Womusu.
20.
Kɑnɑ te wom kowobun wiruɡii u kuɑ Dɑfidin sɔ̃. 
Gusunɔ, Yɑkɔbun Yinni, ɑ sinɑ boko swɑɑ dɑkio sɑnɑm mɛ u kɑnɑru mɔ̀. A nùn kɔ̃suo sɑnɑm mɛ u wɑ̃ɑ nɔni swɑ̃ɑru sɔɔ. 
Yinni Gusunɔ, wunɛ wi ɑ wɑ̃ɑ wunɛn sɑ̃ɑ yee dɛɛrɑrɔ te tɑ wɑ̃ɑ Siɔniɔ, ɑ sinɑ boko somimɑ, kpɑ ɑ n yɔ̃ win biruɔ. 
A win kɛ̃nu kpuro yɑɑyo, kpɑ ɑ win yɑ̃kunu kpuro mwɑ. 
A nùn wɛ̃ɛyɔ ye win ɡɔ̃ru ɡɑ kĩ kpuro, kpɑ ɑ de win himbɑ kpuro yu koorɑ. 
A de ye u nun bikiɑ kpuro yu koorɑ, kpɑ bɛsɛ kpuro su yɛ̃ɛri sinɑ bokon nɑsɑrɑn sɔ̃, kpɑ su wunɛn yĩsiru wɔlle suɑ. 
Tɛ̃, nɑ yɛ̃ mɑ wunɑ ɑ sinɑ boko ɡɔsɑ, ɑ rɑ mɑɑ nùn somi. Wunɑ ɑ rɑ win kɑnɑru nɔ sɑɑ wɔllun di, kpɑ ɑ nùn nɑsɑrɑ wɛ̃ kɑ wunɛn dɑm bɑkɑm. 
Gɑbɑ ben tɑbu kɛkɛbɑ kɑ ben dumi nɑɑnɛ sɑ̃ɑ, ɑdɑmɑ bɛsɛ, wunɛ Yinni Gusunɔwɑ sɑ nɑɑnɛ sɑ̃ɑ. 
A de tɔn be, bu dɑm biɑ bu wɔruku, ɑdɑmɑ ɑ sun dɑm sosio bɛsɛ, su kɑ yɔ̃rɑ dim dim. 
Yinni Gusunɔ, ɑ bɛsɛn nɔɔ nɔɔwɔ sɑnɑm mɛ sɑ nun soku. A sinɑ boko somiɔ.