Womusu.
85.
Womu ɡe Koren bibu bɑ wom kowobun wiruɡii kuɑ. Ge wee. 
Yinni Gusunɔ, ɑ wunɛn tem durom kuɑ. Wee ɑ kɑ bɛsɛ Isireli be sɑ sɑ̃ɑ Yɑkɔbun bweseru wurɑmɑ. 
A bɛsɛ wunɛn tɔmbun torɑnu wɔkɑ. A bɛsɛn durum kpuro wukiri. 
A ǹ mɑɑ kɑ sun mɔru sɑ̃ɑ. A derɑ wunɛn mɔru kpuro yɑ sure. 
Gusunɔ bɛsɛn fɑɑbɑ kowo, ɑ sun wesio nɡe yellu. A ku mɑɑ kɑ sun mɔru ko. 
Nɡe kɑɑ n kɑ sun mɔru sɑ̃ɑwɑ sere kɑ bɑɑdommɑɔ? Nɡe kɑɑ n mɔru sɑ̃ɑwɑ sere kɑ bɛsɛn bibun bibu sɔɔ? 
A ǹ sun wɑ̃ɑru wesiɑmɔ kpɑ bɛsɛ wunɛn tɔmbu su wɑ su nuku dobu ko wunɛn sɔ̃? 
Yinni Gusunɔ, ɑ sun wunɛn durom sɔ̃ɔsio kpɑ ɑ sun fɑɑbɑ ko. 
Yinni Gusunɔ, kon swɑɑ dɑki n nɔ ye ɑ ɡerumɔ. Domi bɔri yɛndun ɡɑriyɑ ɑ rɑ n wunɛn tɔmbu sɔ̃ɔmɔ be bɑ nun nɑɑnɛ sɑ̃ɑ mɑ bɑ kun wure wiirɑ ɡɑri sɔɔ. 
Be bɑ nun nɑsiewɑ ɑ rɑ fɑɑbɑ ko. Kpɑ ɑ de bɛɛrɛ yɑ n wɑ̃ɑ bɛsɛn tem sɔɔ. 
Tɔn ɡeeru kɑ bɔrɔkinirɑ koo wurɑmɑ kpɑ ɡem kɑ bɔri yɛndɑ n wɑ̃ɑ tem mɛ sɔɔ. 
Bɔrɔkiniru tɑ koo se tem mɛ sɔɔ nɡe dĩɑ bwese te bɑ duurɑ, kpɑ ɡem mu sɑrɑmɑ wɔllun di. 
Yinni Gusunɔn tiiwɑ u koo sun bɔri yɛndu wɛ̃, kpɑ bɛsɛn tem mu binu mɑ. 
Gemɑ mu ko n nùn ɡbiiye, kpɑ mu win swɑɑ sɔmɛ.