Womusu.
122.
Sɑ̃ɑ dɑɑrun womu ɡe Dɑfidi u kuɑ. Ge wee. Bɑ̀ n nɛɛ, su dɑ Yinni Gusunɔn sɑ̃ɑ yerɔ, nɛn nukurɑ rɑ dorewɑ. 
Yerusɑlɛmu, bɛsɛn nɑɑsu su yɔ̃ wunɛn kɔnnɔsɔ. 
Yerusɑlɛmu, ɑ sɑ̃ɑwɑ wuu ɡe bɑ bɑnɑ ɡeɑ kuɑ, mɑ bɑ ɡu ɡbɑ̃rɑru toosi bɑ kɑ sikerenɑ. 
Wunɛn miyɑ Isirelibɑ, Yinni Gusunɔn tɔmbu bɑ rɑ nɛ bu kɑ nùn siɑrɑ, nɡe mɛ u bu woodɑ wɛ̃. 
Wunɛn miyɑ siri ɡbɑburɑ wɑ̃ɑ. Wunɛn miyɑ Dɑfidin bibun bweserun sinɑ ɡɔnɑ wɑ̃ɑ. 
I bɔri yɛndu kɑnɔ Yerusɑlɛmun sɔ̃, kpɑ be bɑ wunɛ Yerusɑlɛmu kĩ bɑ n wɑ̃ɑ bwɛ̃ɛ dorɑ sɔɔ. 
Yerusɑlɛmu, bɔri yɛndɑ n wɑ̃ɑ wunɛn ɡbɑ̃rɑru sɔɔ kɑ wunɛn sinɑ kpɑɑrɔ. 
Nɛn mɛro bisibu kɑ nɛn bɔrɔbɑn sɔ̃, kon nɛɛ, Gusunɔ u de bɔri yɛndɑ n wɑ̃ɑ Yerusɑlɛmuɔ. 
Yerusɑlɛmu, wunɛn ɡeɑ nɑ kɑsu, Gusunɔ bɛsɛn Yinnin sɑ̃ɑ yerun sɔ̃.