1 Kɔ Isiyaka ewe Yakuba, k'ontolanɛ kɔ pətɔt, k'osom kɔ ntɛ: «Ta mənɛŋcɛ wəran wəka Kanahan. 2 Məyɛfɛ. Məkɔ Padaŋ-Aram, ndena papa ka iya kam. Məlɛk di wəran awut aran a ŋcɔk' am Labaŋ dacɔ. 3 Kanu Kəpɔŋ nkɛ kəntam mes fəp doru mɔ kəpoc' am pətɔt, kəsɔŋ əm dokombəra, kəsɔŋ' am məla ntɛ tɔŋsɔŋɛ məyɔnɛ afum alarəm mɔ! 4 Pəsɔŋ əm kətolanɛ pətɔt ka Abraham, məna kɔ yuruya yam ntɛ tɔŋsɔŋɛ atɔf ŋaŋɛ məyi decikəra mɔ, ŋey' əm dəwaca pəmɔ tɔkɔ Kanu Kəpɔŋ kənasɔŋ ŋi Abraham mɔ.» 5 Kɔ Isiyaka ɛsak Yakuba k'ɔŋkɔ Padaŋ-Aram, ndena Labaŋ wan ka Betuhɛl, wəAram, wɛŋc wərkun wəka Rebeka, iya wəka Yakuba kɔ Esay. 6 Kɔ Esay ɛnəŋk fɔ Isiyaka ontolanɛ Yakuba pətɔt, k'oloku kɔ kəkɔ sɔ Padaŋ-Aram pəkɔtɛn wəran, mba ntɛ Isiyaka oŋc-tolanɛ kɔ mɔ, ɛnasom kɔ ntɛ: «Ta mənɛŋcɛ wəran wəka Kanahan de.» 7 Yakuba ɛnane moloku ma kas kɔ kɛrɛ, k'ɔŋkɔ Padaŋ-Aram. 8 Kɔ Esay ɛnəŋk fɔ mes ma awut aran aka Kanahan mɛnabɔt fɛ papa kɔn Isiyaka. 9 Kɔ Esay ɔŋkɔ ndena Səmayila, k'ɛlɛk di wəran pac-we kɔ Mahalat, wan wəran wəka Səmayila wan k'Abraham, wəkirɛ ka Nebayɔt, kəbɛrɛnɛ ka aran aHewy akɔ ɛnayɔ mɔ.

10 Kɔ Yakuba ɛyɛfɛ Bɛrseba k'ɔŋkɔ Haraŋ. 11 K'ɛmbəp tofo tɔlɔma k'endirɛ di, bawo dec dɛnaləpɛ kɔ. K'ɛlɛk tasar tin ta kəfo kaŋkɔ, k'ɛfakɛnɛ pi, k'ɛfəntərɛ kəfo kaŋkɔ. 12 K'ɛwɛrəp. K'ɛnəŋk samɛ səcəmɛ dəntɔf domp da si doc-gbuŋɛnɛ kɔm mɛlɛke a Kanu mɛc-fərəŋk si, mɛc-pɛ, moc-tor. 13 Kɔ Kanu Kəpɔŋ kəcəmɛ samɛ sasɔkɔ dareŋc. Kɔ kəloku: «In' ɔyɔnɛ Kanu Kəpɔŋ, Kanu k'Abraham papa kam, kɔ Kanu ka Isiyaka. Antɔf ŋaŋɔkɔ məfəntərɛ mɔ, indesɔŋ əm ŋi məna kɔ yuruya yam. 14 Yuruya yam ŋendela pəmɔ kəbof ka dəntɔf. Məndewɔkələs dəkəndɛ dam kəca kətɔt kɔ kəmeriya, nde dec dɛmpɛ mɔ kɔ nde dɛŋkalɛ mɔ. Afum a doru fəp ŋande ŋactɛnər əm kətolanɛ pətɔt kɔ yuruya yam. 15 Ina yati in' osol' am, inde ic-bum əm kəca nkɛ o nkɛ məŋkɔ mɔ, indekɛr' am atɔf ŋaŋɛ, bawo ifɔsak əm ta intalas tantɛ iŋlok' əm mɔ.» 16 Kɔ Yakuba entimɛ dəmere, k'oloku: «Tɔlɔma Kanu Kəpɔŋ kəyi nnɔ tofo tantɛ, kɔ intɔnacərɛ ti!» 17 K'enesɛ k'oloku: «Mba tofo tɔyɔ wɛy-wɛy! Pəŋciyanɛ fɛ dɛ kɔ kəlɔ ka Kanu, kusuŋka ka dareŋc kɔ!» 18 Kɔ Yakuba ɛyɛfɛ bət-bət suy, k'ɛlɛk tasar tɔkɔ ɛnafakɛnɛ domp mɔ, k'ɛŋcəmbər pi, k'oloŋər pi moro. 19 Kɔ Yakuba ewe tofo tatɔkɔ Betel, mba dare dadɔkɔ dɛnanuŋkɛnɛ dɔyɔ tewe ta Lus. 20 Kɔ Yakuba ontola pəc-loku: «Kɔ pəyɔnɛ fɔ Kanu kəsol' em kəc-bum im dɔpɔ ndɛ iŋkɔt mɔ, kɔ pəyɔnɛ fɔ kəŋsɔŋ im kəcom kem kəsɔm, kəsɔŋ im sɔ yamos ibɛrnɛ-ɛ, 21 K'ilukus pəforu disrɛ nde kəlɔ ka papa wəkem-ɛ, awa Kanu Kəpɔŋ kəndeyɔnɛ Kanu kem. 22 Tasar tantɛ iŋcəmbər mɔ, pendeyɔnɛ kəlɔ ka Kanu. Indesɔŋ əm farilɛ fa mpɛ o mpɛ məndekɔ-sɔŋ im mɔ.»