Yoobu.
33.
Elihu u nɛɛ, tɛ̃, Yoobu ɑ swɑɑ dɑkio ɑ nɛn ɡɑri kpuro nɔ. 
Wee kon nɔɔ wukiɑ n ɡɑri ɡere. 
Geeyɑ kon nun sɔ̃, n ǹ kɑ murɑfitiru. 
Gusunɔ Dɑm kpuroɡiin Hundewɑ u mɑn tɑkɑ kuɑ. Mɑ u mɑn wɑ̃ɑru wɛ̃. 
A sɔɔru koowo mɛ kɑɑ kɑ tii yinɑ, kpɑ ɑ mɑn wisi ɑ̀ n kɑɑ kpĩ. 
Nɛ kɑ wunɛ sɑ sɑ̃ɑwɑ tiɑ Gusunɔn wuswɑɑɔ. Domi temɑ u kɑ bɛsɛ kpuro mɔmɑ. 
Ǹ n mɛn nɑ, ɑ ku nɛn bɛrum ko, kpɑ ɑ n tɑmɑɑ nɑ kĩ n nun nɛn yiiko sɔ̃ɔsiwɑ. 
Adɑmɑ nɑ yɑɑye ye ɑ mɑn sɔ̃ɔwɑ. A nɛɛ, 
ɑ dɛɛrewɑ mɑm mɑm ɑ ǹ durum mɔ. Tɑɑrɛ ɡɑɑ mɑɑ sɑri wunɛ sɔɔ. 
Mɑ ɑ nɛɛ, kɑ mɛ, Gusunɔ u wunɛn torɑnu wɑɑmɔ. Mɑ u nun ɡɑrisi win yibɛrɛ. 
U ǹ derimɔ ɑ dɑ mi ɑ kĩ. Mɑ u wunɛn kookoosu kpuro lɑɑkɑri sɑ̃ɑ. 
Adɑmɑ nɛ, nɑ nun sɔ̃ɔmɔ mɑ ɑ ǹ ɡem mɔ ɡɑri yi sɔɔ Yoobu. Domi Gusunɔ u tɔnu kere. 
Mbɑn sɔ̃nɑ ɑ kɑ nùn tɑɑrɛ wɛ̃ɛmɔ ɑ mɔ̀, u ku rɑ tɔnu wisi. 
Gusunɔ u rɑ kɑ tɔnu ɡɑri kowɑ kɑ swɑɑ dɑbinu, ɑdɑmɑ tɔnu u ku rɑ ye lɑɑkɑri ko. 
Gɑsɔ u rɑ kɑ nùn ɡɑri ko dosu sɔɔ wɔ̃kuru, ǹ kun mɛ kɑ̃siru sɔɔ sɑnɑm mɛ u kpĩ win kpin yerɔ u dò. 
Miyɑ u rɑ nùn kure u kɑ nùn kirɔ ko. 
Kpɑ u nùn ɡbɑrɑ kɔ̃sɑn di. Kpɑ u mɑɑ nùn yɑrɑ tii suɑbun di. 
Nɡe mɛyɑ u rɑ kɑ nùn yɑre ɡɔɔn yirɑn di, kpɑ u kun mɑɑ ɡu. 
Gɑsɔ, u rɑ mɑɑ nùn sɛɛyɑsie kɑ wɑhɑlɑ, u de bɑrɑru ɡɑru tu nùn kpĩ, win wɑsi yi n diirimɔ, 
kpɑ u kun mɑɑ dĩɑnun mɛm kĩ, bɑɑ kɑ ni u rɑ n kĩru bo. 
Kpɑ u woorɑ, win kukunu nu terɑ. 
Kpɑ ɑ deemɑ u ɡɔɔ turuku kuɑ. 
Gɑsɔ Gusunɔn ɡɔrɑdobɑ nɔrɔbu (1.000) sɔɔ, turo u koo se u dɑ u nùn somi, kpɑ u nùn swɑɑ ɡeɑ sɔ̃ɔsi ye n weenɛ u swĩi. 
Sɑɑ ye sɔɔ, u koo tɔnu win wɔnwɔndu wɑ kpɑ u nɛɛ, u nùn fɑɑbɑ koowo, kpɑ u ku rɑɑ ɡbi. Domi u swɑɑ wɑ ye u koo kɑ nùn yɑkiɑ. 
Kpɑ win wɑsi yi wurɑmɑ yi ko nɡe sɑnɑm mɛ u sɑ̃ɑ ɑluwɑɑsi. 
Ù n Gusunɔ kɑnɑ, u koo win kɑnɑru mwɑ. Kpɑ u Gusunɔ sɑ̃ kɑ nuku dobu, yèn sɔ̃ u nùn win wɑ̃ɑru wesiɑ. 
Kpɑ u womu ko tɔmbun wuswɑɑɔ u nɛɛ, u durum kuɑ, u ɡem yinɑ. Adɑmɑ Gusunɔ kun nùn yen sɛɛyɑsiɑbu kue. 
U win hunde wɔrɑ, u ǹ due siki wɔruɔ. Mɑ u yɑm bururɑm wɑɑmɔ. 
Yeni kpuron diyɑ Gusunɔ u rɑ kɑ tɔnu ɡɑri ko nɔn dɑbi dɑbinu, 
u kɑ nùn ɡɔɔ ɡbɑrɑ, kpɑ u de u n wɑ̃ɑ wɑ̃ɑru sɔɔ. 
Tɛ̃, ɑ mɑn swɑɑ dɑkio, Yoobu. A den mɑrio mɛ, kpɑ n mɑɑ ɡɑri ɡere. 
À n ɡɑri ɡɛɛ mɔ ɑ kɑ mɑn wisi, ɑ mɑn wisio. Domi nɛn kĩrɑ n kɑ nun ɡem wɛ̃. 
À kun mɑɑ ɡɛɛ mɔ ɑ ɡere, ɑ mɑn swɑɑ dɑkio. A mɑrio, kpɑ n nun bwisi kɛ̃.