Hibrus
Na Kekeda Laa Fua Toaa Diu ki
Toaa ne kera nao dasi Kristin da saea doo ta'aa 'oro 'asia naa sulia toaa Kristin ki. Si doo nai nia adea toaa kristin ki da too toi ka nao si diana 'ani kera ma karangi 'asia naa da kai lukasia manata mamana laa kera 'ana Kraes. Kera manata toi lau gwada oli lae uria lea lae sulia birangaa kera Diu ki. Na wane ne nia kekeda fua toaa kristin nai, nia saea fuada uri daka uu ngasi 'ada 'ana manata mamana laa kera. Nia bae 'urii fuada, “Sa Disas Kraes naa ne nia faatai folaa 'ana God fuakolu.” Ma 'ana si kada bae nia liu lao nonifiia baita bae, nia ka uu ngasi gwana. Nia 'initoa ka talua brofet ki sui 'ana kada 'i nao, ma ni nia na 'Alakwa nia God mamauri firi. Nia 'initoa ka talua 'ensel ki sui guu ma ka talua lau guu sa Mosis. Doo ne adea lea doo na kristin ki daka uu ngasi 'ada lao manata mamana laa kera nai 'ani nia, ma ka nao dasi oliburi lau uria birangaa kera bae Diu ki.
God nia saea sui naa, sa Disas na waa foa ni gwau ne nia totoo firi ma ka 'initoa ka talua waa ni foa ki sui guu 'ana kada 'i nao. Na raoa nia sa Disas, na waa foa ni gwau nai, nia tala'ana faamauri lana toae ki uri daka sakwadoloa faasia ta'aa lae ma na maee. Na afuafua baki 'ana kada 'i nao na nununa ki gwana raoa sa Disas nia ilia ki. Na wane ne kedaa buka nee, nia saea fua Kristin ki uri daka uu ngasi 'ada 'ana manata mamana laa kera ka lelea firi mala waa baita baki 'ana kada 'i nao. Nia saea fuada uri daka uu ngasi 'ada 'ana manata mamana laa kera sui boroi 'ana kera daka dao 'ana si kada toae ki da maa susuala 'ani kera uri maana manata mamana laa kera nai.
Na 'inifuui baee ki lao buka nee:
Sa Disas nia 'initoa ka talua 'ensel ki 1:1—2:18
Sa Disas nia 'initoa ka talua sa Mosis ma sa Diosua 3:1—4:13
Sa Disas nia waa foa ni gwau Mamane 4:14—7:28
Alangaia nia sa Disas nia 'initoa tasa 8:1—9:22
Afuafua nia sa Disas nia 'initoa tasa 9:23—10:18
Uu ngasi 'ana manata mamana lae 10:19-30
Toaa manata mamana ki 'ana God 'ana kada 'i nao 11:1-40
Liokwaisulii 'ana mauria nia sa Disas 12:1—13:19
Si baea 'isi ki 13:20-25
1
God nia bae fuakolu 'ana 'Alakwa nia
1 'I nao mai God nia bae 'ana brofet ki fua kokoo bora kolu ki 'ana kada 'oro ki, ma 'ana doo 'e'ete 'oro ki. 2 Sui 'afa sato 'isi neki 'i tari'ina naa nia bae lau 'ana fuakolu 'ana 'Alakwa nia. God nia fulia doo ki sui guu 'ana rao lana 'Alakwa nia ma ka filia 'Alakwa nia uri totoo nia kai too 'ana doo nai ki sui guu. 3 Sa Disas 'Alakwa nia God 'e faatai folaa 'ana 'initoa lana God, suli keerua sui guu daru bobola guu. Ma na 'Alakwa nia ka dau ngasi 'ana doo ki sui guu 'ana bae lana uri doo ki sui guu ka nao dasi sui. Ma 'i burina ne 'Alakwa nia 'e kwaia taale fua faafaalu lana wane faasia abulo ta'aa lae ki sui guu lelea ka sui, nia ka oli naa uria 'i salo ma ka 'inito naa 'i bali aolo nia God ne baita ka tasa.
'Alakwa nia God nia 'initoa tasa
4 Na 'Alakwa nia God nia 'initoa ka talua 'ensel ki tiifau, suli na satae doo ne God falea fuana 'e 'initoa ka talua sui guu satae doo neki 'ensel ki too ai. 5 Suli God nia bae 'urii fuana,
“'I tari'ina nau ku bae folaa ai, ni 'oe na 'Alakwa nau, ma ni nau na Maa 'oe.”✡ Sam 2:7
Ma God ka bae lau gu 'urii sulia 'Alakwa nia nai,
“Nia kai Maa 'ani nau, ma ni nau kwai Wela 'ani nia.”✡ 2 Samiol 7:14
Aia, ma God nia 'afitai ka bae 'uri nai fua ta 'ensel 'ana 'ensel nia ki.
6 'Ana si kada God nia karangi kai falea na mai 'Alakwa nia fua lao molaagali, nia bae suli nia ka 'urii,
“Alu 'ensel nau ki sui guu da faabaitaa nia 'ada.”✡ Diutoronomii 32:43
7 Si kada God nia bae ma ka fuutona 'ensel ki, nia ka bae 'urii,
“Na 'ensel nau ki da rao fuaku mala 'ana sasaule ki ma na meakwesu ki.”✡ Sam 104:4
8 Aia ma God 'e bae fua 'Alakwa nia, ka bae 'urii,
“'O God 'ae! Na 'initoaa 'oe na 'initoaa totoo firi
ma na 'initoaa 'ana 'o'oloe.
9 'Oe 'o liosau 'ana 'o'oloe ma 'oko mamagutainia garoe.
Nia ne nau God 'oe ku fili 'oe ma ku ele suli 'oe ka talua wane kwaimani 'oe ki sui guu.”✡ Sam 45:6-7
10 God nia ka bae lau gu 'urii fua 'Alakwa nia,
“'O Aofia 'ae, 'ana sasafalie mai, 'oe 'o saungainia molaagali ma na dongana mamangaa loo daka too.
11 Na doo nai ki tara kera totoo da kai funu gwada. Aia ma ni 'oe 'afitai totoo 'oko funu.
Doo nai ki da mala 'ana tasi 'aba maku ne totoo kai fura gwana.
12 Tara 'oe 'oko lukumia doo nai ki mala 'ana ta wane nia lukumia ta maku ne kwali naa.
Ma tara 'oe 'oko talana doo nai ki mala 'ana ta maku ne nao si diana naa daka talana.
Aia ma ni 'oe 'oko mauri ka totoo firi, 'afitai totoo 'oko tatala.”✡ Sam 102:25-27
13 Aia, ma God nia ka bae lau gu 'urii fua 'Alakwa nia nai,
“'O too 'amua 'i bali aolo nau kula 'ana 'initoae lelea ka dao 'ana si kada kwai alua 'oko 'inito naa 'ana malimae 'oe ki.”✡ Sam 110:1
God nia 'afitai ka bae 'uri nai fua ta 'ensel.
14 Na 'ensel ki sui guu na anoedoe ki gwana uri rao lae fua God. God nia alu kera uri daka rao uri 'adomi lana toaa neki God nia faamauri kera.