Womusu.
47.
Womu ɡe Koren bibu bɑ wom kowobun wiruɡii kuɑ. Ge wee. 
Bɛɛ hɑnduniɑn bwesenu, i tɑki koowo, kpɑ i kuuki ko kɑ nuku dobu Yinni Gusunɔn mi. 
Domi u sɑ̃ɑwɑ Yinni Wɔrukoo wi u nɑnum mɔ. U sɑ̃ɑwɑ sinɑ boko tem kpuro sɔɔ, 
wi u rɑ de su bwesenu ɡɑnu tɛɛsi, kpɑ sɑ n nu tɑɑre. 
Wiyɑ u sun bɛsɛn tem ɡɔsiɑ, mɑ sɑ yen woo kɑnɑmɔ, bɛsɛ Yɑkɔbun bweseru te wi, Yinni u kĩ. 
Gusunɔ u yɔɔmɔ Siɔniɔ, mɑ bɑ nɑsɑrɑn tɑki mɔ̀. U ɡbiɑ u dɔɔ, mɑ bɑ kɔbɑ soomɔ. 
I Gusunɔ womu kuo, i Gusunɔ womu kuo. I Yinni, sinɑ boko siɑro kɑ womu. 
Domi wiyɑ u sɑ̃ɑ hɑnduniɑ kpuron sunɔ. I nùn womu kuo. 
Wiyɑ u bɑndu dii bwesenu kpuro sɔɔ, mɑ u sɔ̃ win sinɑ ɡɔni dɛɛrɑ sɔɔ. 
Bwese tukunun sinɑ bibɑ mɛnnɑmɔ kɑ Gusunɔ Aburɑhɑmun Yinnin tɔmbu. Domi wiyɑ u kɑ be bɑ tem kɔ̃su wɑ̃ɑ. Wiyɑ u kpuro kere.