1 Ntɛ mata kəcamət meŋcepər mɔ, kɔ wəloŋnɛ wəpɔŋ Ananiyas ontor kɔ abeki a dɔtɔf alɔma kɔ wəgbɛkəlɛnɛ wəkin pac-we kɔ Tɛrtulu. Kɔ ŋaŋkɔ ŋabokɛnɛ nnɔ wəbɛ wəka dɔtɔf eyi mɔ teta Pol. 2 Kɔ wəbɛ ka dɔtɔf osom k’awe Pol, kɔ Tɛrtulu oŋcop moloku mɔn ntɛ: «Wəbɛ, mən’ ɔsɔŋɛ ntɛ səyinɛ bəkəc yoforu mɔ. Kəkɔtɛnɛ dɛbɛ kam kətɔt, kɔ kəsəkpər ka mes mɔlɔma teta atɔf ŋosu ŋaŋɛ, bawo mənayay ŋi ntɛ tender mɔ. 3 Wəbɛ Felikəs wəleləs kosu, səŋsɔtɔ pətɔt papɔkɔ tɛm fəp kɔ mofo fəp. Səŋyek-yekəs’ am ti. 4 Mba ntɛ intɔfaŋ kəlɛkər əm tɛm tɛlarəm mɔ, it’ intolan’ am kəcəŋkəl su abəkəc ŋɔtɔt disrɛ tɛm tepic.

5 Səŋkɔkcɛ a fum wəkawɛ wəbɛrəs afum dacɔ ɔyɔnɛ, nkɔn ɔŋsɔŋɛ aSuyif fəp kəgbɛkəlɛnɛ doru mofo fəp. Wəkiriŋ wəka kəgba ka afum a Nasarɛt ɔyɔnɛ. 6-7 Ɛnafaŋ yati kəyik-yikəs kəlɔ kəpɔŋ ka Kanu, itɔ sənasumpərɛ kɔ. 8 Məna Wəbɛ məntam kəyifət kɔ, mətɛn kəcərɛ kɔ pəyɔnɛ fɔ a tɔkɔ səmboŋcɛ kɔ mɔ kaŋce kɔ-ɛ.»

9 Kɔ Asuyif aŋɛ ŋanayi di mɔ, ŋambaŋɛ Tɛrtulu, kəc-loku: «Itɔ teyi yati!»

10 Ntɛ wəbɛ ka dɔtɔf ɛfɛk Pol kəca a pəlok-loku mɔ, kɔ Pol oloku ntɛ: «Wəbɛ, iŋcərɛ a meren mɛlarəm mɔ məyi atɔf ŋaŋɛ məc-kiti. Kəlaŋ kaŋkɔ disrɛ k’indelokɛn’ am kəyac kem. 11 Tɛntacepər fɛ mata wəco kɔ mɛrəŋ ntɛ impɛ dare da Yerusalɛm kəkɔ-kor-koru Kanu, məntam ti kəyifət. 12 Ambəp f’em kəlɔ kəpɔŋ ka Kanu, ambəp f’em dəkəlɔ ka dəkətola Kanu da aSuyif, ambəp f’em dare disrɛ səc-gbɛkəlɛnɛ kɔ fum, kɔ pəyɔnɛ fɛ ti-ɛ, ic-gbiŋər afum kəyɛfərɛnɛ. 13 Ŋafɔtam sɔ kəc-mentər əm kaŋce ka tes tɔkɔ ŋamboŋc em mɔ. 14 Kaŋce intam kəwosɛ nnɔ fɔr yam kiriŋ a Kanu ka atem em k’iŋkor-koru, k’iŋcəmɛ dɔpɔ da Wəbɛ darəŋ ndɛ ŋa ŋaŋcɛm-cɛmnɛ a yem yɔ mɔ. Mba ina ilaŋ ntɛ o ntɛ aŋcic dəkitabu Tawureta Musa kɔ Sayibɛ-e mɔ. 15 Iŋgbɛkər teta Kanu tɔlɔma amera, ntɛ ŋa aboŋc’ em mes ŋa sɔ ŋaŋgbɛkər mera mɔ: It’ ɔyɔnɛ a Kanu kəndeyekti afi, alompu kɔ atɔlomp. 16 It’ ɔsɔŋɛ ntɛ ina sɔ iŋsɛp tɛm fəp kəkɔtɛnɛ amera ŋɔtɔt fɔr ya Kanu kɔ afum kiriŋ.

