1 Afum alɔma ŋanayɛfɛ atɔf ŋa Yude, ŋac-təksɛ awɛŋc aŋa alaŋ ntɛ: Kɔ nəntɔyɔ pakəŋc’ un pəmɔ tɔkɔ tɔyɔ tokur ta Musa toloku ti mɔ, Kanu kəfɔdewosɛ kəyac nu. 2 Ntɛ Pol kɔ Barnabas ŋaŋgbɛkəlɛnɛ kɔ arkun akakɔ kəliŋɛnɛ kəŋan moloku mɔ, kɔ ŋantəŋnɛ a nkɔn Pol kɔ Barnabas kəbəp ka akin akin arkun akakɔ dacɔ, ŋakɔ Yerusalɛm kəkɔ-nɔnɛ moloku mamɔkɔ nnɔ asom a Yesu kɔ abeki a kəloŋkanɛ ka alaŋ fɔr kiriŋ. 3 Kɔ kəloŋkanɛ ka alaŋ a Antiyɔk ŋasɔŋ ŋa daka ndɛ pənamar a ŋayɔ teta marənt mɔ. Ntɛ ŋaŋcepər atɔf ŋa Fenisi kɔ atɔf ŋa Samari mɔ, kɔ ŋalɔmər ŋa ntɛ atɔyɔnɛ Suyif ŋaŋkafəli bəkəc yaŋan nnɔ Wəbɛ eyi mɔ, ŋac-sɔŋɛ awɛŋc aŋa alaŋ fəp pəbotu. 4 Ntɛ ŋambɛrɛ Yerusalɛm mɔ, kɔ kəloŋkanɛ ka alaŋ, asom a Yesu, kɔ abeki a kəloŋkanɛ ŋambaŋ ŋa. Ntɛ tɔ Pol kɔ Barnabas ŋalɔm tɔkɔ Kanu kənayɔ fəp kɔ ŋa mɔ.

5 Awa kɔ aFarisi alɔma aŋɛ ŋanayɔnɛ alaŋ mɔ ŋayɛfɛ kɔ ŋaloku: «Pəmar pakəŋc atɔyɔnɛ Suyif, pagbiŋər ŋa sɔ kəleləs sariyɛ sa Musa.»

6 Asom a Yesu kɔ abeki a alaŋ aka Yerusalɛm ŋanabəpsɛnɛ kəkɔ-mɔmən ka tes tatɔkɔ. 7 Ntɛ kəgbɛkəlɛnɛ kəwon ŋa dacɔ mɔ, kɔ Piyɛr ɛyɛfɛ k’oloku: «Arkun, awɛŋc im aŋa, nəŋcərɛ ti: A pəwon ntɛ Kanu kənayɛk-yɛk im nəna dacɔ kəcam ka toloku tɔtɔt ta Yesu, ntɛ tɔŋsɔŋɛ atɔyɔnɛ Suyif ŋatam kəne ti kɔ kəlaŋ ti mɔ. 8 Kanu kəŋcərɛ bəkəc ya afum, Ki yati kəmentər a kəmbaŋ atɔyɔnɛ Suyif, bawo kəsɔŋ ŋa sɔ Amera Ŋecempi pəmɔ səna. 9 Ali kəgbɛy kəfɛt ɛŋgbɛy fɛ su kɔ atɔyɔnɛ Suyif, bawo kəlaŋ k’ ɔsɔkəsɛ ŋa bəkəc. 10 Ndɛkəl oŋ, ta ake tɔ nəfaŋ kədəkətərɛ Kanu-ɛ? Ntɛ nəfaŋ kəsarsər acɛpsɛ a Yesu tes tocu ntɛ, kəyɛfɛ atem asu haŋ səna yati səntɔtam kəsarɛ mɔ. 11 Mba səlaŋ a andeyac su kəmar ka Wəbɛ Yesu disrɛ pəmɔ ŋa atɔyɔnɛ Suyif.»

12 Kənay ka afum fəp ŋanacaŋk, k’aŋcəŋkəl oŋ moloku ma Barnabas kɔ Pol. Kɔ ŋalɔm mes mɛwɛy-wɛy kɔ mɛgbɛkərɛ mmɛ Kanu kənasɔŋɛ ŋa kəyɔ atɔyɔnɛ Suyif dacɔ mɔ. 13 Ntɛ ŋalip kəloku mɔ, kɔ Sak endeŋər: «Awɛŋc im aŋa! Nəcəŋkəl im! 14 Simɔŋ ɔlɔm ntɛ tɔcɔkɔ-cɔkɔ Kanu kənader kəyɛk-yɛk tɔf ya doru fəp dacɔ, afum aŋɛ ŋayɔnɛ akɔn mɔ. 15 Itɔ moloku ma sayibɛ-e mosolnɛ kɔ moloku ma Simɔŋ pəmɔ ntɛ aŋcic ti mɔ:

19 It’ ɔsɔŋɛ ntɛ, ina Sak, iŋwosɛ sɔ a ta patɔrəs atɔyɔnɛ Suyif aŋɛ ŋantɛfərnɛ nnɔ Kanu kəyi mɔ. 20 Mba pacicɛ ŋa a ŋakɛmərnɛ pətɔ-cemp mpɛ pɛyɛfɛ nnɔ kətola mɛrənka kəyi mɔ, kɔ dalakɔ, kɔ kəsɔm ka sɛm nyɛ antɔfay mɔ, ŋakɛmərnɛ sɔ kəmun mecir. 21 Kəyɛfɛ dɛtɛmp dɔcɔkɔ-cɔkɔ, Musa ɔyɔ sədare fəp afum aŋɛ ŋaloku tetɔn mɔ, bawo aŋkaraŋ Tawureta tɔn dɔsɔk o dɔsɔk da kəŋesəm nde dəkətola Kanu da aSuyif.»

