1 «Awɛŋc im aŋa, Abek’ em aŋa!» Pol oŋc-loku, «Nəcəŋkəl oŋ moloku mmɛ iyɔ mɛyacnɛnɛ mɔ.» 2 Ntɛ ŋane pəc-cɔpər ŋa kusu kəŋan cəArame mɔ, kɔ pənaŋkanɛ kəyɔ yeŋ.

K’oloku: 3 «WəSuyif iyɔnɛ, pakom im dare da Tarəs, atɔf ŋa Silisi. Mba nnɔ dare dandɛ d’andusum im nnɔna Kamaliyel nwɛ afum fəp ŋaŋcərɛ mɔ. Nwɛ ɛntəks’ em bel-bel sariyɛ sa atem asu mɔ, k’inasumpər sɔ teta Kanu bel-bel kɔ abəkəc fəp, pəmɔ tantɛ pəyi nəna sɔ mɔkɔ mɔ. 4 K’inatɔrəs afum alɔma aŋɛ ŋanacəmɛ dɔpɔ da Yesu dandɛ darəŋ mɔ haŋ kɔ ŋafi. K’iŋkot aran kɔ arkun, k’imbɛr ŋa dəbili. 5 Wəloŋnɛ wəpɔŋ kɔ abeki a dɔtɔf fəp ŋayɔnɛ atəŋnɛ aka ti. Inasɔtər ŋa reka kəkenɛ afum em aka Damas, nde iŋc-kɔ kəkɔ-sumpər alaŋ akɔ ŋanayi di mɔ, ikɛrɛ ŋa fɔr ya abɛ kiriŋ nde Yerusalɛm pakɔ-sut.

6 Dɔpɔ inayi ic-lɔtərnɛ Damas, daŋ peŋ, gbəŋcana babɔkɔ, kɔ pəmot pɔpɔŋ pɛyɛfɛ dareŋc kɔ pɛŋkɛl im pəwaŋkəra. 7 K’intɛmpɛnɛ dəntɔf, k’ine dim ndɛ doŋc-lok’ im: ‹Sol, Sol, ta ake tɔ məntɔrs’ em-ɛ?›

8 K’iyif: ‹Wəbɛ, məna an’ɔfɔ-ɛ?

K’olok’ im: ‹Ina, Yesu wəka Nasarɛt iyɔnɛ, nwɛ məna məyi kətɔrəs mɔ.› 9 Afum aŋɛ sənasol mɔ ŋananəŋk pəwaŋkəra papɔkɔ bel-bel, mba ŋanane fɛ dim da nwɛ oŋc-lok-lokər im mɔ.

10 K’iyif kɔ: ‹Cəke cɔ pəmar iyɔ-ɛ, Wəbɛ?›

Kɔ Wəbɛ olok’ im: ‹Məyɛfɛ, məkɔ dare da Damas, dəndo aŋkɔlok’ əm tɔkɔ pəmar’ əm kəyɔ mɔ fəp. 11 Mba ntɛ pəwaŋkəra pa pəmot papɔkɔ pɛnasɔŋ’ em kətɔ-nəŋk mɔ, afum akɔ sənasol mɔ ŋasumpər im kəca kɔ ŋaŋkekər’ em haŋ kɔ imbɛrɛ Damas.

12 Mba fum wəlɔma ɛnayi di pac-we kɔ Ananiyas, pəcəmɛ tɛfaŋ ta Kanu darəŋ pəmɔ tɔkɔ sariyɛ səloku ti mɔ. Nwɛ aSuyif aŋɛ ŋanandɛ di ŋanacərɛ kɔ dɔtɔt amera mɔ. 13 Kɔ Ananiyas ender nnɔ iyi mɔ, k’ɛŋcəm’ em kəsək, k’olok’ im: ‹Sol, wɛŋc im, məluksərnɛ sɔ kənəŋk.› Gbəŋcana babɔkɔ k’inəŋk nkɔn Ananiyas.

