Sɑkɑri.
2.
Sɑkɑri u nɔni seeyɑ mɑ u mɑɑ kɔbi nnɛ wɑ. 
Mɑ u ɡɔrɑdo wi u kɑ nùn ɡɑri mɔ̀ bikiɑ u nɛɛ, kɔbi yirɑ̀ mini. Mɑ u nùn wisɑ u nɛɛ, kɔbi yi yi Yudɑbɑ kɑ Isirelibɑ kɑ Yerusɑlɛmuɡibu yɑrinɑsiɑwɑ mi. 
Yen biru, Yinni Gusunɔ u mɑɑ nùn sekobu nnɛ sɔ̃ɔsi. 
Mɑ u nùn bikiɑ u nɛɛ, mbɑ seko be, bɑ kobu nɑ. Mɑ u nùn wisɑ u nɛɛ, bɑ nɑwɑ bu kɑ kɔbi yi tɔ̃yɑ ko, kpɑ bu yi bɔɔku yi, yi yi Yudɑn tem wɔri yi mɛn tɔmbu yɑrinɑsiɑ sere ben ɡoo kun kpĩɑ u kɑ tii yinɑ. 
Ye Sɑkɑri u mɑɑ mɛɛrɑ, yerɑ u durɔ ɡoo wɑ u wɛ̃ɛ yĩirutii nɛni. 
Mɑ u nùn bikiɑ u nɛɛ, mɑnɑ ɑ dɔɔ. Mɑ u wisɑ u nɛɛ, nɑ dɔɔwɑ n Yerusɑlɛmu yĩire n kɑ yen dɛ̃ɛbu kɑ yen yɑsum wɑ. 
Sɑnɑm mɛ Gusunɔn ɡɔrɑdo wi u kɑ nùn ɡɑri mɔ̀, u susim wee, yerɑ ɡɔrɑdo ɡoo u mɑɑ nɑ u kɑ wiɔnɔ yinnɑ. 
Mɑ u nùn sɔ̃ɔwɑ u nɛɛ, ɑ dukɑ doo ɑ ɑluwɑɑsi wi sɔ̃ ɑ nɛɛ, Yerusɑlɛmu yɑ koo ko wuu ɡè bɑ ǹ mɑɑ ɡbɑ̃rɑru toosimɔ. Domi ɡen tɔmbu kɑ ɡen yɑɑ sɑbenu koo dɑbiɑ. 
Yinni Gusunɔ u mɑɑ nɛɛ, u ko n sɑ̃ɑ nɡe ɡbɑ̃rɑ dɔ̃ɔɡiru Yerusɑlɛmu yen sɔ̃. Mɛyɑ u ko n mɑɑ sɑ̃ɑ yen bɛɛrɛ. 
Sɑkɑri u nɛɛ, Yinni Gusunɔ u ɡeruɑ u nɛɛ, bɛɛ be u rɑɑ yɑrinɑsiɑ hɑnduniɑn ɡoonu nnɛ ye sɔɔ, i wurɑmɑ. I seemɑ i wurɑmɑ sɑɑ sɔ̃ɔ yɛ̃sɑn nɔm ɡeu ɡiɑn di. 
Bɛɛ Yerusɑlɛmuɡibu, bɛɛ be i yoru dimɔ Bɑbiloniɔ, i kisirɑmɑ. 
Domi wi, Gusunɔ wɔllu kɑ tem Yinni u nɛɛ, yenibɑn biru, Yerusɑlɛmun bɛɛrɛ yɑ koo wurɑmɑ. Wee u mɑn ɡɔriɔ bwese ni nu bɛɛn yɑ̃nu ɡurɑn mi. U nɛɛ, nù n mɑɑ bɛɛ bɑbɑ, yɑ sɑ̃ɑwɑ nɡe win tiin nɔniyɑ nu bɑbɑ. 
Wee u koo nu nɔmɑ doke kpɑ nu ɡɔsiɑ bɛɛn yobu. Sɑɑ ye sɔɔrɑ nu koo ɡiɑ mɑ Gusunɔ, wɔllu kɑ tem Yinniwɑ u mɑn ɡɔrimɑ. 
Wiyɑ u nɛɛ, bɛɛ Yerusɑlɛmuɡibu, i nuku dobun kuuki koowo. Domi u koo nɑ u n kɑ bɛɛ wɑ̃ɑ. 
Bwese dɑbinɑ nu koo wurɑ wi, Yinni Gusunɔn mi ɡiɑ yen tɔ̃ɔ te, kpɑ nu ko win tɔmbu, kpɑ u n wɑ̃ɑ kɑ be. Sɑɑ ye sɔɔrɑ i ko i ɡiɑ mɑ wi, Gusunɔ wɔllu kɑ tem Yinniwɑ u mɑn ɡɔrimɑ. 
U ko n mɑɑ Yudɑ mɔ tem dɛɛrɑm mɛ sɔɔ. U koo mɑɑ Yerusɑlɛmu ɡɔsi. 
Bɑɑwure u koo nɔɔ mɑri Yinni Gusunɔn wuswɑɑɔ. Domi u koo seemɑ win wɑ̃ɑ yee dɛɛrɑrun di.