22 Asom a Yesu kɔ abeki kəbəp ka kəloŋkanɛ ka alaŋ Yesu kɔr-kɔr ŋande ŋamɔmən a pəmar payɛk-yɛk ŋa dacɔ afum alɔma akɔ pəmar a pasom Antiyɔk mɔ, kəbɛrɛnɛ ka Pol kɔ Barnabas. Ti disrɛ kɔ ŋayɛk-yɛk afum mɛrəŋ aŋɛ ŋanatɔmpər delel awɛŋc aŋa dacɔ mɔ: Yudas wəkɔ aŋc-we sɔ Barsabas mɔ, kɔ Silas. 23 Kɔ ŋasom ŋa kɔ areka nyɛ:

«Awɛŋc anu, asom a Yesu kɔ abeki kɔ alaŋ ŋaŋcicɛ nu areka, nəna awɛŋc su aŋa aka Antiyɔk, aka Siri, aka Silisi aŋɛ ŋantɔyɔnɛ Suyif mɔ:

Səyif un! 24 Səne a afum asu alɔma aŋɛ ŋawur nnɔ ndorosu mɔ, ŋantɔrəs nu kɔ ŋampempɛ nu moloku maŋan, mmɛ səntɔsom ŋa mɔ. 25 Ntɛ sənenɛnɛ akɔ səntəŋnɛ ti mɔ, itɔ sənəŋk fɔ pəntesɛ səyɛk-yɛk afum, səsom ŋa nde nəyi mɔ, kəbɛrɛnɛ ka Barnabas kɔ Pol, aŋɛ səmbɔtər mɔ, 26 afum aŋɛ ŋaŋcaməs kiyi kəŋan doru tewe ta Wəbɛ Yesu Krist mɔ. 27 Itɔ səsom Yudas kɔ Silas ŋakɔ ŋalok’ un ntɛ teyi areka ŋaŋɛ disrɛ mɔ.

28 Pənabas Amera Ŋecempi kɔ səna sɔ, a pəntesɛ fɛ a sənuŋkər nu mes mɔkɔ nəntɔtam kəsarɛ mɔ, mɛnɛ mes mɔkɔ mɛmar nu kəsumpər mɔ: 29 Ta nəsɔm sɛm nyɛ aloŋnɛnɛ mɛrəŋka mɔ, nəbɔlɛnɛ mecir kɔ sɛm nyɛ antɔfay mɔ, nəbɔlɛnɛ sɔ dalakɔ. Pəmar nəkɛmərnɛ mes mamɔkɔ fəp.

30 Ntɛ anasak asom aŋɛ mɔ, kɔ ŋawurnɛ kəkɔ Antiyɔk. Kɔ ŋaŋkɔ ŋaloŋka di alaŋ, kɔ ŋasɔŋ ŋa areka ŋaŋɔkɔ. 31 K’aŋkaraŋ ŋi kɔ pəmbɔt ŋa, bawo areka ŋaŋɔkɔ ŋɛnacəpəs ŋa bəkəc. 32 Yudas kɔ Silas aŋɛ ŋanayɔnɛ sɔ sayibɛ-e mɔ ŋaŋc-gbiŋər awɛŋc aŋa alaŋ kɔ ŋacəpəs ŋa sɔ bəkəc dəmoloku mɛlarəm. 33-34 Ŋanayi dəndo Antiyɔk haŋ, kɔ awɛŋc aŋa alaŋ ŋatolanɛ ŋa marənt moforu, kɔ afum a Antiyɔk ŋasak ŋa kəlukus nde asom aŋa ŋayi mɔ. 35 Mba tɛm tatɔkɔ Pol kɔ Barnabas ŋanayi Antiyɔk, kəbɛrɛnɛ kəŋan kɔ afum alarəm alɔma, ŋac-təksɛ, ŋac-cam sɔ toloku tɔtɔt ta Wəbɛ.

36 Ntɛ mataka mɔlɔma meŋcepər mɔ, kɔ Pol oloku Barnabas: «Səluksərnɛ səkɔ-nəŋk awɛŋc su aŋa sədare nsɛ sənadəŋk toloku ta Wəbɛ mɔ, ntɛ tɔŋsɔŋɛ səcərɛ ntɛ ŋayi mɔ, kɔ tɔkɔ ŋasumpər toloku tatɔkɔ mɔ. 37 Barnabas nkɔn ɛŋc-faŋ kəkenɛnɛ Saŋ, wəkɔ aŋwe sɔ «Mark» mɔ. 38 Mba Pol nkɔn ɛnawosɛ fɛ ti, ɛnacɛm-cɛmnɛ a pəmar fɛ kəlɛkɛnɛ Mark, bawo dəndo Paŋfili Mark ɛnasak ŋa pəfati kəcəmbər ŋa kəkɔtɛnɛ ka yɛbəc yɔkɔ anasom ŋa mɔ. 39 Kəgbɛkəlɛnɛ kəŋan kənayeŋk haŋ kɔ tɔsɔŋɛ ŋa kəgbɛyɛnɛ. Ntɛ tɔ kɔ Barnabas ɛlɛk Mark kɔ ŋambɛkɛ debil kɔ ŋaŋcali kəkɔ Sipər. 40 Ntɛ Pol ɛnayɛk-yɛk Silas mɔ, awɛŋc aŋa alaŋ ŋantolanɛ kɔ, ŋac-tola Wəbɛ a pəbum ŋa kəmar kɔn disrɛ, kɔ ŋaŋkɔ. 41 Kəkɔ kəŋan, kɔ ŋaŋcali tɔf ya Siri kɔ Silisi, ŋac-cəpəs alaŋ aka di bəkəc.