm ɡeu yiiye

bu kɑ nɔɔ mwɛɛ weesuɡinu ko.

12 A de bɛsɛn bii ɑluwɑɑsibɑ bu ko nɡe dɑ̃ɑ

ni nu kpiɑ dee dee nin piiburun di,

kpɑ bɛsɛn bii wɔndiɑbɑ bu mɑɑ ko kurɔ burɑbu

nɡe ɡbere be bɑ dɑ̃kɑ bɑ sɑ̃ɑ sinɑ kpɑɑrun burɑru.

13 A de bɛsɛn birɑnu nu dĩɑ bwese bwesekɑ yibu,

kpɑ bɛsɛn yɑɑ sɑbenu nu dɑbiɑ nu ko subɑ nɔrɔm nɔrɔm

kɑ nɔrɔm nɔrɔm subɑ wɔku wɔkubu bɛsɛn ɡberu kpɑɑnɛɔ.

14 A de bɛsɛn kɛtɛbɑ bu kuurɑ.

A ku de ɡoo u sun wɔri kpɑ u sun yoru mwɛɛri u kɑ doonɑ.

A ku mɑɑ de nuku sɑnkirɑnun wuri yi nɔɔrɑ bɛsɛn swɛɛ sɔɔ.

15 Doo nɔɔruɡirɑ bwese te tɑ sɑ̃ɑ nɡe mɛ.

Doo nɔɔruɡirɑ bwese te tɑ Gusunɔ mɔ Yinni.