14 Kɔ Ananiyas olok’ im: ‹Kanu ka atem asu kəsɔŋ əm kəcərɛ ka tɛfaŋ tɔn, mənəŋk Wəlompu, məne sɔ dim dɔn, 15 bawo məndekɔ-yɔnɛ kɔ sede fɔr ya afum fəp kiriŋ ta ntɛ kɔ ntɛ məne sɔ mɔ. 16 Ndɛkəl oŋ ta ake tɔ məyi kəwonɛ-ɛ? Məyɛfɛ məyɔ pagbət əm dəromum teta Kanu, payak’ əm kiciya kam kəwe ka Wəbɛ disrɛ.›

17 Ntɛ ilukus Yerusalɛm mɔ, ic-tola nde kəlɔ kəpɔŋ ka Kanu, kɔ kənəŋk kənder im kəyɛfɛ dareŋc. 18 Ti disrɛ, k’inəŋk Wəbɛ Yesu, nwɛ ɛnalok’ im: ‹Məkufɛ məwur Yerusalɛm, bawo ŋafɔdewosɛ kəne sede səkɔ məsumpər tetem mɔ.›

19 K’iloku kɔ: ‹Wəbɛ, ŋaŋcərɛ a iŋc-kɔ dəwɔlɔ wa dəkətola da aSuyif, ic-sut, ic-bɛr afum dəbili aŋɛ ŋanalaŋ tetam mɔ. 20 Ntɛ analoŋ mecir ma sede sam Etiyɛn mɔ, ina wəkawɛ yati inayi di, kɔ mes maŋan mɔmbɔt im. In’ ɛnamɛŋkɛ akakɔ ŋanadif kɔ mɔ yati yamos.›

21 Mba kɔ Wəbɛ olok’ im: ‹Məkɔ! Pəbɔlɛ pɔ ina indesom əm, nde atɔyɔnɛ Suyif ŋayi mɔ.›»

22 Afum ŋanacəŋkəl kɔ haŋ tɛm ntɛ ɛnaloku toloku tatɔkɔ mɔ, mba ndɛkəl oŋ kɔ ŋampɛnɛ sim ŋac-loku: «Pamələk kɔ! Ta pasak fum pəmɔ wəkawɛ pəyi doru.»

23 Kɔ ŋaŋkulɛ-kulɛ, kɔ ŋaŋgbal suma səŋan kɔ ŋaləm kəbof dareŋc. 24 Kɔ wəbɛ wəsɔdar wəRom osom asɔdar ɔn a pabɛrsɛnɛ kɔ dəkədirɛ daŋan. K’oloku a pasut Pol ntɛ tɔŋsɔŋɛ pəloku-loku, pacərɛ te tɔkɔ ɔyɔ ntɛ tɔsɔŋɛ afum kəkulɛ-kulɛ tetɔn mɔ. 25 Ntɛ anakot Pol kəkɔ sut kɔ mɔ, kɔ Pol eyif wəbɛ wəsɔdar wəkɔ ɛnayi di mɔ: «Awos’ am kəsut wəkom wəRom nwɛ antɔkiti mɔ ba?»

26 Ntɛ wəbɛ wəsɔdar nwɛ ene toloku tatɔkɔ mɔ, k’ɔŋkɔ pəyif wəbɛ wəsɔdar wəpɔŋ, pəc-loku: «Cəke məndeyɔ-ɛ? Wəkom wəRom ɔfɔ.»

27 Kɔ wəbɛ wəpɔŋ wəsɔdar wəRom ender k’eyif kɔ: «Məlok’ im kaŋce, wəkom wəRom məyɔnɛ ba?»

Kɔ Pol owosɛ: «Ɛy.»

28 Kɔ wəbɛ wəpɔŋ wəsɔdar wəRom nwɛ oloku sɔ: «Ina, pəsam pɛlarəm p’ isɔtɔnɛ kəyɔnɛ ka wəRom!»

Kɔ Pol oloku: «Ina, aŋkom em ti kəkomɛ dəm.»

29 Gbəŋcana babɔkɔ, akɔ pənamar ŋasɔŋɛ Pol kəlok-loku mɔ ŋambɔlɛ, kɔ wəbɛ wəsɔdar enesɛ, kəcərɛ a wəkom wəRom yati ɔsɔŋɛ k’aŋkot.

30 Dɔckɔsɔk wəbɛ wəka asɔdar nwɛ pəfaŋ kəcərɛ tes tɔkɔ aSuyif akakɔ ŋamboŋcɛ Pol mɔ, k’oloku a pasikəli kɔ, k’oloku sɔ aloŋnɛ apɔŋ kɔ aboc kiti aSuyif fəp kəloŋkanɛ. Kɔ wəbɛ ɛŋkɛrɛ Pol k'ɛŋcəmbər kɔ fɔr yaŋan kiriŋ.