1 Kɔ Kanu Kəpɔŋ kəloku Abram: «Məwur atɔf ŋam, dəŋkom dam, kəlɔ ka papa kam, məkɔ atɔf nŋɛ indementər əm mɔ. 2 Indesɔŋ' am kəyɔnɛ ka kas k'afum alarəm, indesɔŋ əm pətɔt, indesɔŋɛ tewe tam tɛbɛk. Məndetolanɛ afum alɔma pətɔt. 3 Indesɔŋ pətɔt aŋɛ ŋandetolan' am pətɔt mɔ. Indesɔŋ pəlɛc aŋɛ ŋandetolan' am pəlɛc mɔ. Tetam tɔ indesɔŋɛnɛ cusuŋka ca doru fəp pətɔt.»

4 K'Abram owur Haraŋ pəmɔ tɔkɔ Kanu Kəpɔŋ kənaloku kɔ ti mɔ, kɔ Lɔt ɛŋcɛpsɛ kɔ darəŋ. Tɛnatəŋnɛ Abraham pəsɔtɔ meren 75. 5 K'Abram ɛlɛk Saray, wəran kɔn, kɔ wan ka wəbek' ɔn wərkun, Lɔt, kɔ ca yɔkɔ ŋanayɔ di mɔ, k'afum * ti tɔyɔnɛ «yeŋesəm, ca yeyi wəyeŋ.» akɔ ɛnasɔtɔ Haraŋ mɔ. Kɔ ŋawur kəkɔ atɔf ŋa Kanahan.

Kɔ ŋambɛrɛ atɔf ŋa Kanahan. 6 K'Abram ɛŋcali atɔf haŋ kəfo nkɛ aŋc-we Səkɛm, haŋ nde tofo ntɛ Aŋkiri-ŋa-More ŋɛŋcəmɛ mɔ. Aka Kanahan ŋanayi atɔf ŋaŋɔkɔ tɛm tatɔkɔ.

7 Kɔ Kanu Kəpɔŋ kəwurər Abram kɔ kəloku kɔ: «Indesɔŋ atɔf ŋaŋɛ yuruya yam.» K'Abram olompəs dəkəloŋnɛ da Kanu Kəpɔŋ nkɛ kənawurər kɔ dəndo mɔ. 8 K'eyekti sɔ di saŋka, nde ɛŋcyɛfɛ pəckɔ dəmɔrɔ mɔ, kəca nkɛ dec dɛmpɛ Betel † Betel = «kəlɔ ka Kanu.» mɔ. K'ɛŋcəmbər abal di, Betel beyi kɔ nde dec dɛŋkalɛ mɔ, dare da Hay deyi kɔ nde dec dɛmpɛ mɔ. K'ɔlɔ di dəkəloŋnɛ da Kanu, k'ontola tewe ta Kanu Kəpɔŋ. ‡ Tewe tɔtɔt ta Kanu, ti tɔyɔnɛ «Yahweh.» 9 K'Abram ɛyɛfɛ kəcal-cali kəkɔ ka kəca ka Nɛkɛf.

10 Dɔr dɛnayi dɔtɔf, k'Abram ontor Misira kəkɔ-cepərɛnɛ tɛm, bawo dor dɛŋc-bɛk kəbɛk dəm. 11 Ntɛ ɔlɔtərnɛ kəbɛrɛ Misira mɔ, k'oloku wəran kɔn Saray: «Məcəŋkəl im, iŋcərɛ fɔ wəran wətɔt teyi məyɔnɛ. 12 K'aka Misira ŋaŋdekɔ-nəŋk əm-ɛ, ŋandekɔ-loku: ‹Wəran kɔn ɔfɔ!› Tɛm tatɔkɔ ŋandekɔ-dif im, ŋasak məna. 13 Mədekɔ məloku ŋa a wəkirɛ kem məyɔnɛ. Ntɛ tɔŋsɔŋɛ ŋasumpər im bel-bel tetam mɔ, tetam tendekɔ-sɔŋɛ, ta ifi-ɛ.»

14 Ntɛ Abram ɛmbɛrɛ Misira mɔ, k'aka Misira ŋanəŋk wəran nwɛ entesɛ pəcepərər. 15 K'akəsək a Firawona § Bafɔ tewe ta fum tɔ, mba tewe ta abɛ a Misira teŋc-yi. ŋanəŋk kɔ, kɔ ŋayekyekəs kɔ nda Firawona. Ntɛ tɔ k'aŋkɛrɛ wəran nwɛ nde kəlɔ ka Firawona. 16 Kɔ Firawona osumpər Abram bel-bel teta Saray, k'ɔsɔtɔ kəyɛfɛ sɛm yɛfɛt haŋ yɔpɔŋ, sofale, amarəs arkun k'aran kɔ yɔkɔmɛ. 17 Mba kɔ Kanu Kəpɔŋ kəsɔŋ Firawona k'afum ɔn ruŋc yɔpɔŋ teta Saray, wəran ka Abram. 18 Kɔ Firawona ewe Abram, k'eyif kɔ: «Cəke cɔ məyɔ em ntɛ? Ake'sɔŋɛ ntɛ məntɔlok' im a wəran kam ɔfɔ mɔ? 19 T'ake tɔ məlokɛ a wəkirɛ kam ɔfɔ-ɛ? Məsɔŋ' em kəlɛk kɔ pəyɔnɛ wəran kem. Ndɛkəl oŋ, wəran kam ɛwɛ. Məlɛk kɔ! Məkɔ!»

20 Kɔ Firawona oloku afum ɔn, «Nəsak kɔ pəkɔ nkɔn, kɔ wəran kɔn kɔ ca nyɛ yɔyɔnɛ yɔn mɔ.»