17 Ntɛ meren mɛlarəm meŋcepər mɔ, k’inder nnɔ Yerusalɛm kədemar afum em, k’iloŋɛnɛ sɔ domun. 18 Kɔ ŋaŋkɔ ŋabəp im ic-sɔkəsnɛ kəlɔ kəpɔŋ ka Kanu disrɛ, bafɔ afum ŋaloŋkanɛ di, bafɔ pac-gbɛkəlɛnɛ. 19 Mɛnɛ aSuyif a atɔf ŋa Asi alɔma akɔ ŋanayi di mɔ, ŋa ŋɔ pəmar kəder nnɔ məyi mɔ ŋac-boŋc’ em mes, kɔ pəyɔnɛ fɔ a ŋantɔmpər em mi-ɛ. 20 Kɔ pəyɔnɛ fɛ ti-ɛ, afum akaŋɛ ŋaloku tes tɛlɛc ntɛ aboc kiti a kəlɔ kəpɔŋ ka Kanu ŋananəŋk im ntɛ ŋanakit’ im mɔ. 21 Mɛnɛ pəyɔnɛ toloku tɔkɔ inalokɛ dim dɔpɔŋ, icəmɛ ŋa dacɔ mɔ de: ‹Teta kədeyɛfɛ defi nkɛ ilaŋ mɔ, k’aŋcəmbər’ im mɔkɔ kiti nnɔ fɔr yam kiriŋ-ɛ!›»

22 Tɛnabəp paloku Felikəs bel-bel mes ma dɔpɔ da Wəbɛ Yesu, k’olukəsɛ kiti dɔsɔk dɔlɔma, pəc-loku: «Kɔ wəbɛ wəsɔdar wəRom Lisiyas endeder-ɛ, indemɔmən tes tonu.» 23 Kɔ wəbɛ ka dɔtɔf oloku wəsɔdar a pəcaŋər kɔ, mba ta pəkot kɔ, ta pəmɔnɛ sɔ afum ɔn kəmar kɔ mes mɔlɔma.

24 Ntɛ mataka mɔlɔma meŋcepər mɔ, Felikəs ŋasol kɔ wəran kɔn, Durusil, wəSuyif ɛnayi, kɔ ŋander, kɔ ŋasom pakɔ-we Pol. Kɔ ŋaŋcəŋkəl kɔ kəloku ka kəlaŋ kɔn Yesu Krist. 25 Mba ntɛ Pol ɛnatɛfərnɛnɛ moloku mɔn teta pəlompu, teta kəsumpərnɛ, kɔ kiti nkɛ kəndeder mɔ, kɔ kənesɛ kəyi Felikəs. K’oloku Pol: «Pəntəŋnɛ mɔkɔ tantɛ. Məkɔ kərɛsna. K’indesɔtɔ tɛm-ɛ, indesɔ w’ am.» 26 Felikəs ɛnafɔtɔma a Pol ɔŋkɔsɔŋ kɔ pəsam. It’ oŋc-soməsɛ tɛm fəp, pakɔ-wenɛ kɔ Pol ŋaloku-loku.

27 Kɔ ŋayi ti disrɛ haŋ kɔ meren mɛrəŋ meŋcepər, k’asəkpər Felikəs dɛbɛ, k’andəs Pɔrsiyus Fɛstus. Mba ntɛ Felikəs ɛnafaŋ kəbɔtəs abɛ aSuyif mera mɔ, k’ɛsak Pol dəbili.